ਪੰਜਾਬੀ ਪੋਸਟ: ਨਵੰਬਰ ਨੂੰ ਹਰ ਸਾਲ ਹਿੰਦੂ ਹੈਰੀਟੇਜ ਮੰਥ ਵਜੋਂ ਮਨਾਏ ਜਾਣ ਦੇ ਸਿਲਸਲੇ ਵਿੱਚ ਬਰੈਂਪਟਨ ਵਿੱਚ ਵੱਖ ਵੱਖ ਥਾਵਾਂ ਉੱਤੇ ਸਮਾਗਮਾਂ ਦਾ ਆਯੋਜਿਤ ਕੀਤਾ ਜਾ ਰਿਹਾ ਹੈ। ਸਮਾਗਮਾਂ ਦੀ ਇਸ ਲੜੀ ਵਜੋਂ ਬੀਤੇ ਦਿਨੀਂ ਬਰੈਂਪਟਨ ਸਿਟੀ ਹਾਲ ਵਿਖੇ ਝੰਡਾ ਲਹਿਰਾਉਣ ਦੀ ਰਸਮ ਅਦਾ ਕੀਤੀ ਗਈ। ਇਸ ਰਸਮ ਵਿੱਚ ਮੈਂਬਰ ਪਾਰਲੀਮੈਂਟ ਰੂਬੀ ਸਹੋਤਾ, ਸੋਨੀਆ ਸਿੱਧੂ, ਐਮ ਪੀ ਪੀ ਅਮਰਜੋਤ ਸੰਧੂ, ਕਾਉਂਸਲਰ ਡੱਗ ਵ੍ਹਿਲਹਾਂਸ, ਜੈਫ ਬੋਮੈਨ ਅਤੇ ਸ਼ਾਰਮੇਨ ਵਿਲੀਅਮਜ਼ ਸਮੇਤ ਬਰੈਂਪਟਨ ਕਮਿਉਨਿਟੀ ਦੇ ਅਨੇਕਾਂ ਪਤਵੰਤਿਆਂ ਨੇ ਹਾਜ਼ਰੀ ਭਰੀ।
ਇਸ ਸਮਾਗਮ ਦੇ ਸਫ਼ਲਤਾ ਨਾਲ ਨੇਪਰੇ ਚਾੜਨ ਵਿੱਚ ਕੈਨੇਡੀਅਨ ਹਿੰਦੂ ਐਸੋਸੀਏਸ਼ਨ, ਵਰਲਡ ਬ੍ਰਾਹਮਣ ਫੈਡਰੇਸ਼ਨ ਆਫ ਕੈਨੇਡਾ, ਅਖੰਡ ਭਾਰਤੀ ਕਲੱਬ, ਹਿੰਦੂ ਸਭਾ ਮੰਦਰ, ਨਿਊ ਹੋਪ ਸੀਨੀਅਰਜ਼ ਕੱਲਬ, ਅੱਗਰਵਾਲ ਸਭਾ ਕੈਨੇਡਾ, ਨਿਊ ਬਰੈਂਪਟਨ, ਮਾਈ ਇੰਡੀਅਨਜ਼ ਇਨ ਕੈਨੇਡਾ ਐਸੋਸੀਏਸ਼ਨ, ਸਾਊਥ ਏਸ਼ੀਅਨਜ਼ ਇਨ ਕੈਨੇਡਾ, ਬਰੈਂਪਟਨ ਫਸਟ ਫਾਉਂਡੇਸ਼ਨ ਨੇ ਜਿ਼ਕਰਯੋਗ ਯੋਗਦਾਨ ਪਾਇਆ।
ਪਤਾ ਲੱਗਾ ਹੈ ਕਿ ਹਿੰਦੂ ਹੈਰੀਟੇਜ ਮਹੀਨੇ ਦੇ ਸੰਦਰਭ ਵਿੱਚ ਹਿੰਦੂ ਸਭਾ ਮੰਦਰ, ਹਨੂਮਾਨ ਮੰਦਰ, ਗੌਰੀ ਸ਼ੰਕਰ ਮੰਦਰ ਅਤੇ ਹਿੰਦੂ ਹੈਰੀਟੇਜ ਸੈਂਟਰ ਵਿਖੇ ਵੀ ਸਮਾਗਮ ਆਯੋਜਿਤ ਕੀਤੇ ਗਏ ਹਨ। ਇਹਨਾਂ ਸਾਰੇ ਸਮਾਗਮਾਂ ਨੂੰ ਸੂਤਰਬੱਧ ਕਰਨ ਹਿੰਦੂ ਹੈਰੀਟੇਜ ਸੈਲੀਬਰੇਸ਼ਨ ਫਾਉਂਡੇਸ਼ਨ ਦੇ ਕਾਰਜਕਰਤਾ ਬੀਤੇ ਲੰਬੇ ਸਮੇਂ ਤੋਂ ਸਖ਼ਤ ਮਿਹਨਤ ਕਰਦੇ ਆ ਰਹੇ ਹਨ ਜਿਹਨਾਂ ਵਿੱਚ ਦੇਵ ਕਪਿਲ, ਪੀਯੂਸ਼ ਗੁਪਤਾ, ਨਿੱਕ ਮੈਂਗੀ, ਵੀਰੇਂਦਰ ਰਾਠੀ, ਰਾਕੇਸ਼ ਜੋਸ਼ੀ, ਮਨਨ ਗੁਪਤਾ, ਮਦੂਸੂਦਨ ਲਾਮਾ, ਅਨਿਲ ਸ਼ਰਮਾ, ਮਧੂ ਸ਼ਰਮਾ ਅਤੇ ਅਮਿਤ ਭੱਟੀ ਦਾ ਵਿਸ਼ੇਸ਼ ਰੋਲ ਰਿਹਾ ਹੈ।