ਕੁਈਨਜ਼ ਪਾਰਕ, 25 ਨਵੰਬਰ (ਪੋਸਟ ਬਿਊਰੋ) : ਸਿੱਖਿਆ ਪ੍ਰਬੰਧ ਵਿੱਚ ਤਬਦੀਲੀਆਂ ਕਰਨ ਲਈ ਕਾਹਲੀ ਡੱਗ ਫੋਰਡ ਸਰਕਾਰ ਨੂੰ ਸ਼ਾਇਦ ਲੋਕਾਂ ਤੋਂ ਸਹਿਯੋਗ ਨਾ ਮਿਲੇ। ਇਸ ਦਾ ਖੁਲਾਸਾ ਨਵੇਂ ਸਰਵੇਖਣ ਤੋਂ ਹੋਇਆ। ਇਸ ਤੋਂ ਇਹ ਸਾਹਮਣੇ ਆਇਆ ਕਿ ਓਨਟਾਰੀਓ ਵਾਸੀ ਸਿੱਖਿਆ ਉੱਤੇ ਹੋਣ ਵਾਲੇ ਖਰਚੇ ਤੋਂ ਲੈ ਕੇ ਕਲਾਸਾਂ ਦੇ ਆਕਾਰ ਤੱਕ ਕੀ ਸੋਚਦੇ ਹਨ।
ਨੈਨੋਜ਼ ਰਿਸਰਚ ਵੱਲੋਂ ਕਰਵਾਏ ਗਏ ਸਰਵੇਖਣ ਵਿੱਚ ਪ੍ਰੋਵਿੰਸ ਦੇ ਹਰ ਹਿੱਸੇ ਤੋਂ ਸ਼ਾਮਲ ਹੋਏ ਲੋਕਾਂ ਨੇ ਦੱਸਿਆ ਕਿ ਪ੍ਰੋਵਿੰਸ਼ੀਅਲ ਸਰਕਾਰ ਨੂੰ ਘਾਟੇ ਨਾਲ ਨਜਿੱਠਣ ਦੀ ਥਾਂ ਸਿੱਖਿਆ ਸਬੰਧੀ ਖਰਚੇ ਨੂੰ ਪਹਿਲ ਦੇਣੀ ਚਾਹੀਦੀ ਹੈ। ਸਰਵੇਖਣ ਵਿੱਚ ਸ਼ਾਮਲ ਲੋਕਾਂ ਵਿੱਚੋਂ ਬਹੁਤਿਆਂ ਨੇ ਪੈਸੇ ਦੀ ਬਚਤ ਲਈ ਕਲਾਸਾਂ ਦੇ ਆਕਾਰ ਵਿੱਚ ਵਾਧਾ ਕੀਤੇ ਜਾਣ ਵਰਗੇ ਕਦਮ ਨੂੰ ਗਲਤ ਦੱਸਿਆ।
ਇਹ ਸਰਵੇਖਣ ਓਨਟਾਰੀਓ ਪਬਲਿਕ ਸਕੂਲ ਬੋਰਡਜ਼ ਐਸੋਸਿਏਸ਼ਨ (ਓਪੀਐਸਬੀਏ) ਦੇ ਕਹਿਣ ਉੱਤੇ ਕਰਵਾਇਆ ਗਿਆ ਸੀ। ਇਸ ਸਮੇਂ ਓਪੀਐਸਬੀਏ, ਪ੍ਰੋਵਿੰਸ ਦੇ ਪਬਲਿਕ ਐਲੀਮੈਂਟਰੀ ਤੇ ਹਾਈ ਸਕੂਲ ਟੀਚਰਜ਼ ਯੂਨੀਅਨਜ਼ ਦੇ ਨਾਲ ਨਾਲ ਸਰਕਾਰ ਨਾਲ ਚੱਲ ਰਹੀ ਗੱਲਬਾਤ ਵਿੱਚ ਫਸੀ ਹੋਈ ਹੈ। ਇਹ ਰਲੀਜ਼ ਵਰਕ ਟੂ ਰੂਲ ਕੈਂਪੇਨ, ਜਿਸ ਨਾਲ ਪ੍ਰੋਵਿੰਸ ਭਰ ਦੇ ਸੈਂਕੜੇ ਐਲੀਮੈਂਟਰੀ ਤੇ ਹਾਈ ਸਕੂਲ ਪ੍ਰਭਾਵਿਤ ਹੋਣਗੇ, ਦੇ ਸੁ਼ਰੂ ਹੋਣ ਤੋਂ ਠੀਕ ਇੱਕ ਦਿਨ ਪਹਿਲਾਂ ਜਾਰੀ ਕੀਤੀ ਗਈ।
ਇਸ ਸਰਵੇਖਣ ਵਿੱਚ ਸਾਹਮਣੇ ਆਇਆ ਕਿ 61 ਫੀ ਸਦੀ ਓਨਟਾਰੀਓ ਵਾਸੀਆਂ ਦਾ ਮੰਨਣਾ ਹੈ ਕਿ ਪਬਲਿਕ ਐਜੂਕੇਸ਼ਨ ਉੱਤੇ ਖਰਚਾ ਕਰਨਾ ਪ੍ਰੋਵਿੰਸ ਦੇ 9 ਬਿਲੀਅਨ ਡਾਲਰ ਦੇ ਘਾਟੇ ਨੂੰ ਖਤਮ ਕਰਨ ਤੇ ਜਾਂ ਫਿਰ 357 ਬਿਲੀਅਨ ਦਾ ਕਰਜ਼ਾ ਲਾਹੁਣ ਤੋਂ ਕਿਤੇ ਜਿ਼ਆਦਾ ਜ਼ਰੂਰੀ ਹੈ। ਅਪਰੈਲ 2019 ਵਿੱਚ ਪੇਸ਼ ਕੀਤੇ ਗਏ ਬਜਟ ਵਿੱਚ ਫੋਰਡ ਸਰਕਾਰ ਨੇ ਸਿੱਖਿਆ ਉੱਤੇ 700 ਮਿਲੀਅਨ ਡਾਲਰ ਖਰਚਣ ਦਾ ਵਾਅਦਾ ਕੀਤਾ ਸੀ। ਆਲੋਚਕਾਂ ਦਾ ਕਹਿਣਾ ਹੈ ਕਿ ਇਹ ਮੁਦਰਾਸਫਿਤੀ ਦੀ ਦਰ ਨਾਲ ਤਾਲਮੇਲ ਨਹੀਂ ਬਿਠਾ ਪਾਏਗਾ।
ਸਾਲ ਦੇ ਅਖੀਰ ਵਿੱਚ ਦਿੱਤੇ ਗਏ ਆਰਥਿਕ ਬਿਆਨ ਵਿੱਚ ਸਰਕਾਰ ਨੇ ਦੱਸਿਆ ਕਿ ਉਸ ਵੱਲੋਂ ਐਜੂਕੇਸ਼ਨ ਸੈਕਟਰ ਵਿੱਚ 186 ਮਿਲੀਅਨ ਡਾਲਰ ਦਾ ਨਿਵੇਸ਼ ਕੀਤਾ ਗਿਆ ਹੈ। ਇਹ ਬਹੁਤਾ ਕਰਕੇ ਪਾਲਿਸੀ ਬਦਲੇ ਜਾਣ ਤੇ ਸਕੂਲਾਂ ਵਿੱਚ ਦਾਖਲ ਹੋਏ ਵਾਧੂ ਵਿਦਿਆਥੀਆਂ ਕਾਰਨ ਹੈ। ਪ੍ਰੋਵਿੰਸ ਦੇ ਐਜੂਕੇਸ਼ਨ ਸਿਸਟਮ ਨੂੰ ਫੰਡ ਕਿਵੇਂ ਦੇਣੇ ਚਾਹੀਦੇ ਹਨ ਇਸ ਬਾਰੇ ਪੁੱਛੇ ਜਾਣ ਉੱਤੇ 65 ਫੀ ਸਦੀ ਨੇ ਦੱਸਿਆ ਕਿ ਇਹ ਸਕੂਲਾਂ ਵਿੱਚ ਦਾਖਲ ਹੋਏ ਵਿਦਿਆਰਥੀਆਂ ਤੇ ਮੁਦਰਾਸਫਿਤੀ ਦੀ ਦਰ ਦੇ ਹਿਸਾਬ ਨਾਲ ਹੋਣੇ ਚਾਹੀਦੇ ਹਨ।
25 ਫੀ ਸਦੀ ਦਾ ਮੰਨਣਾ ਹੈ ਕਿ ਇਹ ਪ੍ਰੋਵਿੰਸ ਦੇ ਸਮੁੱਚੇ ਖਰਚੇ ਦਾ ਕੁੱਝ ਹਿੱਸਾ ਹੋਣੇ ਚਾਹੀਦੇ ਹਨ ਤੇ ਸਕੂਲ ਬੋਰਡਾਂ ਨੂੰ ਦਿੱਤੇ ਗਏ ਬਜਟ ਵਿੱਚ ਹੀ ਕੰਮ ਕਰਨਾ ਚਾਹੀਦਾ ਹੈ। ਓਪੀਬੀਐਸਏ ਦੀ ਪ੍ਰੈਜ਼ੀਡੈਂਟ ਕੈਥੀ ਅਬ੍ਰਾਹਮ ਨੇ ਇੱਕ ਬਿਆਨ ਵਿੱਚ ਆਖਿਆ ਕਿ ਪ੍ਰੋਵਿੰਸ਼ੀਅਲ ਬਜਟ ਵਿੱਚ ਦੂਜੀ ਥਾਂ ਉੱਤੇ ਸੱਭ ਤੋਂ ਵੱਧ ਫੰਡ ਐਜੂਕੇਸ਼ਨ ਲਈ ਰੱਖਿਆ ਜਾਂਦਾ ਹੈ। ਉਨ੍ਹਾਂ ਆਸ ਪ੍ਰਗਟਾਈ ਕਿ ਇਸ ਸਰਵੇਖਣ ਦੇ ਨਤੀਜਿਆਂ ਨਾਲ ਪਬਲਿਕ ਐਜੂਕੇਸ਼ਨ ਲਈ ਸਥਿਰ ਫੰਡਿੰਗ ਰੱਖਣ ਵਿੱਚ ਮਦਦ ਮਿਲੇਗੀ। ਕਲਾਸਾਂ ਦਾ ਆਕਾਰ ਵਧਾਉਣ ਦੇ ਮਾਮਲੇ ਵਿੱਚ ਓਨਟਾਰੀਓ ਵਾਸੀਆਂ ਨੇ ਰਲਵੀਂ ਮਿਲਵੀਂ ਰਾਇ ਪ੍ਰਗਟਾਈ ਜਦਕਿ 41 ਫੀ ਸਦੀ ਨੇ ਆਖਿਆ ਕਿ ਪੈਸੇ ਦੀ ਬਚਤ ਲਈ ਉਹ ਵਿਦਿਆਰਥੀਆਂ ਤੇ ਅਧਿਆਪਕਾਂ ਦੇ ਅਨੁਪਾਤ ਵਿੱਚ ਵਾਧਾ ਕਰਨ ਦੇ ਖਿਲਾਫ ਹਨ। ਚਾਰਾਂ ਵਿੱਚੋਂ ਇੱਕ ਨੇ ਆਖਿਆ ਕਿ ਉਹ ਕਲਾਸਾਂ ਦਾ ਆਕਾਰ ਵਧਾਏ ਜਾਣ ਦੇ ਖਿਲਾਫ ਹਨ ਜਦਕਿ 11 ਫੀ ਸਦੀ ਨੇ ਆਖਿਆ ਕਿ ਕਲਾਸਾਂ ਦਾ ਆਕਾਰ ਵਧਾਉਣ ਦੇ ਹੱਕ ਵਿੱਚ ਹਨ।