ਟੋਰਾਂਟੋ, 25 ਨਵੰਬਰ (ਪੋਸਟ ਬਿਊਰੋ) : ਸੁਪੀਰੀਅਰ ਕੋਰਟ ਵੱਲੋਂ ਫੈਸਲਾ ਸੁਣਾਏ ਜਾਣ ਤੋਂ ਬਾਅਦ ਸਕਾਰਬੌਰੋ-ਐਗਿਨਕੋਰਟ ਤੋਂ ਕਾਉਂਸਲਰ ਜਿੰਮ ਕੈਰਿਆਨਿਸ ਨੂੰ ਹਾਲ ਦੀ ਘੜੀ ਬਹਾਲ ਕਰ ਦਿੱਤਾ ਗਿਆ ਹੈ ਜਦਕਿ ਉਨ੍ਹਾਂ ਵੱਲੋਂ ਚੋਣਾਂ ਦੌਰਾਨ ਕੀਤੇ ਗਏ ਖਰਚਿਆਂ ਦੇ ਸਬੰਧ ਵਿੱਚ ਆਡਿਟ ਕਰਵਾਏ ਜਾਣ ਦੇ ਵੀ ਅਦਾਲਤ ਵੱਲੋਂ ਹੁਕਮ ਦਿੱਤੇ ਗਏ ਹਨ।
ਸਿਟੀ ਆਫ ਟੋਰਾਂਟੋ ਅਨੁਸਾਰ 2018 ਵਿੱਚ ਹੋਈਆਂ ਚੋਣਾਂ ਸਬੰਧੀ ਕੈਰਿਆਨਿਸ ਦੇ ਵਿੱਤੀ ਸਟੇਟਮੈਂਟ ਵਿੱਚ ਦਰਸਾਇਆ ਗਿਆ ਹੈ ਕਿ ਉਨ੍ਹਾਂ ਵੱਲੋਂ ਕੀਤੇ ਗਏ ਖਰਚਿਆਂ ਦੀ ਹੱਦ ਨਿਰਧਾਰਤ ਖਰਚਿਆਂ ਦੀ ਹੱਦ ਨਾਲੋਂ 25,000 ਡਾਲਰ ਤੋਂ ਵੀ ਟੱਪ ਗਈ। ਇਸੇ ਕਾਰਨ ਹੀ ਉਨ੍ਹਾਂ ਨੂੰ ਵਾਰਡ 22 ਦੇ ਕਾਉਂਸਲਰ ਵਜੋਂ ਹਟਾਇਆ ਗਿਆ ਸੀ। ਪਰ ਕੈਰਿਆਨਿਸ ਨੇ ਇਹ ਤਰਕ ਦਿੱਤਾ ਕਿ ਇਹ ਪੇਪਰਵਰਕ ਵਿੱਚ ਹੋਈ ਕਲੈਰੀਕਲ ਗਲਤੀ ਸੀ ਤੇ ਸੁਪੀਰੀਅਰ ਕੋਰਟ ਦੇ ਜੱਜ ਵੱਲੋਂ ਉਨ੍ਹਾਂ ਨੂੰ ਬੈਨੇਫਿੱਟ ਆਫ ਦ ਡਾਊਟ ਦਿੱਤਾ ਜਾ ਰਿਹਾ ਹੈ। ਜੱਜ ਵੱਲੋਂ ਆਪਣੇ ਫੈਸਲੇ ਵਿੱਚ ਆਖਿਆ ਗਿਆ ਕਿ ਕੈਰਿਆਨਿਸ ਨੂੰ ਅਜਿਹੇ ਮਾਮਲੇ ਵਿੱਚ ਐਨੀ ਵੱਡੀ ਸਜ਼ਾ ਦੇਣਾ ਜਾਇਜ਼ ਨਹੀਂ ਹੈ ਜਦੋਂ ਗਲਤੀ ਕਿਸੇ ਹੋਰ ਦੀ ਲਾਪਰਵਾਹੀ ਕਾਰਨ ਹੋਈ ਹੈ।
ਫੈਸਲੇ ਵਿੱਚ ਅੱਗੇ ਆਖਿਆ ਗਿਆ ਕਿ ਹਾਲ ਦੀ ਘੜੀ ਅਜਿਹਾ ਕੁੱਝ ਵੀ ਸਾਹਮਣੇ ਨਹੀਂ ਆਇਆ ਕਿ ਕੈਰਿਆਨਿਸ ਨੇ ਜਾਣਬੁੱਝ ਕੇ ਮਿਥੀ ਹੋਈ ਹੱਦ ਨਾਲੋਂ ਵੱਧ ਖਰਚਾ ਕੀਤਾ। ਜੱਜ ਨੇ ਅੱਗੇ ਆਖਿਆ ਕਿ ਜੁਰਮਾਨਾ ਅਜਿਹੀ ਸੂਰਤ ਵਿੱਚ ਨਹੀਂ ਲਾਇਆ ਜਾ ਸਕਦਾ ਜੇ ਉਮੀਦਵਾਰ ਨੇ ਲਾਪਰਵਾਹੀ ਨਾਲ ਜਾਂ ਕਿਸੇ ਹੋਰ ਦੀ ਗਲਤੀ ਕਾਰਨ ਇਸ ਤਰ੍ਹਾਂ ਦਾ ਜੁਰਮ ਕੀਤਾ ਹੋਵੇ। ਜੱਜ ਨੇ ਇਹ ਵੀ ਆਖਿਆ ਕਿ ਜੇ ਇਹ ਸਿੱਧ ਹੋ ਜਾਂਦਾ ਹੈ ਕਿ ਕੈਰਿਆਨਿਸ ਨੇ ਸੋਚ ਸਮਝ ਕੇ ਤੇ ਜਾਣਬੁੱਝ ਕੇ ਨਿਯਮਾਂ ਦੀ ਉਲੰਘਣਾਂ ਕੀਤੀ ਹੈ ਤਾਂ ਉਨ੍ਹਾਂ ਨੂੰ ਹੋਰ ਜੁਰਮਾਨਾ ਲਾਏ ਜਾਣ ਦੇ ਨਾਲ ਅਜੇ ਵੀ ਅਹੁਦੇ ਤੋਂ ਹਟਾਇਆ ਜਾ ਸਕਦਾ ਹੈ।
ਸੋਮਵਾਰ ਰਾਤ ਨੂੰ ਕੈਰਿਆਨਿਸ ਨੇ ਆਪਣੇ ਸਮਰਥਕਾਂ ਦਾ ਧੰਨਵਾਦ ਕਰਦਿਆਂ ਆਖਿਆ ਕਿ ਉਹ ਸਿਟੀ ਹਾਲ ਵਿੱਚ ਮੁੜ ਕੰਮ ਕਰਨ ਲਈ ਉਤਸ਼ਾਹਿਤ ਹਨ।