ਸਸਕੈਚਵਨ, 25 ਨਵੰਬਰ (ਪੋਸਟ ਬਿਊਰੋ) : ਨਿਊਟਰੀਅਨ ਲਿਮਟਿਡ ਦਾ ਕਹਿਣਾ ਹੈ ਕਿ ਕੈਨੇਡੀਅਨ ਨੈਸ਼ਨਲ ਰੇਲਵੇ ਕਾਰਪੋਰੇਸ਼ਨ ਦੀ ਹੜਤਾਲ ਕਾਰਨ ਉਨ੍ਹਾਂ ਵੱਲੋਂ ਆਪਣੀ ਸੱਭ ਤੋਂ ਵੱਡੀ ਪੋਟਾਸ਼ ਦੀ ਖਾਣ (ਮਾਈਨ) ਬੰਦ ਕੀਤੀ ਜਾ ਰਹੀ ਹੈ। ਖਾਦ ਬਣਾਉਣ ਵਾਲੀ ਇਸ ਵੱਡੀ ਕੰਪਨੀ ਦੇ ਇਸ ਫੈਸਲੇ ਨਾਲ 550 ਕਰਮਚਾਰੀਆਂ ਦੀ ਆਰਜ਼ੀ ਛੁੱਟੀ ਹੋ ਜਾਵੇਗੀ।
ਨਿਊਟਰੀਅਨ ਦੇ ਚੀਫ ਐਗਜ਼ੈਕਟਿਵ ਚੱਕ ਮਾਗਰੋ ਨੇ ਦੱਸਿਆ ਕਿ ਵਰਕਰਜ਼ ਨੂੰ ਇਸ ਸਬੰਧ ਵਿੱਚ ਅੱਜ ਨੋਟਿਸ ਮਿਲ ਜਾਣਗੇ ਕਿ 2 ਦਸੰਬਰ ਤੋਂ ਸ਼ੁਰੂ ਕਰਕੇ ਅਗਲੇ ਦੋ ਹਫਤਿਆਂ ਤੱਕ ਦੱਖਣਪੂਰਬੀ ਸਸਕੈਚਵਨ ਵਿੱਚ ਖਾਣ ਦੇ ਕੰਮ ਨੂੰ ਰੋਕ ਦਿੱਤਾ ਜਾਵੇਗਾ। ਇੱਥੇ ਦੱਸਣਾ ਬਣਦਾ ਹੈ ਕਿ ਰੋਕਨਵਿੱਲੇ ਮਾਈਨ ਦੇ ਬਹੁਤੇ ਉਤਪਾਦ ਸੀਐਨ ਰੇਲ ਰਾਹੀਂ ਹੀ ਲਿਆਂਦੇ-ਲਿਜਾਏ ਜਾਂਦੇ ਹਨ ਤੇ ਸੀਐਨ ਰੇਲ ਇਸ ਸਮੇਂ ਦਸ ਫੀ ਸਦੀ ਵੀ ਕੰਮ ਨਹੀਂ ਕਰ ਰਹੀ।
ਮਾਗਰੋ ਨੇ ਆਖਿਆ ਕਿ ਖਰਾਬ ਮੌਸਮ ਤੇ ਟਰੇਡ ਵਿਵਾਦ ਕਾਰਨ ਪਹਿਲਾਂ ਤੋਂ ਹੀ ਚੱਲ ਰਹੀ ਮੰਦੀ ਤੇ ਹੁਣ ਇਸ ਹੜਤਾਲ ਕਾਰਨ ਕਿਸਾਨਾਂ ਤੇ ਖਾਣ ਵਿੱਚ ਕੰਮ ਕਰਨ ਵਾਲੇ ਵਰਕਰਜ਼ ਦਾ ਲੱਕ ਟੁੱਟ ਗਿਆ ਹੈ ਤੇ ਇਹ ਸਥਿਤੀ ਕਾਫੀ ਨਿਰਾਸ਼ਾਜਨਕ ਹੈ। ਹਫਤੇ ਤੋਂ ਚੱਲ ਰਹੀ ਇਸ ਹੜਤਾਲ ਨੂੰ ਖ਼ਤਮ ਕਰਵਾਉਣ ਲਈ ਕਿਊਬਿਕ ਦੇ ਸੈਂਕੜੇ ਕਿਸਾਨਾਂ ਵੱਲੋਂ ਟਰੈਕਟਰਾਂ ਦੇ ਕਾਫਲੇ ਨਾਲ ਅੱਜ ਮਾਂਟਰੀਅਲ ਦੀਆਂ ਸੜਕਾਂ ਉੱਤੇ ਮਾਰਚ ਕੀਤਾ ਗਿਆ ਤੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਹਲਕੇ ਦੇ ਆਫਿਸ ਸਾਹਮਣੇ ਮੱਕੀ ਦੇ ਢੇਰ ਲਾ ਦਿੱਤੇ ਗਏ।
ਓਟਵਾ ਵੱਲੋਂ ਕੁੱਝ ਇੰਡਸਟਰੀਜ਼ ਤੇ ਪ੍ਰੋਵਿੰਸ਼ੀਅਲ ਮੰਤਰੀਆਂ ਦੀ ਮੰਗ ਉੱਤੇ ਪਾਰਲੀਆਮੈਂਟ ਦੀ ਕਾਰਵਾਈ ਮੁੜ ਸੱਦੇ ਜਾਣ ਦੀ ਥਾਂ ਇਸ ਮਾਮਲੇ ਵਿੱਚ ਗੱਲਬਾਤ ਰਾਹੀਂ ਮਸਲੇ ਨੂੰ ਹੱਲ ਕਰਨ ਦੀ ਗੁਜ਼ਾਰਿਸ਼ ਕੀਤੀ ਜਾ ਰਹੀ ਹੈ। ਜਿ਼ਕਰਯੋਗ ਹੈ ਕਿ ਦੇਸ਼ ਭਰ ਵਿੱਚ 3200 ਸੀਐਨ ਕਰਮਚਾਰੀ ਮੰਗਲਵਾਰ ਸਵੇਰ ਤੋਂ ਹੜਤਾਲ ਉੱਤੇ ਹਨ। ਇਨ੍ਹਾਂ ਕਰਮਚਾਰੀਆਂ ਵੱਲੋਂ ਲੰਮੇਂ ਘੰਟਿਆਂ ਤੱਕ ਕੰਮ ਕਰਨ, ਥਕਾਵਟ ਤੇ ਕੰਮ ਦੇ ਖਤਰਨਾਕ ਹਾਲਾਤ ਦੇ ਬਾਵਜੂਦ 23 ਜੁਲਾਈ ਤੋਂ ਕੋਈ ਕਾਂਟਰੈਕਟ ਸਿਰੇ ਨਾ ਚੜ੍ਹਨ ਕਾਰਨ ਇਹ ਹੜਤਾਲ ਕੀਤੀ ਗਈ ਹੈ।