ਟੋਰਾਂਟੋ, 25 ਨਵੰਬਰ (ਪੋਸਟ ਬਿਊਰੋ) : ਓਨਟਾਰੀਓ ਦੀ ਲਿਬਰਲ ਪਾਰਟੀ ਦੀ ਲੀਡਰਸਿ਼ਪ ਦੌੜ ਵਿੱਚ ਹਿੱਸਾ ਲੈਣ ਲਈ ਡੈੱਡਲਾਈਨ ਸੋਮਵਾਰ ਸ਼ਾਮ ਨੂੰ 5:00 ਵਜੇ ਤੱਕ ਹੈ। ਇਸ ਅਹੁਦੇ ਲਈ ਅਪਲਾਈ ਕਰਨ ਵਾਲੇ ਅੰਦਰ ਮਜ਼ਬੂਤ ਆਰਗੇਨਾਈਜੇ਼ਸ਼ਨਲ ਸਕਿੱਲਜ਼ ਤੇ ਤੇਜ਼ੀ ਨਾਲ ਬਦਲ ਰਹੇ ਸਿਆਸੀ ਪਰੀਪੇਖ ਅਨੁਸਾਰ ਢਲਣ ਦੀ ਸਮਰੱਥਾ ਵੀ ਹੋਣੀ ਚਾਹੀਦੀ ਹੈ। ਪਾਰਟੀ ਦੀ ਲੀਡਰਸਿ਼ਪ ਦੌੜ ਵਿੱਚ ਹਿੱਸਾ ਲੈਣ ਵਾਲਿਆਂ ਉੱਤੇ ਬਾਰੀਕੀ ਨਾਲ ਨਜ਼ਰ ਰੱਖ ਰਹੇ ਮਾਹਿਰਾਂ ਦਾ ਇਹੋ ਆਖਣਾ ਹੈ।
ਪਰ ਇਸ ਦੌੜ ਵਿੱਚ ਸਫਲ ਰਹਿਣ ਵਾਲੇ ਉਮੀਦਵਾਰ ਨੂੰ ਉਸ ਲਿਬਰਲ ਪਾਰਟੀ ਦਾ ਨਵੇਂ ਸਿਰੇ ਤੋਂ ਨਿਰਮਾਣ ਕਰਨਾ ਹੋਵੇਗਾ ਜਿਸ ਨੇ 16 ਸਾਲਾਂ ਤੱਕ ਓਨਟਾਰੀਓ ਉੱਤੇ ਰਾਜ ਕੀਤਾ। ਹੁਣ ਇਹ ਪਾਰਟੀ ਸਿਆਸੀ ਆਧਾਰ ਗੁਆ ਰਹੀ ਹੈ। ਇਸ ਸਮੇਂ ਵਿਲਫਰਿੱਡ ਲੌਰੀਅਰ ਯੂਨੀਵਰਸਿਟੀ ਵਿੱਚ ਪੁਲਿਟੀਕਲ ਸਾਇੰਸ ਦੇ ਪ੍ਰੋਫੈਸਰ ਤੇ ਪ੍ਰੋਵਿੰਸ਼ੀਅਲ ਲਿਬਰਲ ਕੈਬਨਿਟ ਮੰਤਰੀ ਰਹਿ ਚੁੱਕੇ ਜੌਹਨ ਮਿਲੌਏ ਨੇ ਆਖਿਆ ਕਿ ਇਹ ਮੁਕਾਬਲਾ ਕਾਫੀ ਮੁਸ਼ਕਲ ਹੋਣ ਵਾਲਾ ਹੈ। ਇਸ ਵਾਰੀ ਲੀਡਰ ਬਣਨ ਵਾਲੇ ਲਈ ਪੰਜ ਫੀ ਸਦੀ ਗਲੈਮਰ ਹੈ ਜਦਕਿ 95 ਫੀ ਸਦੀ ਸਖਤ ਮਿਹਨਤ ਹੈ।
2018 ਵਿੱਚ ਓਨਟਾਰੀਓ ਦੀ ਲਿਬਰਲ ਪਾਰਟੀ ਨੂੰ ਇਤਿਹਾਸ ਵਿੱਚ ਸੱਭ ਤੋਂ ਮਾੜੀ ਹਾਰ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਕੈਥਲੀਨ ਵਿੰਨ ਦੇ ਅਸਤੀਫੇ ਤੋਂ ਬਾਅਦ ਲਿਬਰਲ ਪਾਰਟੀ ਸਰਕਾਰੀ ਪਾਰਟੀ ਦਾ ਦਰਜਾ ਗੁਆ ਰਹੀ ਹੈ ਤੇ ਪਾਰਟੀ ਸਿਰ ਕਾਫੀ ਕਰਜ਼ਾ ਵੀ ਚੜ੍ਹਿਆ ਹੋਇਆ ਹੈ। ਇੱਥੇ ਦੱਸਣਾ ਬਣਦਾ ਹੈ ਕਿ ਲਿਬਰਲਾਂ ਨੇ ਆਪਣੀ ਚੋਣ ਕੈਂਪੇਨ ਲਈ ਫੰਡਾਂ ਦਾ ਜੁਗਾੜ ਕਰਨ ਵਾਸਤੇ 10 ਮਿਲੀਅਨ ਡਾਲਰ ਦਾ ਕਰਜ਼ਾ ਲਿਆ ਸੀ। ਇਸ ਸਾਲ ਦੇ ਸੁ਼ਰੂ ਵਿੱਚ 9.3 ਮਿਲੀਅਨ ਡਾਲਰ ਦਾ ਕਰਜਾ ਅਜੇ ਮੋੜਨਾ ਬਾਕੀ ਪਿਆ ਸੀ।
ਸਾਬਕਾ ਕੈਬਨਿਟ ਮੰਤਰੀ ਸਟੀਵਨ ਡੈਲ ਡਿਊਕਾ, ਮਾਈਕਲ ਕੋਟੀਊ ਤੇ ਮਿਤਜ਼ੀ ਹੰਟਰ ਇਸ ਸਮੇਂ ਲੀਡਰਸਿ਼ੱਪ ਦੌੜ ਵਿੱਚ ਸ਼ਾਮਲ ਹਨ। ਇਨ੍ਹਾਂ ਤੋਂ ਇਲਾਵਾ ਕੇਟ ਗ੍ਰਾਹਮ ਤੇ ਐਲਵਿਨ ਤੇਦਜ਼ੋ ਵੀ ਇਸ ਦੌੜ ਵਿੱਚ ਸ਼ਾਮਲ ਹਨ।