ਵਿਕਟੋਰੀਆ, 24 ਨਵੰਬਰ (ਪੋਸਟ ਬਿਊਰੋ) : ਐਨਡੀਪੀ ਆਗੂ ਜਗਮੀਤ ਸਿੰਘ ਨੇ ਬ੍ਰਿਟਿਸ਼ ਕੋਲੰਬੀਆ ਤੋਂ ਦੋ ਐਮਪੀਜ਼ ਨੂੰ ਕਿਸੇ ਵੀ ਤਰ੍ਹਾਂ ਦੀ ਗੱਲਬਾਤ ਲਈ ਆਪਣੇ ਕਾਕਸ ਦੀ ਅਗਵਾਈ ਕਰਨ ਤੇ ਹਾਊਸ ਆਫ ਕਾਮਨਜ਼ ਵਿੱਚ ਕੰਮ ਕਰਨ ਲਈ ਚੁਣਿਆ ਹੈ।
ਐਨਡੀਪੀ ਹਾਊਸ ਲੀਡਰ ਵਜੋਂ ਪੀਟਰ ਜੂਲੀਅਨ ਦੀ ਮੁੜ ਨਿਯੁਕਤੀ ਕੀਤੀ ਗਈ ਹੈ ਤੇ ਰੇਚਲ ਬਲੇਨੇ ਪਾਰਟੀ ਵ੍ਹਿਪ ਦੀ ਭੂਮਿਕਾ ਨਿਭਾਉਣਗੇ। ਜੂਲੀਅਨ ਨੂੰ ਪੰਜਵੀਂ ਵਾਰੀ ਐਨਡੀਪੀ ਦਾ ਹਾਊਸ ਲੀਡਰ ਨਿਯੁਕਤ ਕੀਤਾ ਗਿਆ ਹੈ ਜਦਕਿ ਬਲੇਨੇ ਨੇ ਚੋਣਾਂ ਤੋਂ ਪਹਿਲਾਂ ਇੱਕ ਸਾਲ ਤੱਕ ਡਿਪਟੀ ਵ੍ਹਿਪ ਵਜੋਂ ਸੇਵਾ ਨਿਭਾਈ। ਘੱਟ ਗਿਣਤੀ ਸਰਕਾਰ ਵਿੱਚ ਹਾਊਸ ਲੀਡਰ ਦੀ ਭੂਮਿਕਾ ਕਾਫੀ ਅਹਿਮ ਹੁੰਦੀ ਹੈ। ਕਾਮਨਜ਼ ਵਿੱਚ ਕੰਮ ਕਿਵੇਂ ਚੱਲੇਗਾ ਇਸ ਲਈ ਹੋਰਨਾਂ ਪਾਰਟੀਆਂ ਨਾਲ ਗੱਲਬਾਤ ਕਰਨ ਲਈ ਹਾਊਸ ਲੀਡਰ ਜਿ਼ੰਮੇਵਾਰ ਹੁੰਦੇ ਹਨ। ਭਰੋਸੇ ਦੇ ਵੋਟ ਵਿੱਚ ਉਨ੍ਹਾਂ ਦੀ ਅਹਿਮ ਭੂਮਿਕਾ ਹੁੰਦੀ ਹੈ।
ਟਰੂਡੋ ਸਰਕਾਰ ਡਿੱਗ ਨਾ ਜਾਵੇ ਇਸ ਲਈ ਲਿਬਰਲਾਂ ਨੂੰ ਘੱਟੋ ਘੱਟ ਇੱਕ ਹੋਰ ਪਾਰਟੀ ਨਾਲ ਰਲ ਕੇ ਚੱਲਣਾ ਯਕੀਨੀ ਬਣਾਉਣਾ ਹੋਵੇਗਾ ਤੇ ਇਸ ਸਬੰਧੀ ਗੱਲਬਾਤ ਹਾਊਸ ਲੀਡਰਜ਼ ਦਰਮਿਆਨ ਹੋਵੇਗੀ। ਵ੍ਹਿਪ ਕਾਕਸ ਵਿੱਚ ਅਨੁਸ਼ਾਸਨ ਬਣਾਈ ਰੱਖਣ ਤੇ ਕਾਮਨਜ਼ ਵਿੱਚ ਪਾਰਟੀ ਐਮਪੀਜ਼ ਦੀ ਪ੍ਰਸ਼ਾਸਕੀ ਕਾਰਗੁਜ਼ਾਰੀ ਵਿੱਚ ਵੀ ਅਹਿਮ ਭੂਮਿਕਾ ਨਿਭਾਉਂਦਾ ਹੈ। ਜਗਮੀਤ ਸਿੰਘ ਨੇ ਆਖਿਆ ਕਿ ਉਹ ਚਾਹੁੰਦੇ ਹਨ ਕਿ ਘੱਟ ਗਿਣਤੀ ਪਾਰਲੀਆਮੈਂਟ ਵਿੱਚ ਉਨ੍ਹਾਂ ਦੀ ਪਾਰਟੀ ਲਈ ਸਧੇ ਹੋਏ ਤੇ ਤਜ਼ਰਬੇਕਾਰ ਮੈਂਬਰ ਹੀ ਕੰਮ ਕਰਨ।
ਉਨ੍ਹਾਂ ਆਖਿਆ ਕਿ ਪੀਟਰ ਕਾਕਸ ਮੈਂਬਰਾਂ ਵਿੱਚੋਂ ਸੱਭ ਤੋਂ ਵੱਧ ਤਜ਼ਰਬੇਕਾਰ ਤੇ ਵਚਨਬੱਧ ਮੈਂਬਰ ਹਨ ਤੇ ਰੇਚਲ ਨੇ ਨਾ ਸਿਰਫ ਕਾਕਸ ਵਿੱਚ ਸਗੋਂ ਇਸ ਤੋਂ ਬਾਹਰ ਵੀ ਲੋਕਾਂ ਤੋਂ ਆਦਰ ਖੱਟਿਆ ਹੈ। ਉਨ੍ਹਾਂ ਅੱਗੇ ਆਖਿਆ ਕਿ ਘੱਟ ਗਿਣਤੀ ਸਰਕਾਰ ਵਿੱਚ ਕੰਮ ਕਰਨ ਲਈ ਹੁਣ ਜਦੋਂ ਐਨਡੀਪੀ ਤਿਆਰੀ ਕਰ ਰਹੀ ਹੈ ਤਾਂ ਉਹ ਅਹਿਮ ਲੀਡਰਸਿ਼ਪ ਵਾਲੀਆਂ ਭੂਮਿਕਾਵਾਂ ਲਈ ਇਨ੍ਹਾਂ ਦੋਵਾਂ ਉੱਤੇ ਨਿਰਭਰ ਕਰਨਗੇ। ਜਗਮੀਤ ਸਿੰਘ ਨੇ ਇਹ ਐਲਾਨ ਵਿਕਟੋਰੀਆ, ਬੀਸੀ ਵਿੱਚ ਐਨਡੀਪੀ ਦੇ ਇਜਲਾਸ ਦੌਰਾਨ ਕੀਤਾ। ਦੱਸਣਾ ਬਣਦਾ ਹੈ ਕਿ ਬ੍ਰਿਟਿਸ਼ ਕੋਲੰਬੀਆ ਹੀ ਅਜਿਹਾ ਇੱਕ ਮਾਤਰ ਪ੍ਰੋਵਿੰਸ ਹੈ ਜਿੱਥੇ ਪ੍ਰੀਮੀਅਰ ਜੌਹਨ ਹੌਰਗਨ ਦੀ ਅਗਵਾਈ ਵਾਲੀ ਐਨਡੀਪੀ ਸਰਕਾਰ ਹੈ। ਪਾਰਟੀ ਨੇ ਆਖਿਆ ਕਿ ਐਨਡੀਪੀ ਦੇ ਸੈ਼ਡੋ ਕੈਬਨਿਟ ਦਾ ਐਲਾਨ ਆਉਣ ਵਾਲੇ ਦਿਨਾਂ ਵਿੱਚ ਕੀਤਾ ਜਾਵੇਗਾ।