ਓਟਵਾ, 24 ਨਵੰਬਰ (ਪੋਸਟ ਬਿਊਰੋ) : ਪਿਛਲੇ ਮਹੀਨੇ ਹੋਈਆਂ ਫੈਡਰਲ ਚੋਣਾਂ ਵਿੱਚ ਮਾੜੀ ਕਾਰਗੁਜ਼ਾਰੀ ਵਿਖਾਉਣ ਦੇ ਮਾਮਲੇ ਵਿੱਚ ਫੈਡਰਲ ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਨੇ ਆਪਣੇ ਦੋ ਉੱਘੇ ਸਹਾਇਕਾਂ ਦੀ ਛੁੱਟੀ ਕਰ ਦਿੱਤੀ।
ਸ਼ਨਿੱਚਰਵਾਰ ਨੂੰ ਕਾਕਸ ਦੇ ਨਾਂ ਜਾਰੀ ਕੀਤੇ ਗਏ ਪੱਤਰ ਵਿੱਚ ਸ਼ੀਅਰ ਨੇ ਇਹ ਐਲਾਨ ਕੀਤਾ ਕਿ ਚੀਫ ਆਫ ਸਟਾਫ ਮਾਰਕ ਆਂਦਰੇ ਲੈਕਲਰਕ ਤੇ ਕਮਿਊਨਿਕੇਸ਼ਨਜ਼ ਡਾਇਰੈਕਟਰ ਬਰੌਕ ਹੈਰੀਸਨ ਨੂੰ ਫੌਰਨ ਉਨ੍ਹਾਂ ਦੀਆਂ ਡਿਊਟੀਜ਼ ਤੋਂ ਹਟਾਇਆ ਜਾਂਦਾ ਹੈ। ਇਨ੍ਹਾਂ ਦੋਵਾਂ ਦੇ ਫੁੱਲ ਟਾਈਮ ਬਦਲ ਮਿਲਣ ਤੱਕ ਮਾਰਟਿਨ ਬੇਲੈਂਗਰ ਤੇ ਸਾਇਮਨ ਜੈਫਰੀਜ਼ ਅੰਤਰਿਮ ਤੌਰ ਉੱਤੇ ਇਹ ਅਹੁਦੇ ਪੁਰ ਕਰਨਗੇ।
ਆਪਣੇ ਪੱਤਰ ਵਿੱਚ ਸ਼ੀਅਰ ਨੇ ਇਨ੍ਹਾਂ ਦੋਵਾਂ ਨੂੰ ਹਟਾਏ ਜਾਣ ਦੇ ਕਾਰਨਾਂ ਦਾ ਖੁਲਾਸਾ ਨਹੀਂ ਕੀਤਾ। ਸ਼ੀਅਰ ਨੇ ਬੱਸ ਐਨਾ ਹੀ ਆਖਿਆ ਕਿ ਲਿਬਰਲਾਂ ਦੀ ਅਗਵਾਈ ਵਾਲੀ ਘੱਟ ਗਿਣਤੀ ਪਾਰਲੀਆਮੈਂਟ ਵਿੱਚ ਸਰਗਰਮ ਭੂਮਿਕਾ ਨਿਭਾਉਣ ਲਈ ਪਾਰਟੀ ਤਿਆਰੀ ਕਰ ਰਹੀ ਹੈ ਇਸ ਲਈ ਹੀ ਇਹ ਤਬਦੀਲੀਆਂ ਕੀਤੀਆਂ ਗਈਆਂ ਹਨ। ਪੱਤਰ ਵਿੱਚ ਆਖਿਆ ਗਿਆ ਹੈ ਕਿ ਸਾਡੇ ਕੋਲ ਕਰਨ ਲਈ ਬਹੁਤ ਹੀ ਅਹਿਮ ਕੰਮ ਹੈ। ਅਸੀਂ ਜਸਟਿਨ ਟਰੂਡੋ ਦੀ ਅਗਵਾਈ ਵਾਲੀ ਭ੍ਰਿਸ਼ਟ ਲਿਬਰਲ ਸਰਕਾਰ ਨੂੰ ਜਵਾਬਦੇਹ ਠਹਿਰਾਉਣਾ ਹੈ, ਅਤੇ ਜਦੋਂ ਅਸੀਂ ਇਹ ਕੰਮ ਸਹੀ ਢੰਗ ਨਾਲ ਕਰ ਲਿਆ ਤਾਂ ਅਸੀਂ ਅਗਲੀਆਂ ਚੋਣਾਂ ਵਿੱਚ ਟਰੂਡੋ ਨੂੰ ਬਾਹਰ ਦਾ ਰਸਤਾ ਦਿਖਾਉਣ ਲਈ ਤਿਆਰ ਹੋਵਾਂਗੇ।
ਇਹ ਤਬਦੀਲੀਆਂ ਉਸ ਸਮੇਂ ਆਈਆਂ ਹਨ ਜਦੋਂ 21 ਅਕਤੂਬਰ ਨੂੰ ਹੋਈਆਂ ਚੋਣਾਂ ਦੇ ਨਤੀਜਿਆਂ ਬਾਰੇ ਪਾਰਟੀ ਤੇ ਸ਼ੀਅਰ ਨੂੰ ਸਖ਼ਤ ਸਵਾਲਾਂ ਦੇ ਜਵਾਬ ਦੇਣੇ ਪੈ ਰਹੇ ਹਨ। ਐਸਐਨਸੀ-ਲਾਵਾਲਿਨ ਮਾਮਲੇ ਤੇ ਬਲੈਕਫੇਸ ਮਾਮਲੇ ਤੋਂ ਬਾਅਦ ਜਸਟਿਨ ਟਰੂਡੋ ਦੇ ਮੁੜ ਪ੍ਰਧਾਨ ਮੰਤਰੀ ਚੁਣੇ ਜਾਣ ਦੀਆਂ ਸੰਭਾਵਨਾਵਾਂ ਮੱਠੀਆਂ ਪੈ ਜਾਣ ਉੱਤੇ ਸ਼ੀਅਰ ਨੂੰ ਹੀ ਸੰਭਾਵੀ ਪ੍ਰਧਾਨ ਮੰਤਰੀ ਵਜੋਂ ਵੇਖਿਆ ਜਾ ਰਿਹਾ ਸੀ। ਪਰ ਸਰਵੇਖਣਾਂ ਤੋਂ ਲਗਾਤਾਰ ਇਹ ਪਤਾ ਲੱਗਦਾ ਰਿਹਾ ਕਿ ਸ਼ੀਅਰ ਠੋਸ ਆਧਾਰ ਕਾਇਮ ਕਰਨ ਵਿੱਚ ਸਫਲ ਨਹੀਂ ਹੋਏ। ਲਿਬਰਲਾਂ ਤੇ ਕੰਜ਼ਰਵੇਟਿਵਾਂ ਵਿਚਾਲੇ ਕੈਂਪੇਨ ਦੌਰਾਨ ਵੀ ਫਸਵਾਂ ਮੁਕਾਬਲਾ ਹੋਇਆ।
ਡਿਸਮਿਸ ਕੀਤੇ ਗਏ ਦੋਵਾਂ ਸਟਾਫਰਜ਼ ਨੇ ਫੇਸਬੁੱਕ ਉੱਤੇ ਪੋਸਟਸ ਪਾ ਕੇ ਇਨ੍ਹਾਂ ਤਬਦੀਲੀਆਂ ਬਾਰੇ ਜਾਣਕਾਰੀ ਦਿੱਤੀ ਤੇ ਕਈ ਸਾਲਾਂ ਤੱਕ ਸਮਰਥਨ ਦੇਣ ਲਈ ਸ਼ੀਅਰ ਦਾ ਸ਼ੁਕਰੀਆ ਵੀ ਅਦਾ ਕੀਤਾ। ਇਸ ਦੌਰਾਨ ਲੈਕਲਰਕ ਨੇ ਇਹ ਵੀ ਲਿਖਿਆ ਕਿ ਹੁਣ ਉਹ ਸਿਆਸਤ ਤੋਂ ਸੰਨਿਆਸ ਲੈਣ ਜਾ ਰਿਹਾ ਹੈ।