ਰਾਣੀ ਮੁਖਰਜੀ ਦੀ ਫਿਲਮ ‘ਮਰਦਾਨੀ 2’ ਦੇ ਡਾਇਰੈਕਟਰ ਗੋਪੀ ਪੁਥਰਨ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਫਿਲਮ ਅਸਲ ਜ਼ਿੰਦਗੀ ਤੋਂ ਪ੍ਰੇਰਤ ਹੈ, ਕਿਉਂਕਿ ਅਖਬਾਰ ਵਿੱਚ ਛਪਣ ਵਾਲੀਆਂ ਕੁਝ ਭਿਆਨਕ ਕਰਾਈਮ ਦੀਆਂ ਖਬਰਾਂ ਨੂੰ ਲੋਕ ਭੁੱਲ ਨਹੀਂ ਪਾਉਂਦੇ। ਉਹ ਕਹਿੰਦੇ ਹਨ, ‘‘ਮੇਰੀ ਫਿਲਮ ਦੇਸ਼ ਭਰ ਵਿੱਚ ਹੋਈਆਂ ਅਜਿਹੀਆਂ ਘਟਨਾਵਾਂ 'ਤੇ ਆਧਾਰਤ ਹੈ, ਜਿਨ੍ਹਾਂ ਵਿੱਚ ਅੱਲ੍ਹੜ ਸ਼ਾਮਲ ਰਹੇ ਹਨ। ‘ਮਰਦਾਨੀ 2’ ਅੱਲ੍ਹੜਾਂ ਦੇ ਅਪਰਾਧਾਂ 'ਤੇ ਬਣੀ ਹੈ।” ਉਹ ਕਹਿੰਦੇ ਹਨ ਕਿ ਘੱਟ ਉਮਰ ਦੇ ਲੜਕੇ ਅਜਿਹੀਆਂ ਵਾਰਦਾਤਾਂ ਕਰਦੇ ਹਨ, ਜੋ ਬਹੁਤ ਖਤਰਨਾਕ ਸਾਬਤ ਹੁੰਦੀਆਂ ਹਨ। ਤੁਸੀਂ ਇਨ੍ਹਾਂ ਨੂੰ ਕਿਵੇਂ ਪਛਾਣੋਗੇ? ਹੋ ਸਕਦਾ ਹੈ ਕਿ ਉਹ ਤੁਹਾਡੇ ਨਾਲ ਚੱਲ ਰਹੇ ਹੋਣ, ਗੱਲ ਕਰ ਰਹੇ ਹੋਣ ਜਾਂ ਤੁਹਾਡੇ ਗੁਆਂਢ ਵਿੱਚ ਰਹਿ ਰਹੇ ਹੋਣ। ‘ਮਰਦਾਨੀ 2’ ਅਜਿਹੇ ਹੀ ਸਮਾਜਕ ਮੁੱਦਿਆਂ ਨੂੰ ਉਠਾਏਗੀ ਅਤੇ ਲੋਕਾਂ ਨੂੰ ਸੁਚੇਤ ਕਰੇਗੀ।
ਫਿਲਮ ਵਿੱਚ ਰਾਣੀ ਮੁਖਰਜੀ ਇੱਕ ਨਿਡਰ ਪੁਲਸ ਅਫਸਰ ਸ਼ਿਵਾਨੀ ਸ਼ਿਵਾਜੀ ਰਾਏ ਦੀ ਭੂਮਿਕਾ ਵਿੱਚ ਆਵੇਗੀ। ਸੁੂਤਰਾਂ ਦੀ ਮੰਨੀਏ ਤਾਂ ਦੋ ਸਾਲ ਪਹਿਲਾਂ ਯਮੁਨਾ ਐਕਸਪ੍ਰੈਸ ਵੇਅ ਉੱਤੇ ਚਾਰ ਔਰਤਾਂ ਦੇ ਨਾਲ ਹੋਏ ਬਲਾਤਕਾਰ ਕਾਂਡ ਤੋਂ ਇਹ ਫਿਲਮ ਪ੍ਰੇਰਿਤ ਹੈ। ਫਿਲਮ ਦੇ ਟ੍ਰੇਲਰ ਵਿੱਚ ਵੀ ਅਜਿਹੀ ਇੱਕ ਘਟਨਾ ਨੂੰ ਦਿਖਾਇਆ ਗਿਆ ਹੈ। ਆਦਿੱਤਯ ਚੋਪੜਾ ਦੇ ਨਿਰਮਾਣ ਵਾਲੀ ‘ਮਰਦਾਨੀ 2’ 13 ਦਸੰਬਰ ਨੂੰ ਰਿਲੀਜ਼ ਹੋਵੇਗੀ।