ਟੋਰਾਂਟੋ, 21 ਨਵੰਬਰ (ਪੋਸਟ ਬਿਊਰੋ) : ਟੋਰਾਂਟੋ ਸਿਟੀ ਕਾਉਂਸਲ ਵੱਲੋਂ ਉਸ ਟਰਾਂਜਿ਼ਟ ਪ੍ਰੋਜੈਕਟ ਦੇ ਪੱਖ ਵਿੱਚ ਵੋਟ ਕੀਤਾ ਗਿਆ ਹੈ ਜਿਸ ਵਿੱਚ ਵੱਡਾ ਪ੍ਰਸਤਾਵ ਰੱਖਿਆ ਗਿਆ ਹੈ ਤੇ ਇਸ ਨੂੰ ਓਨਟਾਰੀਓ ਸਰਕਾਰ ਵੱਲੋਂ ਅੰਸ਼ਕ ਤੌਰ ਉੱਤੇ ਫੰਡ ਕੀਤਾ ਜਾਵੇਗਾ।
ਇਸ ਸਾਂਝੀ ਯੋਜਨਾ ਦੇ ਪੱਖ ਵਿੱਚ 3 ਦੇ ਮੁਕਾਬਲੇ 22 ਕਾਉਂਸਲਰਜ਼ ਵੱਲੋਂ ਵੋਟ ਕੀਤਾ ਗਿਆ। ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਇਸ ਪ੍ਰੋਜੈਕਟ ਦਾ ਐਲਾਨ ਪ੍ਰੋਵਿੰਸ਼ੀਅਲ ਸਰਕਾਰ ਵੱਲੋਂ ਕੀਤਾ ਗਿਆ ਸੀ। ਇਸ ਤੋਂ ਪਹਿਲਾਂ ਸਿਟੀ ਦੇ ਟਰਾਂਜਿ਼ਟ ਸਿਸਟਮ ਦਾ ਨਿਯੰਤਰਣ ਲੈਣ ਤੋਂ ਪ੍ਰੋਵਿੰਸ਼ੀਅਲ ਸਰਕਾਰ ਪਹਿਲਾਂ ਮੁਕਰ ਗਈ ਸੀ। ਡੱਗ ਫੋਰਡ ਦੀ ਅਗਵਾਈ ਵਾਲੀ ਸਰਕਾਰ ਵੱਲੋਂ ਆਪਣੇ ਪਹਿਲੇ ਫੈਸਲੇ ਤੋਂ ਪਲਟੀ ਮਾਰਦਿਆਂ ਹੋਇਆਂ ਇਸ ਡੀਲ ਲਈ ਹਾਮੀ ਭਰੀ ਗਈ ਹੈ।
ਕਾਉਂਸਲ ਵੱਲੋਂ ਮਨਜ਼ੂਰ ਕੀਤੀ ਗਈ ਇਸ ਯੋਜਨਾ ਵਿੱਚ ਫੋਰਡ ਸਰਕਾਰ ਦੇ ਟਰਾਂਜਿ਼ਟ ਵਿਜ਼ਨ ਦੇ ਕਈ ਹੋਰ ਪੱਖ ਵੀ ਸ਼ਾਮਲ ਹਨ ਜਿਵੇਂ ਕਿ ਸਬਵੇਅ ਐਕਸਟੈਂਸ਼ਨ, ਜਿਸ ਨੂੰ ਓਨਟਾਰੀਓ ਲਾਈਨ ਵੀ ਆਖਿਆ ਜਾਂਦਾ ਹੈ, ਇਸ ਦੇ ਨਾਲ ਹੀ ਤਿੰਨ ਵਾਧੂ ਸਟੇਸ਼ਨਾਂ ਦੀ ਯੋਜਨਾ ਵੀ ਹੈ ਜਿਹੜੇ ਸਬਵੇਅ ਸਰਵਿਸ ਨੂੰ ਸ਼ਹਿਰ ਦੇ ਪੂਰਬੀ ਸਬਅਰਬਸ ਤੱਕ ਲਿਆਉਣਗੇ।
ਟੋਰਾਂਟੋ ਦੇ ਮੇਅਰ ਜੌਹਨ ਟੋਰੀ ਨੇ ਇਸ ਅਪਣਾਈ ਗਈ ਨਵੀਂ ਡੀਲ ਨੂੰ ਸਿਟੀ ਲਈ ਚੰਗਾ ਦੱਸਿਆ ਹੈ। ਉਨ੍ਹਾਂ ਕਾਉਂਸਲ ਦੀ ਵੋਟ ਤੋਂ ਬਾਅਦ ਟਵਿੱਟਰ ਉੱਤੇ ਇਸ ਸਬੰਧ ਵਿੱਚ ਪੋਸਟ ਵੀ ਸੇ਼ਅਰ ਕੀਤੀ। ਓਨਟਾਰੀਓ ਦੇ ਟਰਾਂਸਪੋਰਟੇਸ਼ਨ ਮੰਤਰੀ ਕੈਰੋਲੀਨ ਮਲਰੋਨੀ ਤੇ ਫੋਰਡ ਨੇ ਕਾਉਂਸਲ ਵੱਲੋਂ ਇਸ ਪਲੈਨ ਨੂੰ ਅਪਨਾ ਲਏ ਜਾਣ ਉੱਤੇ ਖੁਸ਼ੀ ਦਾ ਪ੍ਰਗਟਾਵਾ ਕੀਤਾ। ਫੋਰਡ ਨੇ ਇੱਕ ਬਿਆਨ ਵਿੱਚ ਆਖਿਆ ਕਿ ਸਬਵੇਅ ਪ੍ਰੋਜੈਕਟਸ ਨੂੰ ਤਰਜੀਹ ਦੇਣ ਨਾਲ ਗ੍ਰੇਟਰ ਟੋਰਾਂਟੋ-ਹੈਮਿਲਟਨ ਏਰੀਆ ਵਿੱਚ ਨੈੱਟਵਰਕ ਵਿੱਚ ਸੁਧਾਰ ਹੋਵੇਗਾ ਤੇ ਭੀੜ ਭਾੜ ਤੋਂ ਵੀ ਰਾਹਤ ਮਿਲੇਗੀ।
ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਸਰਕਾਰ ਵੱਲੋਂ ਐਲਾਨੀ ਗਈ 28.5 ਬਿਲੀਅਨ ਡਾਲਰ ਦੀ ਯੋਜਨਾ ਦਾ ਹੀ ਇਹ ਸਾਰੇ ਪ੍ਰੋਜੈਕਟ ਹਿੱਸਾ ਹਨ। ਸਰਕਾਰ ਦਾ ਕਹਿਣਾ ਹੈ ਕਿ ਇਸ ਨਾਲ ਉਮਰ ਵਿਹਾਅ ਚੁੱਕੇ ਪ੍ਰੋਵਿੰਸ ਦੇ ਪਬਲਿਕ ਟਰਾਂਜਿ਼ਟ ਸਿਸਟਮ ਵਿੱਚ ਜਾਣ ਪੈ ਜਾਵੇਗੀ।