ਰਿਚਮੰਡ ਹਿੱਲ, 21 ਨਵੰਬਰ (ਪੋਸਟ ਬਿਊਰੋ) : ਵੀਰਵਾਰ ਸਵੇਰੇ ਰਿਚਮੰਡ ਹਿੱਲ ਦੀਆਂ ਟਰੈਫਿਕ ਲਾਈਟ ਪੋਲਜ਼ ਤੇ ਪਾਰਕ ਕੀਤੀਆਂ ਕਾਰਾਂ ਵਿੱਚ ਜਾਣਬੁੱਝ ਕੇ ਗੱਡੀ ਮਾਰਨ ਵਾਲੇ 22 ਸਾਲਾ ਵਿਅਕਤੀ ਨੂੰ ਪੁਲਿਸ ਨੇ ਹਿਰਾਸਤ ਵਿੱਚ ਲੈ ਲਿਆ।
ਇਹ ਘਟਨਾ ਮੇਜਰ ਮੈਕੈਂਜ਼ੀ ਡਰਾਈਵ ਤੇ ਸੈਂਟਰ ਸਟਰੀਟ ਦਰਮਿਆਨ ਯੰਗ ਸਟਰੀਟ ਉੱਤੇ ਤੜ੍ਹਕੇ 2:00 ਵਜੇ ਵਾਪਰੀ। ਪੁਲਿਸ ਨੇ ਦੱਸਿਆ ਕਿ 22 ਸਾਲਾ ਮਸ਼ਕੂਕ ਯੰਗ ਸਟਰੀਟ ਉੱਤੇ ਸ਼ੈਵਰਲੇ ਪਿੱਕਅੱਪ ਟਰੱਕ ਚਲਾ ਰਿਹਾ ਸੀ ਜਦੋਂ ਉਸ ਨੇ ਜਾਣਬੁੱਝ ਕੇ ਆਪਣੀ ਗੱਡੀ ਉੱਥੇ ਪਾਰਕ ਕੀਤੀਆਂ ਗਈਆਂ ਪੰਜ ਗੱਡੀਆਂ ਵਿੱਚ ਦ੍ਹੇ ਮਾਰੀ। ਉਸ ਨੇ ਇਲਾਕੇ ਦੇ ਕਈ ਬੱਸ ਸ਼ੈਲਟਰਜ਼ ਤੇ ਟਰੈਫਿਕ ਪੋਲਜ ਨਾਲ ਵੀ ਗੱਡੀ ਟਕਰਾਈ।
ਫਿਰ ਉਹ ਵਿਅਕਤੀ ਆਪਣੀ ਬੁਰੀ ਤਰ੍ਹਾਂ ਤਬਾਹ ਹੋਈ ਤੇ ਧੁਖਦੀ ਹੋਈ ਗੱਡੀ ਨੂੰ ਛੱਡ ਕੇ ਭੱਜ ਗਿਆ। ਉਸ ਨੂੰ ਕੁੱਝ ਸਮੇਂ ਬਾਅਦ ਪੁਲਿਸ ਅਧਿਕਾਰੀਆਂ ਨੇ ਵੇਖ ਲਿਆ ਤੇ ਫਿਰ ਗ੍ਰਿਫਤਾਰ ਵੀ ਕਰ ਲਿਆ। ਉਸ ਖਿਲਾਫ ਕਈ ਚਾਰਜਿਜ਼ ਲਾਏ ਜਾਣਗੇ। ਹਾਦਸੇ ਤੋਂ ਬਾਅਦ ਉੱਥੇ ਨਾ ਰੁਕਣ ਲਈ ਵੀ ਉਸ ਖਿਲਾਫ ਕਾਰਵਾਈ ਕੀਤੀ ਜਾਵੇਗੀ।