ਅਕਸ਼ੈ ਕੁਮਾਰ ਅਤੇ ਕਰੀਨਾ ਕਪੂਰ ਖਾਨ ਦੇ ਫੈਨਸ ਦੇ ਲਈ ਚੰਗੀ ਖਬਰ ਹੈ। ‘ਗੱਬਰ ਇਜ਼ ਬੈਕ’, ‘ਇਤਰਾਜ਼’, ‘ਅਜਨਬੀ’, ‘ਟਸ਼ਨ’ ਵਰਗੀਆਂ ਕਈ ਫਿਲਮਾਂ ਇਕੱਠੇ ਕਰ ਚੁੱਕੇ ਅਕਸ਼ੈ ਅਤੇ ਕਰੀਨਾ ਦੀ ਜੋੜੀ ‘ਗੁੱਡ ਨਿਊਜ਼’ ਵਿੱਚ ਨਜ਼ਰ ਆਏਗੀ। ਮੁੰਬਈ ਵਿੱਚ ਫਿਲਮ ਦੇ ਟ੍ਰੇਲਰ ਲਾਂਚ ਮੌਕੇ ਨਿਰਮਾਤਾ ਕਰਣ ਜੌਹਰ ਤੇ ਸ਼ਸ਼ਾਂਕ ਖੇਤਾਨ ਦੇ ਨਾਲ ਫਿਲਮ ਦੀ ਪੂਰੀ ਸਟਾਰਕਾਸਟ ਮੌਜੂਦ ਸੀ। ‘ਲਛਮੀ ਬੰਬ’, ‘ਬੱਚਨ ਪਾਂਡੇ’ ਅਤੇ ‘ਪ੍ਰਿਥਵੀਰਾਜ ਚੌਹਾਨ’ ਫਿਲਮਾਂ ਦੀ ਸ਼ੂਟਿੰਗ ਵਿੱਚ ਬਿਜ਼ੀ ਅਕਸ਼ੈ ਕੁਮਾਰ ਦੀ ਫਿਲਮ ‘ਗੁੱਡ ਨਿਊਜ਼’ ਇਸ ਸਾਲ ਰਿਲੀਜ਼ ਹੋਣ ਵਾਲੀ ਚੌਥੀ ਫਿਲਮ ਹੋਵੇਗੀ। ਅਕਸ਼ੈ ਦਾ ਕਹਿਣਾ ਹੈ ਕਿ ‘ਗੁੱਡ ਨਿਊਜ਼’ ਫਿਲਮ ਲਈ ਹਾਂ ਕਹਿਣ ਵਿੱਚ ਉਨ੍ਹਾਂ ਨੂੰ ਸਿਰਫ ਇੱਕ ਦੋ ਮਿੰਟ ਲੱਗੇ।
ਅਕਸ਼ੈ ਨੇ ਦੱਸਿਆ ਕਿ ਕਰਣ ਜੌਹਰ ਉਨ੍ਹਾਂ ਦੇ ਕੋਲ ਇੱਕ ਵੱਡੀ ਫਿਲਮ ਦੀ ਸਕ੍ਰਿਪਟ ਲੈ ਕੇ ਆਏ ਸਨ। ਉਨ੍ਹਾਂ ਨੇ ਡੇਢ ਘੰਟੇ ਤੱਕ ਫਿਲਮ ਦੀ ਕਹਾਣੀ ਸੁਣਾਈ। ਕਹਾਣੀ ਪਸੰਦ ਆਉਣ ਦੇ ਬਾਅਦ ਅਕਸ਼ੈ ਨੇ ਉਨ੍ਹਾਂ ਤੋਂ ਪੁੱਛਿਆ ਕਿ ਉਹ ਹੋਰ ਕਿਹੜੀ-ਕਿਹੜੀ ਫਿਲਮ ਬਣਾ ਰਹੇ ਹਨ। ਕਰਣ ਨੇ ਦੱਸਿਆ ਕਿ ਉਹ ‘ਗੁੱਡ ਨਿਊਜ਼’ ਨਾਂਅ ਦੀ ਛੋਟੀ ਫਿਲਮ ਬਣਾ ਰਹੇ ਹਨ। ਕਰਣ ਨੇ ਅਕਸ਼ੈ ਨੂੰ ਕਹਾਣੀ ਦਾ ਕੰਸੈਪਟ ਦੋ ਮਿੰਟ ਵਿੱਚ ਸੁਣਾਇਆ। ਅਕਸ਼ੈ ਨੇ ਉਸ ਨੂੰ ਕਿਹਾ ਕਿ ਉਹ ਡੇਢ ਘੰਟੇ ਨਰੇਸ਼ਨ ਵਾਲੀ ਫਿਲਮ ਦੇ ਬਜਾਏ ਇਹ ਸੰਖੇਪ ਆਈਡੀਏ ਵਾਲੀ ਫਿਲਮ ਕਰਨਾ ਚਾਹੁਣਗੇ।
ਲਗਾਤਾਰ ਹਿੱਟ ਫਿਲਮਾਂ ਦੇਣ ਵਾਲੇ ਅਕਸ਼ੈ ਆਪਣੇ ਕਰੀਅਰ ਵਿੱਚ ਲੇਖਕਾਂ ਦਾ ਯੋਗਦਾਨ ਮੰਨਦੇ ਹਨ। ਉਨ੍ਹਾਂ ਦੇ ਮੁਤਾਬਕ, ‘‘ਡਾਇਰੈਕਟਰ ਤੋਂ ਵੱਡਾ ਲੇਖਕ ਹੁੰਦਾ ਹੈ। ਜੇ ਕਹਾਣੀ ਸਹੀ ਨਾ ਹੋਵੇ ਤਾਂ ਕਲਾਕਾਰ ਕੁਝ ਨਹੀਂ ਕਰ ਸਕਦਾ ਹੈ।” ਕਰਣ ਇਸ ਫਿਲਮ ਦੇ ਨਾਲ 16ਵੇਂ ਨਵੇਂ ਡਾਇਰੈਕਟਰ ਨੂੰ ਲਾਂਚ ਕਰਨਗੇ। ਇਸ ਫਿਲਮ ਦੇ ਨਾਲ ਸ਼ਸ਼ਾਂਕ ਖੇਤਾਨ ਨਿਰਮਾਣ ਖੇਤਰ ਵਿੱਚ ਕਦਮ ਰੱਖਣਗੇ। ਸ਼ਸ਼ਾਂਕ ਦੀ ਟੀਮ ਨਾਲ ਰਾਜ ਮਹਿਤਾ ਪਹਿਲੀ ਵਾਰ ਫਿਲਮ ਨਿਰਦੇਸ਼ਨ ਵਿੱਚ ਉਤਰੇ ਹਨ। ‘ਗੁੱਡ ਨਿਊਜ਼’ 27 ਦਸੰਬਰ ਨੂੰ ਰਿਲੀਜ਼ ਹੋਵੇਗੀ।