ਸੈਂਟਾ ਕਲੈਰਿਟਾ,ਕੈਲੇਫੋਰਨੀਆ, 14 ਨਵੰਬਰ (ਪੋਸਟ ਬਿਊਰੋ) : ਵੀਰਵਾਰ ਨੂੰ ਦੱਖਣੀ ਕੈਲੇਫੋਰਨੀਆ ਦੇ ਹਾਈ ਸਕੂਲ ਵਿੱਚ ਇੱਕ ਵਿਦਿਆਰਥੀ ਨੇ ਆਪਣੇ ਬੈਕਪੈਕ ਵਿੱਚੋਂ ਗੰਨ ਕੱਢੀ ਤੇ ਗੋਲੀਆਂ ਚਲਾ ਕੇ ਦੋ ਵਿਦਿਆਰਥੀਆਂ ਨੂੰ ਮਾਰ ਮੁਕਾਇਆ ਜਦਕਿ ਤਿੰਨ ਹੋਰਨਾਂ ਨੂੰ ਜ਼ਖ਼ਮੀ ਕਰ ਦਿੱਤਾ। ਫਿਰ ਉਸ ਨੇ ਖੁਦ ਨੂੰ ਵੀ ਗੋਲੀ ਮਾਰ ਲਈ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਕਾਰੇ ਨੂੰ ਅੰਜਾਮ ਦੇਣ ਵਾਲੇ ਵਿਦਿਆਰਥੀ ਦਾ ਉਸ ਦਿਨ 16ਵਾਂ ਜਨਮਦਿਨ ਸੀ।
ਇਹ ਗੋਲੀਕਾਂਡ ਵੀਰਵਾਰ ਸਵੇਰੇ 7:30 ਵਜੇ ਕੈਲੇਫੋਰਨੀਆ ਦੇ ਸਬਅਰਬਨ ਸੈਂਟਾ ਕਲੈਰਿਟਾ ਦੇ ਸਾਗਸ ਹਾਈ ਸਕੂਲ ਵਿੱਚ ਸ਼ੁਰੂ ਹੋਇਆ। ਲਾਸ ਏਂਜਲਸ ਕਾਊਂਟੀ ਸ਼ੈਰਿਫ ਦੇ ਡਿਪਟੀਜ਼ ਨੂੰ 911 ਤੋਂ ਕਈ ਕਾਲਜ਼ ਆਈਆਂ ਤੇ ਮੌਕੇ ਉੱਤੇ ਪਹੁੰਚੇ ਪੁਲਿਸ ਅਧਿਕਾਰੀਆਂ ਨੇ ਛੇ ਦੇ ਛੇ ਵਿਦਿਆਰਥੀਆਂ ਨੂੰ ਵੱਖਰੀ ਥਾਂ ਉੱਤੇ ਮੌਜੂਦ ਪਾਇਆ। ਸੈ਼ਰਿਫ ਦੇ ਹੋਮੀਸਾਈਡ ਅਧਿਕਾਰੀ ਕੈਂਟ ਵੈਗੇਨਰ ਨੇ ਆਖਿਆ ਕਿ ਸਕਿਊਰਿਟੀ ਵੀਡੀਓ ਤੋਂ ਸਾਹਮਣੇ ਆਇਆ ਹੈ ਕਿ ਹਮਲਾਵਰ ਨੇ .45 ਕੈਲੀਬਰ ਦੀ ਹੈਂਡਗੰਨ ਨਾਲ ਆਖਰੀ ਗੋਲੀ ਖੁਦ ਨੂੰ ਮਾਰੀ।
ਇਸ ਘਟਨਾਕ੍ਰਮ ਵਿੱਚ 16 ਸਾਲਾ ਲੜਕੀ ਤੇ 14 ਸਾਲਾ ਲੜਕੇ ਦੀ ਮੌਤ ਹੋ ਗਈ। ਦੋ ਹੋਰ ਲੜਕੀਆਂ, ਜਿਨ੍ਹਾਂ ਦੀ ਉਮਰ 14 ਤੇ 15 ਸਾਲ ਹੈ ਤੇ 14 ਸਾਲਾ ਇੱਕ ਹੋਰ ਲੜਕੇ ਨੂੰ ਇਲਾਜ ਲਈ ਹਸਪਤਾਲ ਦਾਖਲ ਕਰਵਾਇਆ ਗਿਆ। ਇਹ ਜਾਣਕਾਰੀ ਅਧਿਕਾਰੀਆਂ ਨੇ ਦਿੱਤੀ। ਸ਼ੈਰਿਫ ਐਲੈਕਸ ਵਿੱਲਾਨੁਏਵਾ ਨੇ ਦੱਸਿਆ ਕਿ ਹਮਲਾਵਰ ਇਸੇ ਸਕੂਲ ਦਾ ਵਿਦਿਆਰਥੀ ਸੀ ਪਰ ਉਨ੍ਹਾਂ ਉਸ ਦੀ ਪਛਾਣ ਜਾਹਰ ਨਹੀਂ ਕੀਤੀ। ਉਸ ਦੇ ਘਰ ਦੀ ਤਲਾਸ਼ੀ ਲਈ ਸਰਚ ਵਾਰੰਟ ਵੀ ਹਾਸਲ ਕਰ ਲਿਆ ਗਿਆ ਹੈ।
ਐਫਬੀਆਈ ਦੇ ਲਾਸ ਏਂਜਲਸ ਫੀਲਡ ਆਫਿਸ ਦੇ ਇੰਚਾਰਜ ਏਜੰਟ ਪਾਲ ਡੈਲਾਕੋਰਟ ਨੇ ਆਖਿਆ ਕਿ ਇਸ ਸਮੇਂ ਸਾਨੂੰ ਇਸ ਮਾਮਲੇ ਪਿੱਛੇ ਲੁਕੇ ਮੰਤਵ ਜਾਂ ਵਿਚਾਰਾਂ ਬਾਰੇ ਕੋਈ ਜਾਣਕਾਰੀ ਨਹੀਂ ਹੈ। ਗੋਲੀਆਂ ਦੀ ਆਵਾਜ਼ ਸੁਣ ਕੇ ਕੁੱਝ ਵਿਦਿਆਰਥੀਆਂ ਨੇ ਤਾਂ ਇੱਧਰ ਉੱਧਰ ਭੱਜਣਾ ਸ਼ੁਰੂ ਕਰ ਦਿੱਤਾ ਜਦਕਿ ਬਾਕੀਆਂ ਨੇ ਤੇ ਸਕੂਲ ਦੇ ਸਟਾਫ ਨੇ ਪਿੱਛੇ ਜਿਹੇ ਪ੍ਰੈਕਟਿਸ ਕੀਤੇ ਸਕਿਊਰਿਟੀ ਪ੍ਰੋਸੀਜ਼ਰ ਅਨੁਸਾਰ ਹੀ ਕੰਮ ਕੀਤਾ।