ਨਵੀਂ ਦਿੱਲੀ, 14 ਨਵੰਬਰ (ਪੋਸਟ ਬਿਊਰੋ)- ਸੁਪਰੀਮ ਕੋਰਟ ਨੇ ਕਰਨਾਟਕ ਦੇ 17 ਵਿਧਾਇਕਾਂ ਨੂੰ ਅਯੋਗ ਐਲਾਨਣ ਦੇ ਉਸ ਵਕਤ ਦੇ ਵਿਧਾਨ ਸਭਾ ਸਪੀਕਰ ਕੇ ਆਰ ਰਮੇਸ਼ ਕੁਮਾਰ ਦੇ ਹੁਕਮ ਨੂੰ ਕੱਲ੍ਹ ਸਹੀ ਠਹਿਰਾਇਆ, ਪਰ ਇਸ ਰਾਜ 'ਚ 15 ਸੀਟਾਂ 'ਤੇ ਪੰਜ ਦਸੰਬਰ ਨੂੰ ਹੋ ਰਹੀਆਂ ਉੱਪ ਚੋਣਾਂ 'ਚ ਹਿੱਸਾ ਲੈਣ ਦਾ ਉਨ੍ਹਾਂ ਦਾ ਰਾਹ ਸਾਫ ਕਰ ਦਿੱਤਾ।
ਜਸਟਿਸ ਐੱਨ ਵੀ ਰਮੰਨਾ, ਜਸਟਿਸ ਸੰਜੀਵ ਖੰਨਾ ਤੇ ਜਸਟਿਸ ਕ੍ਰਿਸ਼ਨ ਮੁਰਾਰੀ ਦੇ ਇੱਕ ਬੈਂਚ ਨੇ ਵਿਧਾਨ ਸਭਾ ਦੇ ਸਾਬਕਾ ਸਪੀਕਰ ਕੇ ਆਰ ਰਮੇਸ਼ ਕੁਮਾਰ ਦੇ ਹੁਕਮ ਦਾ ਉਹ ਹਿੱਸਾ ਰੱਦ ਕਰ ਦਿੱਤਾ ਜਿਸ 'ਚ ਇਨ੍ਹਾਂ ਵਿਧਾਇਕਾਂ ਨੂੰ 15ਵੀਂ ਵਿਧਾਨ ਸਭਾ ਦੇ ਕਾਰਜਕਾਲ ਦੇ ਅੰਤ ਸਾਲ 2023 ਲਈ ਚੋਣ ਲੜਨ ਦੇ ਅਯੋਗ ਐਲਾਨ ਦਿੱਤਾ ਗਿਆ ਸੀ। ਬੈਂਚ ਨੇ ਆਪਣੇ ਫੈਸਲੇ ਵਿੱਚ ਕਿਹਾ ਕਿ ਅਸੀਂ ਅਯੋਗਤਾ ਬਾਰੇ ਸਪੀਕਰ ਦੇ ਹੁਕਮ ਨੂੰ ਸਹੀ ਮੰਨ ਰਹੇ ਹਨ, ਪਰ ਅਸੀਂ ਹੁਕਮ ਦੇ ਦੁੂਜਾ ਹਿੱਸਾ ਰੱਦ ਕੀਤਾ ਹੈ ਜਿਸ ਵਿੱਚ ਕਿਹਾ ਗਿਆ ਸੀ ਕਿ ਇਹ ਅਯੋਗਤਾ ਮੌਜੂਦਾ ਇਸ ਸਮੇਂ ਵਾਲੀ ਵਿਧਾਨ ਸਭਾ ਦੇ ਕਾਰਜਕਾਲ ਦੇ ਅੰਤ ਤੱਕ ਹੈ। ਅਦਾਲਤ ਨੇ ਕਿਹਾ ਹੈ ਕਿ ਜੇ ਉਹ ਉੱਪ ਚੋਣਾਂ 'ਚ ਚੁਣੇ ਜਾਂਦੇ ਹਨ ਤਾਂ ਅਯੋਗ ਕਰਾਰ ਦਿੱਤੇ ਇਹ ਵਿਧਾਇਕ ਮੰਤਰੀ ਬਣ ਸਕਦੇ ਹਨ ਜਾਂ ਜਨਤਕ ਅਹੁਦਾ ਗ੍ਰਹਿਣ ਕਰ ਸਕਦੇ ਹਨ। ਸੁਪਰੀਮ ਕੋਰਟ ਨੇ ਇਹ ਵੀ ਕਿਹਾ ਕਿ ਇਹ ਸਾਫ ਹੈ ਕਿ ਸਪੀਕਰ ਨੂੰ ਇਹ ਅਧਿਕਾਰ ਨਹੀਂ ਕਿ ਉਹ ਅਯੋਗਤਾ ਦੀ ਮਿਆਦ ਦਾ ਸੰਕੇਤ ਦੇਣ ਜਾਂ ਕਹਿਣ ਕਿ ਵਿਅਕਤੀ ਵਿਧਾਨ ਸਭਾ ਦੇ ਕਾਰਜਕਾਲ ਤੱਕ ਚੋਣ ਨਹੀਂ ਲੜ ਸਕਦਾ।