ਵੈਨਿਸ, 14 ਨਵੰਬਰ (ਪੋਸਟ ਬਿਊਰੋ)- ਇਟਲੀ ਦਾ ਖੂਬਸੂਰਤ ਵੈਨਿਸ ਸ਼ਹਿਰ ਇਤਿਹਾਸ ਦੇ ਦੂਜੇ ਸਭ ਤੋਂ ਵੱਡੇ ਤੂਫਾਨ ਨਾਲ ਨੁਕਸਾਨਿਆ ਗਿਆ ਹੈ। ਇਸ ਦੇ ਮੇਅਰ ਨੇ ਕੱਲ੍ਹ ਪੂਰੇ ਸ਼ਹਿਰ ਨੂੰ ਆਫਤ ਪੀੜਤ ਐਲਾਨ ਕਰ ਦਿੱਤਾ।
ਪਤਾ ਲੱਗਾ ਹੈ ਕਿ ਇਹ ਪੂਰਾ ਸ਼ਹਿਰ ਹੜ੍ਹ ਨਾਲ ਜਿਸ ਤਰ੍ਹਾਂ ਪ੍ਰਭਾਵਿਤ ਹੋਇਆ ਹੈ, ਇਸ ਦਾ ਅੰਦਾਜ਼ਾ ਇਸੇ ਤੋਂ ਲਾ ਸਕਦੇ ਹਾਂ ਕਿ ਇਤਿਹਾਸਕ ਬੇਸਿਲਿਕਾ ਸਮੇਤ ਕਈ ਗਲੀ-ਮੁਹੱਲੇ ਪੂਰੀ ਤਰ੍ਹਾਂ ਪਾਣੀ ਵਿੱਚ ਡੁੱਬ ਗਏ ਹਨ ਅਤੇ ਇਸ ਸਮੁੰਦਰੀ ਆਫਤ ਵਿੱਚ ਇੱਕ ਜਣੇ ਦੀ ਮੌਤ ਵੀ ਹੋਈ ਹੈ। ਅਧਿਕਾਰੀਆਂ ਮੁਤਾਬਕ ਸਥਾਨਕ ਸਮੇਂ ਅਨੁਸਾਰ ਕੱਲ੍ਹ ਰਾਤ 10 ਵੱਜ ਕੇ ਸੱਤ ਮਿੰਟ 'ਤੇ ਏਥੇ ਸਮੁੰਦਰ ਵਿੱਚ ਛੇ ਫੁੱਟ ਦੋ ਇੰਚ (187 ਸੈਂਟੀਮੀਟਰ) ਉਚੀਆਂ ਲਹਿਰਾਂ ਉਠੀਆਂ। ਇਹ ਲਹਿਰਾਂ 1966 ਦੇ 194 ਸੈਂਟੀਮੀਟਰ ਦੀਆਂ ਲਹਿਰਾਂ ਦੇ ਮੁਕਾਬਲੇ ਵਿੱਚ ਕੁਝ ਹੀ ਘੱਟ ਸਨ। ਇਨ੍ਹਾਂ ਲਹਿਰਾਂ ਦੀ ਲਪੇੇਟ ਵਿੱਚ ਆ ਕੇ ਸ਼ਹਿਰ ਦਾ ਸੇਂਟ ਮਾਰਕਸ ਸਕੁਵਾਇਰ ਤੇ ਉਸ ਦੇ ਨਾਲ ਦਾ ਬੇਸਿਲਿਕਾ ਪਾਣੀ ਵਿੱਚ ਡੁੱਬ ਗਿਆ। ਵੈਨਿਸ ਦੇ ਮੇਅਰ ਲੁਈਗੀ ਬਰੁਗਨਾਰੋ ਨੇ ਟਵਿੱਟਰ ਵਿੱਚ ਕਿਹਾ ਕਿ ਸਥਿਤੀ ਬਹੁਤ ਨਾਟਕੀ ਸੀ। ਅਸੀਂ ਸਰਕਾਰ ਨੂੰ ਮਦਦ ਲਈ ਕਿਹਾ ਹੈ। ਸਾਨੂੰ ਬਹੁਤ ਸਾਰੇ ਪੈਸੇ ਦਾ ਲੋੜ ਹੋਵੇਗੀ। ਇਹ ਜਲਵਾਯੂ ਪਰਿਵਰਤਨ ਦਾ ਨਤੀਜਾ ਹੈ। ਆਫਤ ਪ੍ਰਭਾਵਤ ਖੇਤਰ ਦੇ ਐਲਾਨ ਦੇ ਨਾਲ ਅਸੀਂ ਸਰਕਾਰ ਤੋਂ ਐਮਰਜੈਂਸੀ ਦਾ ਐਲਾਨ ਕਰਨ ਲਈ ਕਹਾਂਗੇ। ਉਚ ਜਵਾਰ-ਭਾਟੇ ਦੇ ਸਮੇਂ ਵੈਨਿਸ ਨੂੰ ਹੜ੍ਹ ਤੋਂ ਬਚਾਉਣ ਲਈ 1984 ਵਿੱਚ ਇੱਕ ਪ੍ਰਾਜੈਕਟ ਡਿਜ਼ਾਈਨ ਤਿਆਰ ਕੀਤਾ ਗਿਆ ਸੀ, ਪਰ ਕਰੋੜਾ ਯੂਰੋ ਦਾ ਇਹ ਪ੍ਰਾਜੈਕਟ ਘੁਟਾਲਿਆਂ ਦੀ ਭੇਟ ਚੜ੍ਹ ਗਿਆ। ਵੈਨਿਸ ਨੂੰ ਨਹਿਰਾਂ ਦਾ ਸ਼ਹਿਰ ਕਿਹਾ ਜਾਂਦਾ ਹੈ।