ਆਕਲੈਂਡ, 14 ਨਵੰਬਰ (ਪੋਸਟ ਬਿਊਰੋ)- ਕਰੀਬ ਇੱਕ ਸਾਲ ਤੋਂ ਨਿਊਜ਼ੀਲੈਂਡ ਵਿੱਚ ਰਹਿ ਰਹੇ ਪ੍ਰਵਾਸੀ ਲੋਕ ਆਪਣੇ ਦੇਸ਼ ਜਾ ਕੇ ਵਿਆਹ ਕਰਵਾਉਣ ਪਿੱਛੋਂ ਆਪਣਾ ਜੀਵਨ ਸਾਥੀ ਨਿਊਜ਼ੀਲੈਂਡ ਲਿਆਉਣ ਲਈ ਪਾਰਟਨਰਸ਼ਿਪ ਵੀਜ਼ਾ ਸ਼ੇ੍ਰਣੀ 'ਚ ਅਰਜ਼ੀ ਅਪਲਾਈ ਕਰਦੇ ਸਨ, ਪਰ ਕਈ ਮਹੀਨੇ ਬੀਤਣ ਤੋਂ ਬਾਅਦ ਵੀ ਉਨ੍ਹਾਂ ਦੇ ਜੀਵਨ ਸਾਥੀ ਨੂੰ ਵੀਜ਼ਾ ਨਹੀਂ ਸੀ ਮਿਲਦਾ ਅਤੇ ਭਾਰਤੀ ਜੋੜਿਆਂ ਦੀਆਂ ਅਰਜ਼ੀਆਂ ਇਹ ਕਹਿ ਕੇ ਰੱਦ ਕਰ ਦਿੱਤੀਆਂ ਜਾਂਦੀਆਂ ਸਨ ਕਿ ਉਹ ਪਿਛਲੇ ਇੱਕ ਸਾਲ ਤੋਂ ਇਕੱਠੇ ਇੱਕ ਛੱਤ ਹੇਠ ਨਹੀਂ ਰਹੇ ਹਨ। ਇਹ ਉਂਜ ਵੀ ਭਾਰਤੀ ਸੱਭਿਆਚਾਰ ਦੇ ਉਲਟ ਸੀ, ਜਿਸ ਤੋਂ ਬਾਅਦ ਸਥਾਨਕ ਲੋਕਾਂ ਵੱਲੋਂ ਆਕਲੈਂਡ ਵਿਖੇ ਰੋਸ ਪ੍ਰਦਰਸ਼ਨ ਕੀਤੇ ਤੇ ਕੁਝ ਭਾਰਤੀ ਭਾਈਚਾਰੇ ਦੇ ਸਿਆਸੀ ਆਗੂਆਂ ਨੇ ਸਰਕਾਰ ਤੱਕ ਚਿੱਠੀ-ਪੱਤਰਾਂ ਜਾਂ ਮਿਲ ਕੇ ਇਹ ਮੁੱਦਾ ਚੁੱਕਿਆ ਸੀ ਕਿ ਭਾਰਤ 'ਚ ਹੁੰਦੇ ਵਿਆਹ ‘ਅਰੇਂਜਡ ਮੈਰਿਜ' ਹੁੰਦੇ ਹਨ ਤੇ ਵਿਆਹ ਤੋਂ ਪਹਿਲਾਂ ਮੁੰਡਾ-ਕੁੜੀ ਇਕੱਠੇ ਨਹੀਂ ਰਹਿ ਸਕਦੇ।
ਇਸ ਪਿੱਛੋਂ ਕੱਲ੍ਹ ਇੰਮੀਗ੍ਰੇਸ਼ਨ ਮੰਤਰੀ ਨਿਊਜ਼ੀਲੈਂਡ ਆਈ ਐਲ ਗੈਲੋਏ ਨੇ ਪਾਰਟਨਰਸ਼ਿਪ ਵੀਜ਼ੇ ਵਿੱਚ ਤਬਦੀਲੀ ਕਰਦਿਆਂ ਨਵੀਂ ਕੈਟਾਗਰੀ ‘ਕਲਚਰਲੀ ਅਰੇਂਜਡ ਮੈਰਿਜ' ਨੂੰ ਸ਼ੁਰੂ ਕੀਤਾ ਹੈ, ਜਿਸ ਤਹਿਤ ਕੇਵਲ ਨਿਊਜ਼ੀਲੈਂਡ ਦੇ ਪੱਕੇ (ਪੀ ਆਰ) ਜਾਂ ਸਿਟੀਜ਼ਨ ਲੜਕਾ-ਲੜਕੀ ਜੋ ਅਰੇਂਜ ਮੈਰਿਜ ਕਰਵਾਉਣਗੇ, ਉਨ੍ਹਾਂ ਨੂੰ ਤਿੰਨ ਮਹੀਨੇ ਦਾ ਵਿਜ਼ਟਰ ਵੀਜ਼ਾ ਮਿਲੇਗਾ। ਅਰੇਂਜ ਮੈਰਿਜ ਸਾਬਤ ਕਰਨਾ ਅਤੇ ਨਿਊਜ਼ੀਲੈਂਡ 'ਚ ਤਿੰਨ ਮਹੀਨੇ ਇਕੱਠੇ ਰਹਿਣ ਤੋਂ ਬਾਅਦ ਹੀ ਉਹ ਅਗਲੇ ਵੀਜ਼ੇ ਲਈ ਅਪਲਾਈ ਕਰ ਸਕਣਗੇ। ਇਸ ਮੌਕੇ ਉਨ੍ਹਾਂ ਮਈ 2019 ਤੋਂ ਬਾਅਦ ਰੱਦ ਕੀਤੀਆਂ ਗਈਆਂ ਅਰਜ਼ੀ ਵਾਲਿਆਂ ਨੂੰ ਵੱਡੀ ਰਾਹਤ ਦਿੰਦਿਆਂ ਕਿਹਾ ਕਿ ਇਮੀਗ੍ਰੇਸ਼ਨ ਵਿਭਾਗ ਜਲਦੀ ਹੀ ਉਨ੍ਹਾਂ ਦੀਆਂ ਅਰਜ਼ੀਆਂ ਦੀ ਵੀ ਮੁੜ ਜਾਂਚ ਪੜਤਾਲ ਕਰੇਗਾ ਅਤੇ ਇਸ ਸਬੰਧੀ ਉਨ੍ਹਾਂ ਨੂੰ ਸੂਚਿਤ ਵੀ ਕਰ ਦਿੱਤਾ ਜਾਵੇਗਾ।