ਲੰਡਨ, 14 ਨਵੰਬਰ (ਪੋਸਟ ਬਿਊਰੋ)- ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਬੋਰਿਸ ਜੌਨਸਨ ਨੇ ਚੋਣ ਪ੍ਰਚਾਰ ਵਿੱਚ ਕਿਹਾ ਹੈ ਕਿ ਬ੍ਰਿਟੇਨ ਨੂੰ ਜੇ ਬ੍ਰੈਗਜ਼ਿਟ ਦੀਆਂ ਗੁੰਝਲਾਂ ਤੋਂ ਮੁਕਤੀ ਦਿਵਾਉਣੀ ਹੈ ਤਾਂ ਵੋਟਰ ਕੰਜ਼ਰਵੇਟਿਵ ਪਾਰਟੀ ਨੂੰ ਪੂਰੇ ਬਹੁਮਤ ਨਾਲ ਜਿਤਾਉਣ। ਉਨ੍ਹਾਂ ਕਿਹਾ ਕਿ ਬ੍ਰੈਗਜ਼ਿਟ ਦੇ ਰਾਹ ਵਿੱਚ ਅੜਿੱਕੇ ਤੋਂ ਸਿਰਫ਼ ਉਹੀ ਬਚਾ ਸਕਦੇ ਹਨ।
ਬੋਰਿਸ ਜੌਨਸਨ ਨੇ ਕਿਹਾ ਕਿ ਯੂਨਾਈਟਡ ਕਿੰਗਡਮ ਦਾ ਪੂਰੀ ਦੁਨੀਆ ਵਿੱਚ ਸਨਮਾਨ ਹੈ ਤੇ ਲੋਕ ਇੱਥੋਂ ਪ੍ਰੇਰਤ ਹੁੰਦੇ ਹਨ, ਪਰ ਕੁਝ ਸਾਲਾਂ ਵਿੱਚ ਉਹ ਬ੍ਰਿਟੇਨ ਅਤੇ ਸਹਿਯੋਗੀਆਂ ਦੇ ਬ੍ਰੈਗਜ਼ਿਟ ਵਿੱਚ ਫਸੇ ਹੋਣ ਦੀ ਚਰਚਾ ਕਰਦੇ ਹਨ। ਬ੍ਰਿਟੇਨ ਦੇ ਭਵਿੱਖ ਉੱਤੇ ਸਵਾਲ ਉਠ ਰਹੇ ਹਨ, ਸ਼ੱਕ ਪ੍ਰਗਟਾਏ ਜਾ ਰਹੇ ਹਨ। ਇਹ ਇਸ ਲਈ ਹੋ ਰਿਹਾ ਹੈ ਕਿ ਯੂਰਪੀ ਯੂਨੀਅਨ ਤੋਂ ਵੱਖ ਹੋਣ ਲਈ ਸਿਆਸੀ ਲੀਡਰਸ਼ਿਪ ਇਕਜੁੱਟਤਾ ਤੇ ਮਜ਼ਬੂਤੀ ਨਹੀਂ ਦਿਖਾ ਸਕੀ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਜੇ ਉਨ੍ਹਾਂ ਨੂੰ ਬਹੁਮਤ ਮਿਲਿਆ ਤਾਂ ਉਹ ਬ੍ਰਿਟੇਨ ਲਈ ਬਿਹਤਰ ਭਵਿੱਖ ਵਾਲੇ ਬ੍ਰੈਗਜ਼ਿਟ ਨੂੰ ਲਾਗੂ ਕਰਨਗੇ।
ਵਰਨਣ ਯੋਗ ਹੈ ਕਿ ਸਾਲ 2016 ਵਿੱਚ ਬ੍ਰੈਗਜ਼ਿਟ ਦਾ ਫ਼ੈਸਲਾ ਲੋਕ ਰਾਇ ਨਾਲ ਹੋਇਆ ਸੀ। ਉਸ ਪਿੱਛੋਂ ਡੇਵਿਡ ਕੈਮਰਨ ਅਤੇ ਥੈਰੇਸਾ ਮੇਅ ਦੀ ਸਰਕਾਰ ਇਸ ਲਈ ਕੁਝ ਨਹੀਂ ਸੀ ਕਰ ਸਕੀ। ਬ੍ਰੈਗਜ਼ਿਟ ਨੂੰ 31 ਅਕਤੂਬਰ ਤਕ ਪੂਰਾ ਕਰਵਾਉਣ ਦਾ ਨਾਅਰਾ ਦੇ ਕੇ ਬੋਰਿਸ ਜੌਨਸਨ ਨੇ ਜੁਲਾਈ ਵਿੱਚ ਕੁਰਸੀ ਸੰਭਾਲੀ ਸੀ। ਵਿਰੋਧੀ ਧਿਰ ਤੇ ਸਹਿਯੋਗੀਆਂ ਦੇ ਸਾਰੇ ਵਿਰੋਧ ਦੇ ਬਾਵਜੂਦ ਉਹ ਯੂਰਪੀ ਯੂਨੀਅਨ ਤੋਂ ਵੱਖ ਹੋਣ ਲਈ ਸਮਝੌਤਾ ਕਰਨ ਤੇ ਉਸ ਨੂੰ ਬ੍ਰਿਟਿਸ਼ ਪਾਰਲੀਮੈਂਟ ਦੇ ਵਿੱਚ ਮਨਜ਼ੂਰ ਕਰਵਾਉਣ ਵਿੱਚ ਸਫਲ ਰਹੇ। ਪਾਰਲੀਮੈਂਟ ਵਿੱਚ ਪਾਸ ਇਕ ਸੋਧ ਮਤੇ ਕਾਰਨ ਬ੍ਰੈਗਜ਼ਿਟ ਟਲ਼ ਗਿਆ ਹੈ ਤੇ ਉਸ ਦੀ ਅਗਲੀ ਤਰੀਕ 31 ਜਨਵਰੀ 2020 ਹੋ ਗਈ ਹੈ। ਆਸ ਕੀਤੀ ਜਾ ਰਹੀ ਹੈ ਕਿ ਬ੍ਰਿਟੇਨ ਵਿੱਚ ਜੇ ਜੌਨਸਨ ਦੀ ਸਰਕਾਰ ਫਿਰ ਤੋਂ ਬਣੀ ਤਾਂ ਅਗਲੀ ਤੈਅ ਤਰੀਕ ਉੱਤੇ ਬ੍ਰੈਗਜ਼ਿਟ ਪ੍ਰਕਿਰਿਆ ਪੂਰੀ ਹੋ ਜਾਵੇਗੀ।