ਇਸਲਾਮਾਬਾਦ, 14 ਨਵੰਬਰ (ਪੋਸਟ ਬਿਊਰੋ)- ਪਾਕਿਸਤਾਨ ਦੇ ਸਾਬਕਾ ਰਾਸ਼ਟਰਪਤੀ ਪਰਵੇਜ਼ ਮੁਸ਼ੱਰਫ ਨੇ ਸਵੀਕਾਰ ਕੀਤਾ ਕਿ ਜੰਮੂ ਕਸ਼ਮੀਰ ਵਿਚ ਭਾਰਤੀ ਸੈਨਾ ਨਾਲ ਲੜਨ ਲਈ ਕਸ਼ਮੀਰੀ ਨੌਜਵਾਨਾਂ ਨੂੰ ਪਾਕਿਸਤਾਨ ਵਿਚ ਮੁਜਾਹਿਦੀਨ ਬਣਾਉਣ ਦੀ ਸਿਖਲਾਈ ਦਿੱਤੀ ਗਈ ਸੀ। ਉਨ੍ਹਾਂ ਕਿਹਾ ਕਿ ਇਹ ਜੇਹਾਦੀ ਅੱਤਵਾਦੀ ਪਾਕਿਸਤਾਨੀ ਹੀਰੋ ਹਨ। ਓਸਾਮਾ ਬਿਨ ਲਾਦੇਨ, ਅਇਮਾਨ ਅਲ ਜਵਾਹਿਰੀ, ਜਲਾਲੂਦੀਨ ਹੱਕਾਨੀ ਤੇ ਹੋਰ ਅੱਤਵਾਦੀ ਪਾਕਿਸਤਾਨ ਦੇ ਹੀਰੋ ਹਨ।
ਜਨਰਲ ਮੁਸ਼ੱਰਫ ਨੇ ਇਹ ਇੰਟਰਵਿਊ ਕਦੋਂ ਦਿੱਤਾ, ਪਤਾ ਨਹੀਂ, ਪਰ ਪਾਕਿਸਤਾਨੀ ਨੇਤਾ ਫਰਹਤੁੱਲਾਹ ਬਾਬਰ ਵੱਲੋਂ ਬੁੱਧਵਾਰ ਨੂੰ ਟਵੀਟ ਉੱਤੇ ਸਾਂਝੇ ਕੀਤੇ ਕਲਿੱਪ ਵਿਚ ਪਰਵੇਜ਼ ਮੁਸ਼ੱਰਫ ਨੂੰ ਇਹ ਕਹਿੰਦੇ ਹੋਏ ਸੁਣਿਆ ਜਾ ਸਕਦਾ ਹੈ ਕਿ ਪਾਕਿਸਤਾਨ ਵਿੱਚ ਆਏ ਕਸ਼ਮੀਰੀਆਂ ਦਾ ਇਥੇ ਹੀਰੋ ਵਾਂਗ ਸਵਾਗਤ ਕੀਤਾ ਗਿਆ ਸੀ। ਅਸੀਂ ਉਨ੍ਹਾਂ ਨੂੰ ਸਿਖਲਾਈ ਦਿੰਦੇ ਤੇ ਉਨ੍ਹਾਂ ਦਾ ਸਮਰਥਨ ਕਰਦੇ ਹਾਂ। ਅਸੀਂ ਉਨ੍ਹਾਂ ਨੂੰ ਮੁਜਾਹਿਦੀਨ ਮੰਨਦੇ ਸੀ, ਜਿਹੜੇ ਭਾਰਤੀ ਸੈਨਾ ਨਾਲ ਲੜਨਗੇ। ਫਿਰ ਲਕਸ਼ਰ-ਏ-ਤਾਇਬਾ ਵਰਗੇ ਵੱਖ ਵੱਖ ਅੱਤਵਾਦੀ ਸੰਗਠਨ ਇਸ ਸਮੇਂ ਦੌਰਾਨ ਪੈਦਾ ਹੋਏ। ਉਹ ਜੇਹਾਦੀ ਅੱਤਵਾਦੀ ਸਾਡੇ ਨਾਇਕ ਸਨ। ਮੁੱਸ਼ਰਫ ਨੇ ਕਿਹਾ ਕਿ ਓਸਾਮਾ ਬਿਨ ਲਾਦੇਨ ਤੇ ਜਲਾਲੁਦੀਨ ਹੱਕਾਨੀ ਵਰਗੇ ਅੱਤਵਾਦੀ ਪਾਕਿਸਤਾਨੀ ਨਾਇਕ ਸਨ। ਅਸੀਂ ਸਾਲ 1979 ਵਿਚ ਪਾਕਿਸਤਾਨ ਦੇ ਲਾਭ ਲਈ ਤੇ ਸੋਵੀਅਤ ਰੂਸ ਨੂੰ ਦੇਸ਼ ਵਿਚੋਂ ਬਾਹਰ ਕੱਢਣ ਲਈ ਅਫਗਾਨਿਸਤਾਨ ਵਿਚ ਧਾਰਮਕ ਅੱਤਵਾਦ ਸ਼ੁਰੂ ਕਰਵਾਇਆ ਸੀ। ਹੱਕਾਨੀ ਸਾਡਾ ਹੀਰੋ ਸੀ। ਓਸਾਮਾ ਬਿਨ ਲਾਦੇਨ ਸਾਡਾ ਹੀਰੋ ਸੀ। ਅਇਮਾਨ ਅਲ ਜਵਾਹਿਰੀ ਸਾਡਾ ਹੀਰੋ ਸੀ।