ਮਿਸੀਸਾਗਾ, ਓਨਟਾਰੀਓ, 14 ਨਵੰਬਰ (ਪੋਸਟ ਬਿਊਰੋ) : ਓਨਟਾਰੀਓ ਦੀ ਸਿਹਤ ਮੰਤਰੀ ਕ੍ਰਿਸਟੀਨ ਐਲੀਅਟ ਦਾ ਕਹਿਣਾ ਹੈ ਕਿ ਦੋ ਸਾਲਾਂ ਵਿੱਚ ਪੇਸ਼ੈਂਟਜ਼ ਆਪਣੀਆਂ ਐਪੁਆਇੰਟਮੈਂਟਜ਼ ਆਨਲਾਈਨ ਬੁੱਕ ਕਰਵਾ ਸਕਣਗੇ ਤੇ ਆਪਣੇ ਸਿਹਤ ਸਬੰਧੀ ਰਿਕਾਰਡ ਨੂੰ ਆਨਲਾਈਨ ਚੈੱਕ ਕਰ ਸਕਣਗੇ।
ਉਨ੍ਹਾਂ ਨੇ ਦੱਸਿਆ ਕਿ ਸਰਕਾਰ ਡਿਜੀਟਲ ਫਰਸਟ ਹੈਲਥ ਸਟਰੈਟੇਜੀ ਅਪਨਾਉਣ ਜਾ ਰਹੀ ਹੈ। ਜੋ ਕਿ 2021-22 ਤੱਕ ਪੂਰੀ ਤਰ੍ਹਾ ਲਾਗੂ ਹੋ ਜਾਵੇਗੀ। ਐਲੀਅਟ ਦਾ ਕਹਿਣਾ ਹੈ ਕਿ ਇਸ ਰਣਨੀਤੀ ਤਹਿਤ ਲੋਕ ਹੈਲਥ ਕੇਅਰ ਪ੍ਰੋਫੈਸ਼ਨਲਜ਼ ਨਾਲ ਸੁਖਾਲੇ ਢੰਗ ਨਾਲ ਵੀਡੀਓ ਵਿਜਿ਼ਟਸ ਕਰ ਸਕਣਗੇ ਤੇ ਅਕਸਰ ਗੱਲ ਕਰ ਸਕਣਗੇ ਤੇ ਮਰੀਜ਼ਾਂ ਦਾ ਰਿਕਾਰਡ ਵੀ ਕਿਤੇ ਮਰਜ਼ੀ ਜਾਂਚਿਆਂ ਜਾ ਸਕੇਗਾ।
ਉਨ੍ਹਾਂ ਆਖਿਆ ਕਿ ਮਰੀਜ਼ ਆਨਲਾਈਨ ਹੀ ਐਪੁਆਂਇੰਟਮੈਂਟਜ਼ ਬੁੱਕ ਕਰਵਾ ਸਕਿਆ ਕਰਨਗੇ ਤੇ ਉਨ੍ਹਾਂ ਦੇ ਸਕਿਓਰ ਹੈਲਥ ਰਿਕਾਰਡ ਦੀ ਜਾਂਚ ਕਰ ਸਕਣਗੇ। ਓਨਟਾਰੀਓ ਹੈਲਥ ਟੀਮਾਂ, ਜੋ ਕਿ ਨਵੀਂ ਕੇਅਰ ਕੋਆਰਡੀਨੇਸ਼ਨ ਸਿਸਟਮ ਦਾ ਕੇਂਦਰੀ ਹਿੱਸਾ ਹੋਣਗੀਆਂ ਮਰੀਜ਼ਾਂ ਸਬੰਧੀ ਜਾਣਕਾਰੀ ਇੱਕਠੀ ਕਰਨ, ਸਾਂਝੀ ਕਰਨ ਤੇ ਉਸ ਨੂੰ ਉਨ੍ਹਾਂ ਦੀ ਬਿਹਤਰ ਸੰਭਾਲ ਲਈ ਵਰਤਣ ਦੇ ਸਮਰੱਥ ਹੋਣਗੀਆਂ।
ਐਲੀਅਟ ਦਾ ਕਹਿਣਾ ਹੈ ਕਿ ਇਸ ਤੋਂ ਭਾਵ ਇਹ ਹੈ ਕਿ ਮਰੀਜ਼ਾਂ ਨੂੰ ਵਾਰੀ ਵਾਰੀ ਆਪਣੀ ਗੱਲ, ਤਕਲੀਫ ਨਹੀਂ ਦੱਸਣੀ ਹੋਵੇਗੀ। ਇਸ ਨਾਲ ਪਰਸਨਲ ਹੈਲਥ ਇਨਫਰਮੇਸ਼ਨ ਪ੍ਰੋਟੈਕਸ਼ਨ ਐਕਟ ਵੀ ਮਜ਼ਬੂਤ ਹੋਵੇਗਾ।