ਓਟਵਾ, 14 ਨਵੰਬਰ (ਪੋਸਟ ਬਿਊਰੋ) : ਕਈ ਦਹਾਕਿਆਂ ਤੋਂ ਬੈਨਾਡਰਿੱਲ ਮਧੂ ਮੱਖੀ ਦੇ ਡੰਗ ਤੋਂ ਲੈ ਕੇ ਬੱਚਿਆਂ ਨੂੰ ਨਿਕਲਣ ਵਾਲੀ ਛਪਾਕੀ ਤੱਕ ਹਰ ਚੀਜ਼ ਦਾ ਇਲਾਜ ਰਹੀ ਹੈ। ਪਰ ਹੁਣ ਵੱਧ ਤੋਂ ਵੱਧ ਡਾਕਟਰਾਂ ਦਾ ਇਹ ਮੰਨਣਾ ਹੈ ਕਿ ਕਈ ਤਰ੍ਹਾਂ ਦੀਆਂ ਐਲਰਜੀਜ਼ ਨੂੰ ਠੀਕ ਕਰਨ ਵਾਲੀ ਇਹ ਚਮਤਕਾਰੀ ਦਵਾਈ ਨਵੇਂ ਬਦਲਾਂ ਦੇ ਮੁਕਾਬਲੇ ਘੱਟ ਪ੍ਰਭਾਵਕਾਰੀ ਹੈ ਤੇ ਇਸ ਦੇ ਨਾਲ ਹੀ ਘੱਟ ਸੁੁਰੱਖਿਅਤ ਵੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਸਾਈਡ ਇਫੈਕਟਸ ਕਾਰਨ ਇਸ ਦਵਾਈ ਨੂੰ ਹੁਣ ਵੇਚਿਆ ਨਹੀਂ ਜਾਣਾ ਚਾਹੀਦਾ।
ਕੈਨੇਡੀਅਨ ਸੁਸਾਇਟੀ ਆਫ ਐਲਰਜੀ ਐਂਡ ਕਲੀਨਿਕਲ ਇਮਿਊਨੌਲੋਜੀ (ਸੀਐਸਏਸੀਆਈ) ਵੱਲੋਂ ਅਕਤੂਬਰ ਦੇ ਸ਼ੁਰੂ ਵਿੱਚ ਪ੍ਰਕਾਸਿ਼ਤ ਕੀਤੇ ਗਏ ਬਿਆਨ ਵਿੱਚ ਇਹ ਚੇਤਾਵਨੀ ਦਿੱਤੀ ਗਈ ਹੈ ਕਿ ਬੈਨਾਡਰਿੱਲ ਤੇ ਪਹਿਲਾਂ ਦਿੱਤੀਆਂ ਜਾਣ ਵਾਲੀਆਂ ਹੋਰ ਐਚ1 ਐਂਟੀਹਿਸਟੇਮਾਈਨਜ਼ ਨੂੰ ਬਾਲਗਾਂ ਤੇ ਬੱਚਿਆਂ ਨੂੰ ਪਹਿਲ ਦੇ ਆਧਾਰ ਉੱਤੇ ਨਹੀਂ ਦਿੱਤਾ ਜਾਣਾ ਚਾਹੀਦਾ। ਹੈਲਥ ਕੈਨੇਡਾ ਇਸ ਬਿਆਨ ਦਾ ਮੁਲਾਂਕਣ ਕਰ ਰਹੀ ਹੈ। ਇਸ ਵਿੱਚ ਡਾਕਟਰਜ਼ ਦੇ ਗਰੁੱਪ ਵੱਲੋਂ ਆਖਿਆ ਗਿਆ ਹੈ ਕਿ ਇਸ ਦਵਾਈ ਦੀ ਉਪਲਬਧਤਾ ਕਾਰਨ ਹੀ ਇਸ ਦੀ ਵਾਰੀ ਵਾਰੀ ਵਰਤੋਂ ਕੀਤੀ ਜਾਂਦੀ ਹੈ ਤੇ ਫਾਰਮੇਸੀਜ਼ ਵਿੱਚ ਇਹ ਆਮ ਤੌਰ ਉੱਤੇ ਨਹੀਂ ਵਿਕਣੀ ਚਾਹੀਦੀ।
ਬੈਰੀ, ਓਨਟਾਰੀਓ ਵਿੱਚ ਕਲੀਨਿਕਲ ਐਲਰਜਿਸਟ ਤੇ ਸੀਐਸਏਸੀਆਈ ਦੇ ਬਿਆਨ ਦੇ ਆਥਰ ਡੇਵਿਡ ਫਿਚਰ ਨੇ ਲਿਖਿਆ ਹੈ ਕਿ ਇਹ ਵੀ ਪਾਇਆ ਗਿਆ ਹੈ ਕਿ ਅਜੇ ਵੀ ਲੋਕ ਇਸ ਦੀ ਵਰਤੋਂ ਕਰਨੀ ਚਾਹੁੰਦੇ ਹਨ। ਉਨ੍ਹਾਂ ਆਖਿਆ ਕਿ ਕਈ ਤਰ੍ਹਾਂ ਦੀਆਂ ਹੋਰ ਵਧੀਆ ਦਵਾਈਆਂ ਹਨ ਜਿਹੜੀਆਂ ਇਸ ਤੋਂ ਵੀ ਵਧੇਰੇ ਅਸਰਦਾਰ ਹਨ ਤੇ ਸੇਫ ਵੀ ਹਨ। ਫਿਚਰ ਦਾ ਕਹਿਣਾ ਹੈ ਕਿ ਬੈਨਾਡਰਿੱਲ ਵਿੱਚ ਪਾਏ ਜਾਣ ਵਾਲੇ ਮੈਡੀਸਿਨਲ ਇਨਗ੍ਰੇਡੀਏਂਟ ਡਿਫੈਨਹਾਈਡਰਾਮਾਈਨ ਹਾਈਡਰੋਕਲੋਰਾਈਡ ਨਾਲ ਤੁਸੀਂ ਸੁਸਤ ਹੋ ਜਾਂਦੇ ਹੋਂ ਤੇ ਤੁਹਾਨੂੰ ਪਰੇਸ਼ਾਨੀ ਹੋਣ ਲੱਗਦੀ ਹੈ। ਜੇ ਇਸ ਦੀ ਜਿ਼ਆਦਾ ਡੋਜ਼ ਜਾਂ ਓਵਰਡੋਜ਼ ਲੈ ਲਈ ਜਾਵੇ ਤਾਂ ਤੁਹਾਨੂੰ ਹਸਪਤਾਲ ਵੀ ਜਾਣਾ ਪੈ ਸਕਦਾ ਹੈ।
ਸੀਐਸਏਸੀਆਈ ਦੇ ਬਿਆਨ ਅਨੁਸਾਰ ਇਸ ਦੇ ਹੋਰਨਾਂ ਸਾਈਡ ਇਫੈਕਟਸ ਵਿੱਚ ਸਾਹ ਦੀਆਂ ਸਮੱਸਿਆਵਾਂ, ਕੋਮਾ ਤੇ ਦੌਰੇ ਪੈਣਾ ਆਦਿ ਵੀ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਜੇ ਇਸ ਨੂੰ ਕੁੱਝ ਹੋਰਨਾਂ ਦਵਾਈਆਂ ਦੇ ਕੌਂਬੀਨੇਸ਼ਨ ਨਾਲ ਦਿੱਤਾ ਜਾਵੇ ਤਾਂ ਇਸ ਨਾਲ ਦਿਲ ਦੀ ਧੜਕਣ ਵਿੱਚ ਗੜਬੜ ਹੋ ਸਕਦੀ ਹੈ। ਫਿਚਰ ਨੇ ਇਹ ਵੀ ਆਖਿਆ ਕਿ ਅੱਜ ਦੇ ਜ਼ਮਾਨੇ ਦੀਆਂ ਦਵਾਈਆਂ ਜਿਵੇਂ ਕਿ ਰਿਐਕਟਾਈਨ, ਕਲੈਰੀਟਿਨ, ਏਰੀਅਸ- ਜੋ ਬੱਚਿਆਂ ਲਈ ਲਿਕੁਇਡ ਜਾਂ ਗੋਲੀਆਂ ਤਿਆਰ ਕਰਦੀਆਂ ਹਨ, ਵਧੇਰੇ ਸੇਫ ਤੇ ਪ੍ਰਭਾਵਸ਼ਾਲੀ ਹਨ ਤੇ ਤੇਜ਼ੀ ਨਾਲ ਅਸਰ ਕਰਦੀਆਂ ਹਨ।
ਐਲਰਜਿਸਟ ਤੇ ਕੁਈਨਜ਼ ਯੂਨੀਵਰਸਿਟੀ ਦੇ ਪ੍ਰੋਫੈਸਰ ਡਾ. ਐਨੇ ਐਲਿਸ ਦਾ ਕਹਿਣਾ ਹੈ ਕਿ ਡਾਕਟਰ ਵੱਲੋਂ ਨੁਸਖਾ ਲਿਖੇ ਜਾਣ ਤੇ ਡੋਜ਼ ਨਿਰਧਾਰਤ ਕਰਨ ਦੇ ਬਾਵਜੂਦ ਬੈਨਾਡਰਿੱਲ ਵਰਗੀਆਂ ਦਵਾਈਆਂ ਨਾਲ ਬੇਹੋਸ਼ ਹੋਣ, ਬੋਧ ਕਮਜ਼ੋਰੀ ਤੇ ਯਾਦਦਾਸ਼ਤ ਸਬੰਧੀ ਸਮੱਸਿਆਵਾਂ ਵੀ ਹੋ ਸਕਦੀਆਂ ਹਨ। ਉਨ੍ਹਾਂ ਆਖਿਆ ਕਿ ਬੱਚੇ ਇਸ ਨਾਲ ਹਾਈਪਰ ਹੋ ਸਕਦੇ ਹਨ ਤੇ ਬਜ਼ੁਰਗ ਬੇਸੁੱਧ ਹੋ ਸਕਦੇ ਹਨ। ਬੈਨਾਡਰਿੱਲ ਤੇ ਬੱਚਿਆਂ ਦੀ ਬੈਨਾਡਰਿੱਲ ਕੈਨੇਡਾ ਵਿੱਚ ਫਾਰਮੇਸੀਜ਼ ਤੇ ਸਟੋਰਜ਼ ਉੱਤੇ ਬਿਨਾਂ ਡਾਕਟਰੀ ਨੁਸਖੇ ਦੇ ਵੀ ਉਪਲਬਧ ਹੈ ਤੇ ਇਹ ਕਈ ਤਰ੍ਹਾਂ ਦੇ ਲੱਛਣਾਂ ਜਿਵੇਂ ਕਿ ਛਿੱਕਾਂ ਆਉਣ, ਨੱਕ ਵਗਣ, ਅੱਖਾਂ ਵਿੱਚ ਖਾਜ, ਕਿਸੇ ਜੀਅ ਜੰਤੂ ਦੇ ਡੰਗਣ, ਛਪਾਕੀ ਤੇ ਹੋਰਨਾਂ ਧੱਫੜਾਂ ਆਦਿ ਕਾਰਨ ਲਈ ਜਾਂਦੀ ਰਹੀ ਹੈ।
ਬੈਨਾਡਰਿੱਲ ਦੇ ਨਿਰਮਾਤਾ ਜੌਹਨਸਨ ਐਂਡ ਜੌਹਨਸਨ ਵੱਲੋਂ ਇੱਕ ਬਿਆਨ ਵਿੱਚ ਆਖਿਆ ਗਿਆ ਹੈ ਕਿ ਬੈਨਾਡਰਿੱਲ ਦੇ ਉਤਪਾਦ ਉੱਤੇ 60 ਤੋਂ ਵੀ ਵੱਧ ਸਾਲਾਂ ਤੋਂ ਡਾਕਟਰ ਤੇ ਮਾਂਵਾਂ ਭਰੋਸਾ ਕਰਦੀਆਂ ਆਈਆਂ ਹਨ। ਇਹ ਐਲਰਜੀਜ਼ ਤੇ ਇਸ ਦੇ ਰਿਐਕਸ਼ਨਜ਼ ਤੋਂ ਵੀ ਰਾਹਤ ਦਿੰਦੀ ਹੈ। ਕੰਪਨੀ ਦਾ ਕਹਿਣਾ ਹੈ ਕਿ ਇਸ ਉਤਪਾਦ ਨੂੰ ਹੈਲਥ ਕੈਨੇਡਾ ਵੱਲੋਂ ਮਨਜੂ਼ਰੀ ਦਿੱਤੀ ਗਈ ਹੈ। ਹੈਲਥ ਕੈਨੇਡਾ ਨੇ ਵੀ ਪਿਛਲੇ ਹਫਤੇ ਇਹ ਆਖਿਆ ਸੀ ਕਿ ਉਹ ਸੀਐਸਏਸੀਆਈ ਦੀ ਸਥਿਤੀ ਦਾ ਮੁਲਾਂਕਣ ਕਰ ਰਹੀ ਹੈ।