ਓਟਵਾ, 13 ਨਵੰਬਰ (ਪੋਸਟ ਬਿਊਰੋ) : ਪਿਛਲੇ ਚਾਰ ਸਾਲਾਂ ਤੋਂ ਹਾਊਸ ਆਫ ਕਾਮਨਜ਼ ਵਿੱਚ ਸਪੀਕਰ ਰਹੇ ਜੈੱਫ ਰੀਗਨ ਪਾਰਲੀਆਮੈਂਟ ਦੇ ਨਵੇਂ ਸੈਸ਼ਨ ਵਿੱਚ ਆਪਣੀ ਉਹੀ ਭੂਮਿਕਾ ਮੁੜ ਨਿਭਾਉਣੀ ਚਾਹੁੰਦੇ ਹਨ।
ਹੈਲੀਫੈਕਸ ਤੋਂ ਲਿਬਰਲ ਐਮਪੀ ਦੀ ਇੱਛਾ ਹੈ ਕਿ ਜਸਟਿਨ ਟਰੂਡੋ ਦੀ ਅਗਵਾਈ ਵਿੱਚ ਐਤਕੀਂ ਬਣੀ ਘੱਟ ਗਿਣਤੀ ਲਿਬਰਲ ਸਰਕਾਰ ਦੌਰਾਨ ਵੀ ਰੈਫਰੀ ਵਜੋਂ ਕੰਮ ਕਰਨ ਦਾ ਉਨ੍ਹਾਂ ਨੂੰ ਇੱਕ ਵਾਰੀ ਫਿਰ ਮੌਕਾ ਮਿਲੇ। ਜਿ਼ਕਰਯੋਗ ਹੈ ਕਿ ਪਾਰਲੀਆਮੈਂਟ ਦਾ ਨਵਾਂ ਸੈਸ਼ਨ 5 ਦਸੰਬਰ ਨੂੰ ਸ਼ੁਰੂ ਹੋਣ ਜਾ ਰਿਹਾ ਹੈ। ਇਸ ਲਈ ਐਮਪੀਜ਼ ਵੱਲੋਂ ਸੱਭ ਤੋਂ ਪਹਿਲਾ ਕੰਮ ਨਵਾਂ ਸਪੀਕਰ ਚੁਣਨਾ ਹੈ। ਸਪੀਕਰ ਆਫਿਸ ਦੀ ਤਰਜ਼ਮਾਨ ਹੈਦਰ ਬ੍ਰੈਡਲੇ ਨੇ ਆਖਿਆ ਕਿ 42ਵੀਂ ਪਾਰਲੀਆਮੈਂਟ ਵਿੱਚ ਸਪੀਕਰ ਵਜੋਂ ਨਿਭਾਈ ਭੂਮਿਕਾ ਲਈ ਰੀਗਨ ਨੂੰ ਖੁਸ਼ੀ ਹੋਵੇਗੀ ਜੇ ਉਨ੍ਹਾਂ ਦੇ ਤਜਰਬੇ ਨੂੰ ਮੁੜੇ ਇਸ ਅਹੁਦੇ ਲਈ ਵਿਚਾਰਿਆ ਜਾਵੇ।
ਇਹ ਵੀ ਸਾਹਮਣੇ ਆਇਆ ਹੈ ਕਿ ਤਿੰਨ ਹੋਰ ਉਮੀਦਵਾਰ ਇਸ ਦੌੜ ਵਿੱਚ ਸ਼ਾਮਲ ਹੋਣਾ ਚਾਹੁੰਦੇ ਹਨ ਜਿਨ੍ਹਾਂ ਵਿੱਚ ਪਿਛਲੇ ਸੈਸ਼ਨ ਵਿੱਚ ਡਿਪਟੀ ਸਪੀਕਰ ਦੀ ਭੂਮਿਕਾ ਨਿਭਾਉਣ ਵਾਲੇ ਕੰਜ਼ਰਵੇਟਿਵ ਐਮਪੀ ਬਰੂਸ ਸਟੈਂਟਨ, ਪਿਛਲੇ ਸੈਸ਼ਨ ਵਿੱਚ ਅਸਿਸਟੈਂਟ ਡਿਪਟੀ ਸਪੀਕਰ ਰਹਿ ਚੁੱਕੀ ਉੱਤਰੀ ਓਨਟਾਰੀਓ ਤੋਂ ਲਿਬਰਲ ਐਮਪੀ ਐਂਥਨੀ ਰੋਟਾ ਅਤੇ ਅਸਿਸਟੈਂਟ ਡਿਪਟੀ ਸਪੀਕਰ ਰਹਿ ਚੁੱਕੇ ਨਿਊ ਡੈਮੋਕ੍ਰੇਟ ਐਮਪੀ ਕੈਰੋਲ ਹੱਗਜ਼ ਸ਼ਾਮਲ ਹਨ।
ਇਸ ਅਹਦੁੇ ਨਾਲ ਤਨਖਾਹ ਵਿੱਚ 255,000 ਡਾਲਰ ਦਾ ਇਜਾਫਾ, ਹਾਊਸ ਆਫ ਕਾਮਨਜ਼ ਦੇ ਨੇੜੇ ਇੱਕ ਪ੍ਰਾਈਵੇਟ ਘਰ ਤੇ ਗੈਟਿਨਿਊ, ਕਿਊਬਿਕ ਵਿੱਚ ਇੱਕ ਹੋਰ ਸੰਪਤੀ, ਜਿਸ ਨੂੰ ਦ ਫਾਰਮ ਵਜੋਂ ਜਾਣਿਆ ਜਾਂਦਾ ਹੈ, ਮਿਲਦੀ ਹੈ। ਨਵੇਂ ਸਪੀਕਰ ਦੀ ਚੋਣ ਲਈ ਮੈਂਬਰ ਪਾਰਲੀਆਮੈਂਟ ਪਹਿਲਾਂ ਵੋਟਾਂ ਪਾਉਣਗੇ ਤੇ ਫਿਰ ਨਵੇਂ ਸੈਸ਼ਨ ਲਈ ਆਪਣੇ ਏਜੰਡੇ ਨੂੰ ਪ੍ਰਗਟਾਉਂਦਿਆਂ ਹੋਇਆਂ ਟਰੂਡੋ ਰਾਜ ਭਾਸ਼ਣ ਦੇਣਗੇ। ਫਿਰ ਇਸ ਰਾਜ ਭਾਸ਼ਣ ਦੇ ਆਧਾਰ ਉੱਤੇ ਟਰੂਡੋ ਨੂੰ ਭਰੋਸੇ ਦਾ ਵੋਟ ਹਾਸਲ ਕਰਨਾ ਹੋਵੇਗਾ।
ਭਰੋਸੇ ਦਾ ਵੋਟ ਹਾਸਲ ਕਰਨ ਲਈ ਲਿਬਰਲਾਂ ਨੂੰ ਬਲਾਕ ਕਿਊਬਿਕੁਆ ਜਾਂ ਨਿਊ ਡੈਮੋਕ੍ਰੈਟਿਕ ਪਾਰਟੀਆਂ ਵਿੱਚੋਂ ਕਿਸੇ ਇੱਕ ਦੇ ਸਮਰਥਨ ਦੀ ਲੋੜ ਪਵੇਗੀ। ਭਰੋੋਸੇ ਦਾ ਵੋਟ ਹਾਸਲ ਨਾ ਕਰਨ ਦੀ ਸੂਰਤ ਵਿੱਚ ਸਰਕਾਰ ਦੀ ਹਾਰ ਮੰਨੀ ਜਾਵੇਗੀ, ਜਿਸ ਤੋਂ ਬਾਅਦ ਗਵਰਨਰ ਜਨਰਲ ਜੂਲੀ ਪੇਯੇਟੇ ਨੂੰ ਇਹ ਫੈਸਲਾ ਲੈਣਾ ਹੋਵੇਗਾ ਕਿ ਉਹ ਚੋਣਾਂ ਕਰਵਾਉਣ ਦਾ ਸੱਦਾ ਦੇਣਗੇ ਜਾਂ ਕੰਜਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਨੂੰ ਹਾਊਸ ਆਫ ਕਾਮਨਜ਼ ਵਿੱਚ ਭਰੋਸੇ ਦਾ ਵੋਟ ਜਿੱਤਣ ਦਾ ਮੌਕਾ ਦੇਣਗੇ।