ਓਟਵਾ, 12 ਨਵੰਬਰ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨਵੇਂ ਪਾਰਲੀਆਮੈਂਟ ਦੀ ਕਾਰਵਾਈ 5 ਦਸੰਬਰ, ਦਿਨ ਵੀਰਵਾਰ ਤੋਂ ਸ਼ੁਰੂ ਕਰਨਗੇ।
ਘੱਟ ਗਿਣਤੀ ਲਿਬਰਲਾਂ ਦੀ ਅਗਵਾਈ ਵਾਲੀ 43ਵੀਂ ਪਾਰਲੀਆਮੈਂਟ ਦੀ ਕਾਰਵਾਈ ਦੀ ਸ਼ੁਰੂਆਤ ਐਮਪੀਜ਼ ਵੱਲੋਂ ਹਾਊਸ ਆਫ ਕਾਮਨਜ਼ ਦਾ ਨਵਾਂ ਸਪੀਕਰ ਚੁਣ ਕੇ ਕੀਤੀ ਜਾਵੇਗੀ। ਫਿਰ ਗਵਰਨਰ ਜਨਰਲ ਜੂਲੀ ਪੇਯੇਟੇ ਸੈਨੇਟ ਵਿੱਚ ਟਰੂਡੋ ਦੇ ਰਾਜ ਭਾਸ਼ਣ ਦੀ ਅਗਵਾਈ ਕਰਨਗੇ। ਨਵੇਂ ਸਪੀਕਰ ਦੀ ਚੋਣ ਸੀਕ੍ਰੇਟ ਬੈਲਟ ਨਾਲ ਹੋਵੇਗੀ। ਇਸ ਭੂਮਿਕਾ ਨੂੰ ਨਿਭਾਉਣ ਲਈ ਦਿਲਚਸਪੀ ਰੱਖਣ ਵਾਲਿਆਂ ਵੱਲੋਂ ਪਹਿਲਾਂ ਹੀ ਸਮਰਥਨ ਹਾਸਲ ਕਰਨ ਲਈ ਆਪਣੇ ਕੁਲੀਗਜ਼ ਨਾਲ ਮੁਲਾਕਾਤ ਕੀਤੀ ਜਾ ਰਹੀ ਹੈ।
ਰਾਜ ਭਾਸ਼ਣ ਵਿੱਚ ਟਰੂਡੋ ਆਪਣੀ ਸਰਕਾਰ ਦੀਆਂ ਤਰਜੀਹਾਂ ਦਾ ਖੁਲਾਸਾ ਕਰਨਗੇ ਅਤੇ ਇਸ ਵਿੱਚ 2019 ਦੀਆਂ ਫੈਡਰਲ ਚੋਣਾਂ ਸਬੰਧੀ ਪਲੇਟਫਾਰਮ ਦੇ ਹੀ ਬਹੁਤੇ ਪੱਖ ਸ਼ਾਮਲ ਹੋਣਗੇ ਜਿਵੇਂ ਕਿ ਕਲਾਈਮੇਟ ਚੇਂਜ, ਅਫੋਰਡੇਬਿਲਟੀ, ਗੰਨ ਕੰਟਰੋਲ ਤੇ ਫਾਰਮਾਕੇਅਰ ਆਦਿ। ਇਨ੍ਹਾਂ ਮੁੱਦਿਆਂ ਉੱਤੇ ਹੀ 40 ਦਿਨ ਤੱਕ ਚੱਲੀ ਕੈਂਪੇਨ ਦੌਰਾਨ ਹੋਰਨਾਂ ਪਾਰਟੀਆਂ ਵੱਲੋਂ ਗੱਲ ਕੀਤੀ ਗਈ ਸੀ।
ਸੈਂਟਰ ਬਲਾਕ ਵਿੱਚ ਮੁਰੰਮਤ ਦਾ ਕੰਮ ਜਾਰੀ ਹੋਣ ਕਾਰਨ ਹਾਊਸ ਆਫ ਕਾਮਨਜ਼ ਤੇ ਸੈਨੇਟ ਹੁਣ ਵੱਖ ਵੱਖ ਇਮਾਰਤਾਂ ਵਿੱਚ ਸਥਿਤ ਹਨ। ਪਹਿਲਾਂ ਐਮਪੀਜ਼ ਇੱਕ ਚੇਂਬਰ ਤੋਂ ਦੂਜੇ ਚੇਂਬਰ ਵਿੱਚ ਚਲੇ ਜਾਂਦੇ ਸਨ ਪਰ ਹੁਣ ਉਨ੍ਹਾਂ ਨੂੰ ਵੈਸਟ ਬਲਾਕ ਸਥਿਤ ਵੈਲਿੰਗਟਨ ਸਟਰੀਟ ਤੋਂ ਸੈਨੇਟ ਆਫ ਕੈਨੇਡਾ ਦੀ ਇਮਾਰਤ ਵਿੱਚ ਜਾਣਾ ਹੋਵੇਗਾ। ਰਾਜ ਭਾਸ਼ਣ ਉੱਤੇ ਐਮਪੀਜ਼ ਵੱਲੋਂ ਛੇ ਦਿਨ ਤੱਕ ਬਹਿਸ ਕੀਤੀ ਜਾਵੇਗੀ। ਹਾਊਸ ਆਫ ਕਾਮਨਜ਼ ਦੇ ਕੈਲੰਡਰ ਮੁਤਾਬਕ ਮੈਂਬਰ ਪਾਰਲੀਆਮੈਂਟ ਆਉਣ ਵਾਲੇ ਦਿਨਾਂ ਵਿੱਚ ਕਈ ਹਫਤਿਆਂ ਦੀਆਂ ਛੁੱਟੀਆਂ ਤੋਂ ਪਹਿਲਾਂ 13 ਦਸੰਬਰ ਤੱਕ ਕੰਮ ਕਰਨਗੇ ਪਰ ਸੈਨੇਟ ਦੀ ਕਾਰਵਾਈ 20 ਦਸੰਬਰ ਤੱਕ ਚੱਲ ਸਕਦੀ ਹੈ।
ਇਸ ਪੂਰਾ ਹਫਤਾ ਪ੍ਰਧਾਨ ਮੰਤਰੀ ਨੇ ਸਾਂਝੇ ਮੰਤਵਾਂ ਨੂੰ ਤਲਾਸ਼ਣ ਲਈ ਵਿਰੋਧੀ ਧਿਰਾਂ ਦੇ ਆਗੂਆਂ ਨਾਲ ਮੁਲਾਕਾਤ ਕੀਤੀ। ਮੰਗਲਵਾਰ ਨੂੰ ਮੁੱਖ ਵਿਰੋਧੀ ਧਿਰ ਦੇ ਆਗੂ ਐਂਡਰਿਊ ਸ਼ੀਅਰ ਨਾਲ ਟਰੂਡੋ ਨੇ ਮੁਲਾਕਾਤ ਕੀਤੀ। ਇਸ ਦੌਰਾਨ ਸ਼ੀਅਰ ਨੇ ਹਾਊਸ ਆਫ ਕਾਮਨਜ਼ ਦੀ ਕਾਰਵਾਈ 25 ਨਵੰਬਰ ਤੋਂ ਸ਼ੁਰੂ ਕਰਨ ਲਈ ਟਰੂਡੋ ਨੂੰ ਅਪੀਲ ਕੀਤੀ। 30 ਮਿੰਟ ਤੱਕ ਚੱਲੀ ਮੁਲਾਕਾਤ ਤੋਂ ਬਾਅਦ ਸ਼ੀਅਰ ਨੇ ਟਰੂਡੋ ਦੇ ਆਫਿਸ ਤੋਂ ਜਾਂਦਿਆਂ ਆਖਿਆ ਕਿ ਰਾਜ ਭਾਸ਼ਣ ਲਈ ਉਨ੍ਹਾਂ ਦੀ ਪਾਰਟੀ ਦਾ ਸਮਰਥਨ ਲਿਬਰਲਾਂ ਲਈ ਪਹਿਲਾ ਭਰੋਸੇ ਦਾ ਵੋਟ ਹੋਵੇਗਾ ਜੋ ਉਨ੍ਹਾਂ ਨੂੰ ਪਾਸ ਕਰਨਾ ਹੋਵੇਗਾ। ਸੱਤਾ ਵਿੱਚ ਬਣੇ ਰਹਿਣ ਲਈ ਟਰੂਡੋ ਨੂੰ ਇਹ ਕਰਨਾ ਹੋਵੇਗਾ ਤੇ ਇਹ ਇਸ ਉੱਤੇ ਹੀ ਨਿਰਭਰ ਕਰੇਗਾ ਕਿ ਇਸ ਵਿੱਚ ਕੀ ਹੈ।