ਓਟਵਾ, 12 ਨਵੰਬਰ (ਪੋਸਟ ਬਿਊਰੋ) : ਸਸਕੈਚਵਨ ਦੇ ਪ੍ਰੀਮੀਅਰ ਸਕਾਟ ਮੋਅ ਨੇ ਆਖਿਆ ਕਿ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨਾਲ ਉਨ੍ਹਾਂ ਦੀ ਮੁਲਾਕਾਤ ਨਿਰਾਸ਼ਾਜਨਕ ਹੀ ਰਹੀ। ਮੋਅ ਨੇ ਆਖਿਆ ਕਿ ਟਰੂਡੋ ਨੇ ਪੱਛਮੀ ਪ੍ਰੋਵਿੰਸਾਂ ਦੀਆਂ ਲੋੜਾਂ ਪ੍ਰਤੀ ਕੋਈ ਵਚਨਬੱਧਤਾ ਨਹੀਂ ਪ੍ਰਗਟਾਈ।
ਮੋਅ ਨੇ ਆਖਿਆ ਕਿ ਉਨ੍ਹਾਂ ਆਪਣੀ ਪ੍ਰੋਵਿੰਸ ਦੇ ਲੋਕਾਂ ਦੇ ਸਹਿਯੋਗ ਲਈ ਟਰੂਡੋ ਨੂੰ ਕੁੱਝ ਬਦਲ ਮੁਹੱਈਆ ਕਰਵਾਏ ਸਨ ਪਰ ਟਰੂਡੋ ਨੇ ਕਿਸੇ ਪ੍ਰਤੀ ਵੀ ਹਾਮੀ ਨਹੀਂ ਭਰੀ। ਇਸ ਮੁਲਾਕਾਤ ਦੌਰਾਨ ਵੀ ਮੋਅ ਨੇ ਪਹਿਲਾਂ ਤੋਂ ਹੀ ਏਜੰਡੇ ਵਿੱਚ ਸ਼ਾਮਲ ਆਪਣੀਆਂ ਤਰਜੀਹਾਂ ਦਾ ਜਿ਼ਕਰ ਹੀ ਕੀਤਾ। ਇੱਥੇ ਦੱਸਣਾ ਬਣਦਾ ਹੈ ਕਿ ਪਿੱਛੇ ਜਿਹੇ ਹੋ ਕੇ ਹਟੀਆਂ ਚੋਣਾਂ ਵਿੱਚ ਲਿਬਰਲ ਪਾਰਟੀ ਸਸਕੈਚਵਨ ਤੇ ਅਲਬਰਟਾ ਵਿੱਚ ਖਾਤਾ ਵੀ ਨਹੀਂ ਖੋਲ੍ਹ ਸਕੀ।
ਮੋਅ ਨੇ ਆਖਿਆ ਕਿ ਉਹ ਇੱਥੇ ਟਰੂਡੋ ਨਾਲ ਮੁਲਾਕਾਤ ਕਰਕੇ ਇਹ ਜਾਨਣ ਆਏ ਸਨ ਕਿ ਪ੍ਰੋਵਿੰਸ ਦੀ ਇੰਡਸਟਰੀਜ਼ ਤੇ ਲੋਕਾਂ ਲਈ ਪ੍ਰਧਾਨ ਮੰਤਰੀ ਕੀ ਕਰਨਗੇ ਪਰ ਉਨ੍ਹਾਂ ਕੋਈ ਹੱਥ ਪੱਲਾ ਨਹੀਂ ਫੜਾਇਆ। ਮੋਅ ਨੇ ਕਾਰਬਨ ਟੈਕਸ ਵਿੱਚ ਇੱਕ ਸਾਲ ਤੱਕ ਰੋਕ ਲਾਉਣ, ਇਕੁਅਲਾਈਜ਼ੇਸ਼ਨ ਪੇਅਮੈਂਟਸ ਤੇ ਟਰਾਂਸ ਮਾਊਨਟੇਨ ਪਾਈਪਲਾਈਨ ਨੂੰ ਮੁਕੰਮਲ ਕਰਨ ਦੀਆਂ ਮੰਗਾਂ ਮੁੱਖ ਤੌਰ ਉੱਤੇ ਰੱਖੀਆਂ ਸਨ। ਹਾਲਾਂਕਿ ਪੱਛਮੀ ਪ੍ਰੋਵਿੰਸਾਂ ਦੇ ਵੱਖ ਹੋਣ, ਵੈਗਜਿ਼ਟ ਮੂਵਮੈਂਟ ਬਾਰੇ ਚਰਚਾ ਜ਼ੋਰਾਂ ਉੱਤੇ ਹੈ ਪਰ ਮੋਅ ਨੇ ਆਖਿਆ ਕਿ ਉਨ੍ਹਾਂ ਦੀ ਪਾਰਟੀ ਫੈਡਰੇਸ਼ਨ ਨਾਲ ਹੀ ਰਹਿਣਾ ਚਾਹੁੰਦੀ ਹੈ।