ਮੈਲਬੌਰਨ, 12 ਨਵੰਬਰ (ਪੋਸਟ ਬਿਊਰੋ)- ਆਸਟ੍ਰੇਲੀਆ ਦੇ ਜੰਗਲਾਂ 'ਚ ਲੱਗੀ ਵਿਨਾਸ਼ਕਾਰੀ ਅੱਗ ਦੇ ਪਿੱਛੇ ਕੁਝ ਹੱਦ ਤੱਕ ਭਾਰਤ ਤੋਂ ਮਾਨਸੂਨ ਦੇਰ ਨਾਲ ਪਰਤਣਾ ਜ਼ਿੰਮੇਦਾਰ ਮੰਨਿਆ ਜਾਣ ਲੱਗ ਪਿਆ ਹੈ। ਜੰਗਲਾਂ ਦੀ ਅੱਗ, ਕੁਦਰਤ ਦਾ ਅਧਿਐਨ ਕਰਨ ਵਾਲੇ ਇੱਕ ਮਹਾਰ ਨੇ ਇਹ ਗੱਲ ਕਹੀ ਹੈ।
ਮਿਲੀ ਖਬਰ ਅਨੁਸਾਰ ਮੈਲਬੌਰਨ ਯੂਨੀਵਰਸਿਟੀ ਨਾਲ ਜੁੜੇ ਫਿਊਲ, ਮੌਸਮ ਅਤੇ ਭੁਗੌਲਿਕ ਹਾਲਾਤ ਦੇ ਅਸਲ ਚਿੱਤਰਣ ਦਾ ਪ੍ਰਯੋਗ ਕਰਕੇ ਜੰਗਲੀ ਅੱਗ ਦੀ ਸੰਰਚਨਾ ਤੇ ਕੁਦਰਤ ਦਾ ਅਧਿਐਨ ਕਰਨ ਵਾਲੇ ਟ੍ਰੇਂਟ ਪੇਨਹਮ ਨੇ ਕਿਹਾ ਕਿ ਆਸਟ੍ਰੇਲੀਆ 'ਚ ਲੱਗੀ ਅੱਗ ਨੂੰ ਭਾਰਤ ਵਿੱਚ ਮਾਨਸੂਨ ਸੀਜ਼ਨ ਦੇਰ ਨਾਲ ਖਤਮ ਹੋਣ ਨਾਲ ਜੋੜ ਕੇ ਦੇਖਣ 'ਤੇ ਕੁਝ ਹੱਦ ਤੱਕ ਸਮਝਿਆ ਜਾ ਸਕਦਾ ਹੈ। ਆਸਟ੍ਰੇਲੀਆ ਦਾ ਨਿਊ ਸਾਊਥ ਵੇਲਸ ਸੂਬਾ ਇਸ ਵੇਲੇ ਸਭ ਤੋਂ ਭਿਆਨਕ ਅੱਗ ਨਾਲ ਜੂਝ ਰਿਹਾ ਹੈ। ਇਸ ਅੱਗ 'ਚ ਹਾਲੇ ਤੱਕ ਤਿੰਨ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ, ਹਜ਼ਾਰਾਂ ਲੋਕਾਂ ਨੂੰ ਆਪਣੇ ਘਰ ਛੱਡਣੇ ਪਏ ਤੇ 150 ਤੋਂ ਜ਼ਿਆਦਾ ਘਰ ਬਰਬਾਦ ਹੋ ਗਏ ਹਨ।
ਪੇਨਹਮ ਨੇ ਕਿਹਾ ਕਿ ਗਲੋਬਲ ਤੰਤਰ ਸਭ ਆਪਸ ਵਿੱਚ ਜੁੜੇ ਹੋਏ ਹਨ, ਅਸੀਂ ਉਨ੍ਹਾਂ ਨੂੰ ਵੱਖ ਕਰਕੇ ਨਹੀਂ ਦੇਖ ਸਕਦੇ, ਪਰ ਜੇਕਰ ਤੁਸੀਂ ਕਿਸੇ ਇੱਕ ਇਲਾਕੇ ਵਿੱਚ ਹੋ ਤਾਂ ਤੁਹਾਡੇ ਲਈ ਇਹ ਸੋਚਣਾ ਮੁਸ਼ਕਲ ਹੋਵੇਗਾ ਕਿ 10 ਹਜ਼ਾਰ ਕਿਲੋਮੀਟਰ ਦੂਰ ਜੋ ਮੌਸਮ ਹੈ ਉਹ ਅਸਲ 'ਚ ਇਥੇ ਵੀ ਅਸਰ ਪਾ ਰਿਹਾ ਹੈ। ਏਸ਼ੀਆ 'ਚ ਦੱਖਣੀ-ਪੱਛਮ ਮਾਨਸੂਨ ਹਰ ਸਾਲ ਜੂਨ ਤੋਂ ਸਤੰਬਰ ਦੇ ਵਿਚਾਲੇ ਖਤਮ ਹੋ ਜਾਂਦਾ ਹੈ ਤੇ ਉਹ ਹਵਾਵਾਂ ਦੁਬਾਰਾ ਦੱਖਣੀ ਖੇਤਰ ਵੱਲ ਵਧਦੀਆਂ ਹਨ। ਨਾਲ ਹੀ ਉਨ੍ਹਾਂ ਨੇ ਕਿਹਾ ਕਿ ਇਸ ਸਥਿਤੀ ਕਾਰਨ ਆਸਟ੍ਰੇਲੀਆ ਦੇ ਡਾਰਵਿਨ 'ਚ ਚੰਗਾ ਮੀਂਹ ਨਹੀਂ ਪਿਆ ਅਤੇ ਇਸ ਲਈ ਪੂਰਬੀ ਤੱਟ ਖੁਸ਼ਕ ਪੈ ਗਿਆ ਤੇ ਅੱਗ ਦੀ ਲਪੇਟ 'ਚ ਆਉਣ ਦਾ ਜੋਖਿਮ ਵੱਧ ਗਿਆ। ਪੇਨਹਮ ਨੇ ਕਿਹਾ ਕਿ ਇਸ ਵੇਲੇ ਇਨ੍ਹਾਂ ਖੇਤਰਾਂ 'ਚ ਆਮ ਕਰਕੇ ਜੋ ਮੀਂਹ ਪੈਂਦਾ ਹੈ, ਉਹ ਅਸਲ 'ਚ ਗਲੋਬਲ ਘਟਨਾ ਦੇ ਚੱਲਦੇ ਨਹੀਂ ਪਿਆ ਅਤੇ ਇਸ ਕਾਰਨ ਇਹ ਖੇਤਰ ਗਰਮ, ਖੁਸ਼ਕ ਤੇ ਤੇਜ਼ ਹਵਾਵਾਂ ਦੇ ਅਸਰ 'ਚ ਆ ਗਿਆ।