ਮੈਡ੍ਰਿਡ, 11 ਨਵੰਬਰ, (ਪੋਸਟ ਬਿਊਰੋ)- ਸਪੇਨ ਵਿਚ ਕੁਝ ਸਾਲਾਂ ਵਿਚ ਹੋਈ ਚੌਥੀ ਚੋਣ ਪਿੱਛੋਂ ਇਸ ਦੇਸ਼ ਦੇਅੰਦਰੂਨੀ ਉਲਝਣ ਦੀ ਸਥਿਤੀ ਵਿਚ ਫਸਣ ਦੀ ਸੰਭਾਵਨਾ ਪੈਦਾ ਹੋ ਗਈ ਹੈ।
ਵਰਨਣ ਯੋਗ ਹੈ ਕਿ ਸਪੇਨ ਪਹਿਲਾਂ ਤੋਂ ਗੜਬੜ ਵਰਗੀ ਸਿਆਸੀ ਹਾਲਤ ਦਾ ਸਾਹਮਣਾ ਕਰ ਰਿਹਾ ਹੈ ਅਤੇ ਇਸ ਐਤਵਾਰ ਨੂੰ ਹੋਈਆਂ ਚੋਣਾਂਵਿੱਚ ਕਿਸੇ ਨੂੰ ਵੀ ਬਹੁਮਤ ਮਿਲਣ ਦਾ ਸੰਕੇਤ ਨਹੀਂ ਮਿਲਿਆ, ਪਰ 10 ਸਾਲਾਂ ਵਿਚ ਪਹਿਲੀ ਵਾਰ ਸੱਜੇ ਪੱਖੀ ਵਾਕਸ ਪਾਰਟੀ ਇਕ ਵੱਡੇ ਸਿਆਸੀ ਖਿਡਾਰੀ ਵਜੋਂ ਸਾਹਮਣੇ ਆਈ ਹੈ।
ਇਨ੍ਹਾਂ ਚੋਣਾਂ ਤੋਂ ਪਹਿਲਾਂ ਰਾਜ ਕਰ ਰਹੀ ਪ੍ਰਧਾਨ ਮੰਤਰੀ ਪੈਡਰੋ ਸਾਂਚੇਜ ਦੀ ਸੋਸ਼ਲਿਸਟ ਪਾਰਟੀ ਨੇ ਤਾਜ਼ਾਂ ਚੋਣਾਂ ਦੇ ਦੌਰਾਨ ਫਿਰ ਸਭ ਤੋਂਵੱਧ 120 ਸੀਟਾਂ ਜਿੱਤੀਆਂ ਹਨ, ਪ੍ਰੰਤੂ 350 ਸੀਟਾਂ ਵਾਲੀ ਪਾਰਲੀਮੈਂਟ ਵਿਚ ਬਹੁਮਤ ਦੇ ਅੰਕੜੇ ਤੋਂ ਦੂਰ ਰਹਿ ਗਈ ਹੈ। ਸਰਕਾਰ ਬਣਾਉਣ ਲਈ ਇਸ ਪਾਰਟੀ ਨੂੰ ਕਈ ਧਿਰਾਂ ਨਾਲ ਸਮਝੌਤਾ ਕਰਨਾ ਪੈ ਸਕਦਾ ਹੈ। ਇਸ ਤੋਂ ਪਹਿਲਾਂ ਅਪ੍ਰੈਲ ਵਿਚ ਹੋਈਆਂ ਚੋਣਾਂ ਪਿੱਛੋਂ ਸਰਕਾਰ ਬਣਾਉਣ ਜੋਗਾ ਸਮਰਥਨ ਨਾ ਮਿਲਣ ਕਾਰਨ ਹੀ ਸਾਂਚੇਜ ਨੇ ਇਹ ਨਵੀਂਆਂ ਚੋਣਾਂ ਕਰਵਾਈਆਂ ਸਨ। ਇਸ ਐਤਵਾਰ ਨੂੰ ਦਿੱਤੇ ਭਾਸ਼ਣ ਵਿਚ ਸਾਂਚੇਜ ਨੇ ਫਿਰ ਪ੍ਰਾਗਰੈੱਸਿਵ ਸਰਕਾਰ ਬਣਾਉਣ ਦਾ ਵਾਅਦਾ ਕੀਤਾ ਸੀ। ਆਪਣੀ ਪਾਰਟੀ ਦੀ ਅਗਲੀ ਐਗਜ਼ੈਕਟਿਵ ਬੈਠਕ ਪਿੱਛੋਂ ਉਨ੍ਹਾਂ ਦੀ ਯੋਜਨਾ ਸਾਹਮਣੇ ਆ ਸਕਦੀ ਹੈ। ਚੋਣ ਤੋਂ ਪਹਿਲਾਂ ਦੇ ਅੰਦਾਜ਼ਿਆਂ ਦੇ ਬਾਵਜੂਦ ਸਾਂਚੇਜ ਨੇ ਚੋਣ ਵਿਚ ਬਹੁਮਤ ਮਿਲਣ ਦੀ ਆਸ ਪ੍ਰਗਟਾਈ ਸੀ, ਪ੍ਰੰਤੂ ਅਪ੍ਰੈਲ ਦੀਆਂ ਚੋਣਾਂਤੋਂ ਉਨ੍ਹਾਂ ਦੀ ਪਾਰਟੀ ਨੂੰ ਤਿੰਨ ਸੀਟਾਂ ਘੱਟ ਮਿਲੀਆਂ ਹਨ ਤੇ ਕਰੀਬੀ ਸਹਿਯੋਗੀ ਖੱਬੇ ਪੱਖੀ ਯੂਨਾਈਟਿਡ ਵੀ ਕੈਨ ਪਾਰਟੀ 42 ਤੋਂ ਘੱਟ ਕੇ 35 ਉੱਤੇ ਰਹਿ ਗਈ ਹੈ।
ਸਪੇਨ ਦੇ ਮੀਡੀਆ ਮੁਤਾਬਕ ਲੋਕ ਰਾਏ ਵਿੱਚ ਸਾਂਚੇਜ ਫੇਲ੍ਹ ਹੋਏ ਹਨ ਤੇ ਸਰਕਾਰ ਬਣਾਉਣਾ ਔਖਾ ਹੋ ਗਿਆ ਹੈ। ਅਗਲੇ ਹਫ਼ਤਿਆਂ ਵਿਚ ਪਾਰਲੀਮੈਂਟ ਮੈਂਬਰਾਂ ਨੂੰ ਸਦਨ ਦੇ ਸਪੀਕਰ ਦੀ ਚੋਣ ਕਰਨੀ ਪਵੇਗੀ ਤੇ ਫਿਰ ਕਿੰਗ ਫਿਲਿਪ ਅਤੇ ਪਾਰਟੀ ਆਗੂਆਂ ਵਿਚਾਲੇ ਗੱਲਬਾਤ ਹੋਵੇਗੀ। ਆਸ ਹੈ ਕਿ ਸਾਂਚੇਜ ਨੂੰ ਨਵੀਂ ਸਰਕਾਰ ਬਣਾਉਣ ਨੂੰ ਕਿਹਾ ਜਾਏਗਾ।ਇਸ ਚੋਣ ਵਿਚ ਦੂਜਾ ਸਭ ਤੋਂ ਵੱਡਾ ਪੱਖ ਇਹ ਹੈ ਕਿ ਸੈਂਟਿਆਗੋ ਅਬਾਸਕਲ ਦੀ ਅਗਵਾਈ ਵਾਲੀ ਸੱਜੇ ਪੱਖੀ ਵਾਕਸ ਪਾਰਟੀ ਦੀਆਂ ਸੀਟਾਂ ਦੀ ਗਿਣਤੀ ਵਧ ਕੇ 52 ਹੋ ਗਈ ਅਤੇ ਇਹ ਪਾਰਟੀ ਤੀਜੀ ਵੱਡੀ ਸ਼ਕਤੀ ਬਣੀ ਹੈ।