ਜਲੰਧਰ, 11 ਨਵੰਬਰ (ਪੋਸਟ ਬਿਊਰੋ)- ਕੈਪਟਨ ਅਮਰਿੰਦਰ ਸਿੰਘ ਕ੍ਰਿਕਟ ਨਹੀਂ ਖੇਡਦੇ ਹਨ, ਪਰ ਉਨ੍ਹਾਂ ਨੂੰ ਇਹ ਪਤਾ ਹੈ ਕਿ ਗੁਗਲੀ ਸੁੱਟ ਕੇ ਕਿਸੇ ਨੂੰ ਆਊਟ ਕਿਵੇਂ ਕੀਤਾ ਜਾ ਸਕਦਾ ਹੈ। ਉਨ੍ਹਾਂ ਕੋਲ ਕ੍ਰਿਕਟ ਦੀ ਸਮਝ ਭਾਵੇਂ ਨਵਜੋਤ ਸਿੰਘ ਸਿੱਧੂ ਤੋਂ ਘੱਟ ਹੋਵੇ, ਪਰ ਰਾਜਨੀਤਕ ਸਮਝ ਨਾਲ ਉਨ੍ਹਾਂ ਨੇ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਤੇ ਕ੍ਰਿਕਟਰ ਇਮਰਾਨ ਖਾਨ ਨੂੰ ਬੋਲਡ ਕਰ ਦਿੱਤਾ। ਜ਼ੀਰੋ ਲਾਈਨ ਤੋਂ ਗੁਰਦੁਆਰਾ ਕਰਤਾਰਪੁਰ ਸਾਹਿਬ ਤੱਕ ਪੰਜ ਮਿੰਟ ਤੋਂ ਘੱਟ ਸਮੇਂ ਵਿੱਚ ਬਸ ਦਾ ਸਫਰ ਕਰਦੇ ਹੋਏ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨਾਲ ਇਮਰਾਨ ਖਾਨ ਦੇ ਨਾਲ ਆਪਣੇ ਪਰਵਾਰ ਦੇ ਸੰਬੰਧਾਂ ਨੂੰ ਚੇਤੇ ਕਰਵਾ ਕੇ ਇੱਕ ਤਰ੍ਹਾਂ ਦੀ ਰਾਜਨੀਤਕ ਮਜ਼ਬੂਤੀ ਦੇ ਲਈ।
ਵਰਨਣ ਯੋਗ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਤੇ ਇਮਰਾਨ ਖਾਨ ਨਾ ਪਹਿਲਾਂ ਇੱਕ ਦੂਸਰੇ ਨੂੰ ਨਿੱਜੀ ਤੌਰ ਉਤੇ ਜਾਣਦੇ ਹਨ ਅਤੇ ਨਾ ਇੱਕ ਦੂਸਰੇ ਨੂੰ ਮਿਲੇ ਹਨ, ਪਰ ਇਹ ਪੰਜ ਮਿੰਟ ਇਮਰਾਨ-ਸਿੱਧੂ ਦੀ ਜੋੜੀ ਦੀ ਸਾਲਾਂ ਦੀ ਦੋਸਤੀ 'ਤੇ ਭਾਰੀ ਸਾਬਤ ਹੋ ਗਏ। ਕ੍ਰਿਕਟ ਤੋਂ ਸ਼ੁਰੂ ਹੋਈ ਗੱਲ ਤੋਂ ਪਤਾ ਲੱਗਾ ਕਿ ਇਮਰਾਨ ਖਾਨ ਤੇ ਕੈਪਟਨ ਅਮਰਿੰਦਰ ਸਿੰਘ ਦੇ ਪਰਵਾਰਾਂ ਦੀ ਵੀ ਕ੍ਰਿਕਟ ਦੀ ਸਾਂਝ ਸੀ। ਇਮਰਾਨ ਖਾਨ ਨੂੰ ਕੈਪਟਨ ਅਮਰਿੰਦਰ ਸਿੰਗ ਨੇ ਦੱਸਿਆ ਕਿ ਉਹ ਉਨ੍ਹਾਂ ਨੂੰ ਕ੍ਰਿਕਟ ਖੇਡਣ ਦੇ ਦਿਨਾਂ ਤੋਂ ਜਾਣਦੇ ਹਨ। ਇਹ ਪਹਿਲਾ ਮੌਕਾ ਸੀ ਕਿ ਦੋਵੇਂ ਜਣੇ ਇੱਕੋ ਬਸ ਵਿੱਚ ਆਹਮੋ-ਸਾਹਮਣੇ ਖੜ੍ਹੇ ਸਨ। ਕੈਪਟਨ ਅਮਰਿੰਦਰ ਸਿੰਘ ਨੇ ਇਮਰਾਨ ਨੁੂੰ ਉਹ ਦੌਰ ਯਾਦ ਕਰਾਇਆ, ਜਦ ਇਮਰਾਨ ਦੇ ਰਿਸ਼ਤੇਦਾਰ ਜਹਾਂਗੀਰ ਖਾਨ, ਜੋ ਅੰਗਰੇਜ਼ਾਂ ਦੇ ਦੌਰ ਵਿੱਚ ਕ੍ਰਿਕਟ ਖੇਡਦੇ ਸਨ, ਉਹ ਪਟਿਆਲਾ ਰਿਆਸਤ ਦੇ ਲਈ ਵੀ ਖੇਡੇ ਸਨ। ਉਨ੍ਹਾਂ ਦੇ ਨਾਲ ਮੁਹੰਮਦ ਨਿਸਾਰ, ਲਾਲਾ ਅਮਰਨਾਥ, ਤੇਜ ਗੇਂਦਬਾਜ਼ ਅਮਰ ਸਿੰਘ, ਬੱਲੇਬਾਜ਼ ਵਜ਼ੀਰ ਅਲੀ ਤੇ ਅਮੀਰ ਅਲੀ ਸਨ। ਇਸ ਬਾਰੇ ਕੈਪਟਨ ਅਮਰਿੰਦਰ ਸਿੰਘ ਨੇ ਦੱਸਿਆ ਕਿ ਉਸ ਵੇਲੇ ਸੱਤ ਖਿਡਾਰੀ ਉਸ ਟੀਮ ਦੇ ਮੈਂਬਰ ਸਨ, ਜਿਸ ਦੀ ਕਪਤਾਨੀ ਕੈਪਟਨ ਅਮਰਿੰਦਰ ਸਿੰਘ ਦੇ ਪਿਤਾ ਮਹਾਰਾਜਾ ਯਾਦਵਿੰਦਰ ਸਿੰਘ ਨੇ 1935 ਵਿੱਚ ਭਾਰਤ ਅਤੇ ਪਟਿਆਲਾ ਲਈ ਕੀਤੀ ਸੀ। ਇਹ ਸੁਣ ਕੇ ਇਮਰਾਨ ਖਾਨ ਕਾਫੀ ਉਤਸ਼ਾਹਤ ਹੋਏ। ਬਸ ਦੀ ਇਹ ਯਾਤਰਾ ਪੰਜ ਮਿੰਟ ਤੋਂ ਵੀ ਘੱਟ ਸਮੇਂ ਦੀ ਸੀ, ਪਰ ਕ੍ਰਿਕਟ ਦੀ ਚਰਚਾ ਦੇ ਦਰਮਿਆਨ ਸੰਬੰਧ ਨਿੱਘੇ ਬਣਾਉਣ ਦੇ ਲਈ ਇਹ ਵੀ ਕਾਫੀ ਸਾਬਿਤ ਹੋਏ।