* ਪਾਕਿ ਅਧਿਕਾਰੀਆਂ ਨੇ ਲੱਭਣ ਪਿੱਛੋਂ ਪੁੱਛਗਿੱਛ ਕਰ ਕੇ ਵਾਪਸ ਭੇਜੇ
ਸ੍ਰੀ ਕਰਤਾਰਪੁਰ ਸਾਹਿਬ, 11 ਨਵੰਬਰ (ਪੋਸਟ ਬਿਊਰੋ)- ਗੁਰਦੁਆਰਾ ਕਰਤਾਰਪੁਰ ਸਾਹਿਬ ਵਿੱਚ ਓਦੋਂ ਭਾਜੜ ਮੱਚ ਗਈ, ਜਦੋਂ ਲਾਂਘਾ ਖੁੱਲ੍ਹਣ ਵੇਲੇ ਭਾਰਤ ਤੋਂ ਆਏ ਜਥੇ ਦੇ ਕੁਝ ਯਾਤਰੀ ਗਾਇਬ ਹੋ ਗਏ। ਇਨ੍ਹਾਂ ਦੀ ਤੇਜ਼ੀ ਨਾਲ ਭਾਲ ਕਰ ਕੇ ਲੱਭੇ ਅਤੇ ਬੜੀ ਮੁਸ਼ਕਲ ਨਾਲ ਪਾਕਿਸਤਾਨੀ ਅਧਿਕਾਰੀਆਂ ਨੇ ਕਾਬੂ ਕੀਤੇ। ਇਸ ਦੇ ਬਾਅਦ ਪਾਕਿਸਤਾਨ ਦੇ ਸਰਕਾਰੀ ਅਧਿਕਾਰੀਆਂ ਨੇ ਇਨ੍ਹਾਂ ਤੋਂ ਪੁੱਛਗਿੱਛ ਕਰ ਕੇ ਵਾਪਸ ਭੇਜ ਦਿੱਤਾ।
ਪਤਾ ਲੱਗਾ ਹੈ ਕਿ ਸ਼ਨੀਵਾਰ ਸ਼ਾਮ ਜਦੋਂ ਭਾਰਤ ਤੋਂ ਆਏ ਯਾਤਰੀਆਂ ਦੀ ਗਿਣਤੀ ਕਰ ਕੇ ਵਾਪਸ ਭੇਜਿਆ ਗਿਆ ਤਾਂ ਉਸ ਵਿੱਚੋਂ ਕੁਝ ਯਾਤਰੀ ਨਾ ਮਿਲਣ ਕਾਰਨ ਜਥੇ ਦੀ ਸੁਰੱਖਿਆ ਵਾਲੇ ਅਧਿਕਾਰੀਆਂ ਨੂੰ ਭਾਜੜ ਪੈ ਗਈ। ਭਾਰਤ ਤੋਂ ਆਏ ਜਥੇ ਦੇ ਠਹਿਰਾਉਣ ਲਈ ਬਣੇ ਟੈਂਟ ਸਿਟੀ ਵਿੱਚ ਪੁਲਸ ਅਧਿਕਾਰੀ ਇਨ੍ਹਾਂ ਗੁੰਮ ਹੋਏ ਯਾਤਰੀਆਂ ਦੀ ਭਾਲ ਕਰਦੇ ਹੋਏ ਬਾਕੀ ਯਾਤਰੀਆਂ ਤੋਂ ਇਨ੍ਹਾਂ ਬਾਰੇ ਪੁੱਛਗਿੱਛੇ ਕਰਨ ਲੱਗੇ। ਗੁਰਦੁਆਰਾ ਦਰਬਾਰ ਸਾਹਿਬ ਕਰਤਾਰਪੁਰ ਸਾਹਿਬ ਦੇ ਚੱਪੇ ਚੱਪੇ ਵਿੱਚ ਗੁੰਮ ਹੋਏ ਯਾਤਰੀਆਂ ਦੀ ਭਾਲ ਕੀਤੀ ਤਾਂ ਦੇਰ ਰਾਤ ਇਹ ਲੋਕ ਸ੍ਰੀ ਦਰਬਾਰ ਸਾਹਿਬ ਸ੍ਰੀ ਕਰਤਾਰਪੁਰ ਦੇ ਬਾਥਰੂਮਾਂ ਵਿੱਚੋਂ ਲੁਕੇ ਹੋਏ ਮਿਲੇ, ਜਿਨ੍ਹਾਂ ਨੂੰ ਪੁੱਛ ਪੜਤਾਲ ਕਰ ਕੇ ਵਾਪਸ ਭੇਜਿਆ ਗਿਆ ਹੈ।