ਵਾਸ਼ਿੰਗਟਨ, 11 ਨਵੰਬਰ, (ਪੋਸਟ ਬਿਊਰੋ)- ਅਮਰੀਕਾ ਦੇ ਇਮੀਗ੍ਰੇਸ਼ਨ ਐਂਡ ਕਸਟਮਜ਼ ਇਨਫੋਰਸਮੈਂਟ (ਆਈ ਸੀ ਈ) ਦੇ ਮੁਤਾਬਕ ਇਸ ਸਾਲ ਜਨਵਰੀ ਵਿਚ ਅਮਰੀਕਾ ਵਿਚ ਫਾਰਮਿੰਗਟਨ ਯੂਨੀਵਰਸਿਟੀ ਦੀ ਕਾਰਵਾਈ ਪਿੱਛੋਂ ਇਮੀਗ੍ਰੇਸ਼ਨ ਫਰਾਡ ਦੇ ਕੇਸ ਵਿਚ ਗ੍ਰਿਫਤਾਰ ਕੀਤੇ ਗਏ 8 ਭਾਰਤੀਆਂ ਵਿਚੋਂ 6 ਨੂੰ ਜੇਲ ਦੀ ਸਜ਼ਾ ਹੋਈ ਹੈ। ਦੋ ਹੋਰ ਨੂੰ ਜਲਦੀ ਸਜ਼ਾ ਸੁਣਾਈ ਜਾਵੇਗੀ। ਇਹ ਸਾਰੇ ਭਾਰਤੀ ਲੋਕ ਮੂਲ ਰੂਪ ਨਾਲ ਤੇਲੰਗਾਨਾ ਅਤੇ ਆਂਧਰਾ ਪ੍ਰਦੇਸ਼ ਦੇ ਹਨ।
ਵਰਨਣ ਯੋਗ ਹੈ ਕਿ ਫਾਰਮਿੰਗਟਨ ਯੂਨੀਵਰਸਿਟੀ ਦੀ ਸਥਾਪਨਾ ਮਿਸ਼ੀਗਨ ਵਿਚ ਆਈ ਸੀ ਈ ਨੇ 2015 ਵਿਚ ਕੀਤੀ ਸੀ। ਇਸ ਦਾ ਉਦੇਸ਼ ਇਮੀਗ੍ਰੇਸ਼ਨ ਫਰਾਡ ਦਾ ਪਰਦਾ ਫਾਸ਼ ਕਰਨ ਲਈ ਅੰਡਰਕਵਰ ਆਪਰੇਸ਼ਨ ਦਾ ਹਿੱਸਾ ਬਣਨਾ ਸੀ। ਅਧਿਕਾਰੀਆਂ ਨੇ ਦਾਅਵਾ ਕੀਤਾ ਕਿ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਨੇ ਗੈਰ ਕਾਨੂੰਨੀ ਤਰੀਕੇ ਨਾਲ ਅਮਰੀਕਾ ਵਿਚ ਰਹਿਣ ਲਈ ਭਰਤੀ ਕਰਨ ਵਾਲਿਆਂ ਦੇ ਰਾਹੀਂ ਯੂਨੀਵਰਸਿਟੀ ਵਿੱਚ ਦਾਖਲਾ ਲਿਆ ਸੀ। ਫ੍ਰੀਮੌਂਟ ਦੇ ਰਹਿਣ ਵਾਲੇ ਸੰਤੋਸ਼ ਸਾਮਾ ਨੂੰ 24 ਮਹੀਨੇ ਜੇਲ ਦੀ ਸਜ਼ਾ ਹੋਈ ਹੈ, ਲੇਕ ਮੈਰੀ ਦੇ ਬੈਰਾਥ ਕਾਕੀਰੈਡੀ ਅਤੇ ਕੁਲਪੇਪਰ ਦੇ ਸੁਰੇਸ਼ ਕਾਂਡਲਾ ਦੋਵਾਂ ਨੂੰ 18 ਮਹੀਨੇ ਸਜ਼ਾ ਹੋਈ ਹੈ। ਹੈਰਿਸਬਰਗ ਦੇ ਅਵਿਨਾਸ਼ ਠੱਕਲਾਪੱਲੀ ਨੂੰ 15 ਮਹੀਨੇ ਅਤੇ ਅਟਲਾਂਟਾ ਦੇ ਅਸਵਾਨਾਥ ਨੁਨੇ ਅਤੇ ਡਲਾਸ ਦੇ ਨਵੀਨ ਪ੍ਰਥੀਪਤੀ ਦੋਵਾਂ ਨੂੰ 12 ਮਹੀਨੇ ਦੀ ਸਜ਼ਾ ਹੋਈ ਹੈ।
ਇਕ ਸਮਾਚਾਰ ਏਜੰਸੀ ਨਾਲ ਗੱਲਬਾਤ ਵਿਚ ਆਈ ਸੀ ਈ ਦੇ ਪੂਰਬੀ ਉੱਤਰੀ ਪਸਾਰ ਦੇ ਡਾਇਰੈਕਟਰ ਖਲੀਲ ਵਾਲਜ਼ ਨੇ ਲਿਖਿਆ, ‘ਬਚਾਅ ਪੱਖ ਦੇ ਸਾਰੇ 8 ਨੌਜਵਾਨਾਂ ਨੂੰ ਦੋਸ਼ੀ ਠਹਿਰਾਇਆ ਗਿਆ ਹੈ।` ਵਾਲਜ਼ ਦੇ ਮੁਤਾਬਕ ‘7ਵੇਂ ਦੋਸ਼ੀ ਸ਼ਾਰਲੋਟ ਦੇ ਪ੍ਰੇਮ ਰਾਮਪੀਸਾ ਨੂੰ ਇਸ ਸਾਲ 19 ਨਵੰਬਰ ਤੇ ਆਖਰੀ ਦੋਸ਼ੀ ਲੁਇਸਵਿਲੇ ਦੇ ਫਨੀਦੀਪ ਕਰਨਤੀ ਨੂੰ ਜਨਵਰੀ 2020 ਵਿਚ ਸਜ਼ਾ ਦੱਸੀ ਜਾਵੇਗੀ। ਇਨ੍ਹਾਂ ਸਭ ਨੂੰ ਜੇਲ ਦੀ ਸਜ਼ਾ ਮੁੱਕਦੇ ਸਾਰ ਭਾਰਤ ਭੇਜ ਦਿੱਤਾ ਜਾਵੇਗਾ।` ਇਸ ਸਾਲ ਦੇ ਸ਼ੁਰੂ ਵਿਚ ਫਾਰਮਿੰਗਟਨ ਯੂਨੀਵਰਸਿਟੀ ਦੇ ਤਕਰੀਬਨ 145 ਭਾਰਤੀ ਵਿਦਿਆਰਥੀਆਂ ਨੂੰ ਗੈਰ ਪ੍ਰਵਾਸੀ ਰੁਤਬਾ ਕਾਇਮ ਰੱਖਣ ਵਿਚ ਅਸਫਲ ਰਹਿਣ ਕਾਰਨ ਗ੍ਰਿਫਤਾਰ ਕੀਤਾ ਗਿਆ ਅਤੇ ਬਾਹਰ ਕੱਢ ਦਿੱਤਾ ਗਿਆ ਸੀ।