ਟੋਰਾਂਟੋ, 11 ਨਵੰਬਰ (ਪੋਸਟ ਬਿਊਰੋ) : ਲੰਮਾਂ ਸਮਾਂ ਐਨਐਚਐਲ ਬ੍ਰਾਡਕਾਸਟਰ ਰਹੇ ਡੌਨ ਚੈਰੀ ਨੂੰ ਇਮੀਗ੍ਰੈੈਂਟਸ ਬਾਰੇ ਗਲਤ ਟਿੱਪਣੀਆਂ ਕਰਨ ਕਾਰਨ ਨੌਕਰੀ ਤੋਂ ਕੱਢ ਦਿੱਤਾ ਗਿਆ ਹੈ।
“ਕੋਚਜ਼ ਕਾਰਨਰ” ਦੇ ਹੋਸਟ ਵੱਲੋਂ ਵੀਕੈਂਡ ਉੱਤੇ ਕੀਤੀਆਂ ਗਈਆਂ ਇਤਰਾਜ਼ਯੋਗ ਟਿੱਪਣੀਆਂ ਕਾਰਨ ਹੀ ਉਨ੍ਹਾਂ ਨੂੰ ਇਹ ਸਜ਼ਾ ਮਿਲੀ। ਵੀਕੈਂਡ ਉੱਤੇ ਡੌਨ ਚੈਰੀ ਨੇ ਆਖਿਆ ਕਿ ਇਮੀਗ੍ਰੈਂਟਸ ਪੌਪੀਜ਼ ਦੇ ਬੈਜ ਨਹੀਂ ਲਾਉਂਦੇ ਕਿਉਂਕਿ ਉਹ ਸਾਡੇ ਸੈਨਿਕਾਂ ਦਾ ਸਨਮਾਨ ਨਹੀਂ ਕਰਦੇ। ਸ਼ਨਿੱਚਰਵਾਰ ਦੀ ਰਾਤ ਨੂੰ ਸਪੋਰਟਸਨੈੱਟ ਉੱਤੇ ਬ੍ਰੌਡਕਾਸਟ ਦੌਰਾਨ ਚੈਰੀ ਨੇ ਆਖਿਆ ਕਿ ਤੁਸੀਂ ਲੋਕ ਜਿਹੜੇ ਇੱਥੇ ਆਉਂਦੇ ਹੋਂ ਸਾਡੇ ਕੰਮ ਕਰਨ ਦਾ ਢੰਗ ਤੁਹਾਨੂੰ ਬਹੁਤ ਪਸੰਦ ਆਉਂਦਾ ਹੈ, ਤੁਹਾਨੂੰ ਸਾਡਾ ਦੁੱਧ ਤੇ ਸ਼ਹਿਦ ਪਸੰਦ ਹੈ ਤੇ ਘੱਟੋ ਘੱਟ ਤੁਸੀਂ ਕੁੱਝ ਪੈਸੇ ਦੇ ਕੇ ਪੌਪੀ ਤੇ ਅਜਿਹਾ ਹੀ ਕੁੱਝ ਖਰੀਦ ਸਕਦੇ ਹੋਂ। ਜਿਸ ਖੂਬਸੂਰਤ ਜਿ਼ੰਦਗੀ ਦਾ ਤੁਸੀਂ ਕੈਨੇਡਾ ਆ ਕੇ ਆਨੰਦ ਮਾਣਦੇ ਹੋਂ ਉਸ ਲਈ ਸਾਡੇ ਸੈਨਿਕਾਂ ਨੇ ਬਹੁਤ ਵੱਡੀ ਕੀਮਤ ਅਦਾ ਕੀਤੀ ਹੈ।
ਐਤਵਾਰ ਨੂੰ ਸਪੋਰਟਸਨੈੱਟ ਨੈੱਟਵਰਕ ਦੇ ਪ੍ਰੈਜ਼ੀਡੈਂਟ ਬਾਰਟ ਯੇਬਸਲੇਅ ਨੇ ਚੈਰੀ ਦੀਆਂ ਟਿੱਪਣੀਆਂ ਨੂੰ ਪੱਖਪਾਤੀ ਦੱਸਿਆ ਤੇ ਸੋਮਵਾਰ ਨੂੰ ਐਲਾਨ ਕੀਤਾ ਕਿ ਹੁਣ ਚੈਰੀ ਨੂੰ ਆਨ ਏਅਰ ਨਹੀਂ ਹੋਣ ਦਿੱਤਾ ਜਾਵੇਗਾ। ਇੱਕ ਬਿਆਨ ਵਿੱਚ ਯੇਬਸਲੇਅ ਨੇ ਆਖਿਆ ਕਿ ਇਨ੍ਹਾਂ ਟਿੱਪਣੀਆਂ ਬਾਰੇ ਚੈਰੀ ਨਾਲ ਤਫਸੀਲ ਵਿੱਚ ਗੱਲਬਾਤ ਕਰਨ ਤੋਂ ਬਾਅਦ ਇਹ ਫੈਸਲਾ ਕੀਤਾ ਗਿਆ ਹੈ ਕਿ ਉਨ੍ਹਾਂ ਨੂੰ ਨੌਕਰੀ ਵਿੱਚੋਂ ਕੱਢੇ ਜਾਣ ਦਾ ਇਹ ਸਹੀ ਸਮਾਂ ਹੈ।
ਬ੍ਰੌਡਕਾਸਟ ਦੌਰਾਨ ਉਨ੍ਹਾਂ ਵੱਲੋਂ ਕੀਤੀਆਂ ਗਈਆਂ ਟਿੱਪਣੀਆਂ ਸਾਡੀਆਂ ਕਦਰਾਂ ਕੀਮਤਾਂ ਨੂੰ ਨਹੀਂ ਦਰਸਾਉਂਦੀਆਂ। ਯੇਬਸਲੇਅ ਨੇ 85 ਸਾਲਾ ਚੈਰੀ ਵੱਲੋਂ ਹਾਕੀ ਤੇ ਕੈਨੇਡਾ ਵਿੱਚ ਸਪੋਰਟਸ ਬ੍ਰਾਡਕਾਸਟਿੰਗ ਦੇ ਖੇਤਰ ਵਿੱਚ ਪਾਏ ਯੋਗਦਾਨ ਲਈ ਉਨ੍ਹਾਂ ਦਾ ਧੰਨਵਾਦ ਵੀ ਕੀਤਾ।