ਓਨਟਾਰੀਓ, 11 ਨਵੰਬਰ (ਪੋਸਟ ਬਿਊਰੋ) : ਇੱਕ ਸਾਲ ਪਹਿਲਾਂ ਛਪੇ ਸੰਸਮਰਣ ਸਬੰਧੀ ਪੀਸੀ ਦੇ ਸਾਬਕਾ ਆਗੂ ਪੈਟ੍ਰਿਕ ਬ੍ਰਾਊਨ ਖਿਲਾਫ 8 ਮਿਲੀਅਨ ਡਾਲਰ ਦਾ ਮਾਨਹਾਨੀ ਦਾ ਕੇਸ ਕਰਨ ਦਾ ਮਨ ਬਣਾ ਚੁੱਕੇ ਆਰਥਿਕ ਵਿਕਾਸ ਮੰਤਰੀ ਵਿੱਕ ਫੈਡੇਲੀ ਅਜਿਹਾ ਕਰਨਗੇ ਜਾਂ ਨਹੀਂ ਇਸ ਬਾਰੇ ਉਨ੍ਹਾਂ ਚੁੱਪ ਧਾਰ ਰੱਖੀ ਹੈ।
ਇਸ ਕਾਨੂੰਨੀ ਕਾਰਵਾਈ ਸਬੰਧੀ ਗੱਲ ਕਰਦਿਆਂ ਬੀਤੇ ਦਿਨੀਂ ਫੈਡੇਲੀ ਨੇ ਆਖਿਆ ਕਿ ਬ੍ਰਾਊਨ ਨੇ ਆਪਣੀ ਬੁੱਕ ਵਿੱਚ ਇਹ ਦੋਸ਼ ਲਾਇਆ ਸੀ ਕਿ ਉਨ੍ਹਾਂ (ਫੈਡੇਲੀ) ਵੱਲੋਂ ਇੱਕ ਕਰਮਚਾਰੀ ਦਾ ਜਿਨਸੀ ਸ਼ੋਸ਼ਣ ਕੀਤਾ ਗਿਆ ਸੀ। ਉਨ੍ਹਾਂ ਆਖਿਆ ਕਿ ਇਹ ਉਨ੍ਹਾਂ ਦੇ ਅਕਸ ਨੂੰ ਗੰਧਲਾ ਕਰਨ ਲਈ ਕੀਤਾ ਗਿਆ ਸੀ। ਉਨ੍ਹਾਂ ਆਖਿਆ ਕਿ ਉਹ ਇਸ ਲਈ ਚੁੱਪ ਹਨ ਕਿ ਇਹ ਮਾਮਲਾ ਅਦਾਲਤ ਦੇ ਵਿਚਾਰ ਅਧੀਨ ਹੈ।
ਦੂਜੇ ਪਾਸੇ ਬ੍ਰਾਊਨ ਦੇ ਵਕੀਲ ਹੌਵਰਡ ਵਿੰਕਲਰ ਨੇ ਕੋਰਟਸ ਆਫ ਜਸਟਿਸ ਐਕਟ ਤਹਿਤ ਕੇਸ ਨੂੰ ਡਿੱਸਮਿੱਸ ਕਰਵਾਉਣ ਲਈ ਇੱਕ ਮਤਾ ਲਿਆਂਦਾ। ਉਨ੍ਹਾਂ ਇਸ ਨੂੰ ਜਨਤਾ ਦੀ ਸ਼ਮੂਲੀਅਤ ਦੇ ਖਿਲਾਫ ਰਣਨੀਤਕ ਕੇਸ ਦੱਸਿਆ। ਇਹ ਪ੍ਰੋਵਿਜ਼ਨ ਚਾਰ ਸਾਲ ਪਹਿਲਾਂ ਲਾਗੂ ਹੋਈ ਸੀ, ਉਹ ਵੀ ਇਸ ਲਈ ਤਾਂ ਕਿ ਜਨਤਕ ਹਿਤਾਂ ਵਾਲੇ ਮੁੱਦਿਆਂ ਵਿੱਚ ਵਿਚਾਰ ਪ੍ਰਗਟਾਉਣ ਦੀ ਆਜ਼ਾਦੀ ਨਾਲ ਤਾਲਮੇਲ ਬਿਠਾਇਆ ਜਾ ਸਕੇ। ਇਹ ਪ੍ਰੋਵਿਜ਼ਨ ਇਸ ਲਈ ਲਿਆਂਦੀ ਗਈ ਸੀ ਕਿਉਂਕਿ ਪ੍ਰੋਵਿੰਸ ਚਾਹੁੰਦੀ ਸੀ ਕਿ ਲੋਕ ਬਿਨਾਂ ਕਿਸੇ ਡਰ ਤੋਂ ਅਜਿਹੇ ਮਾਮਲਿਆਂ ਉੱਤੇ ਆਪਣੀ ਗੱਲ ਰੱਖ ਸਕਣ।
ਅਜੇ ਵੀ ਸੁਣਵਾਈ ਸੁ਼ਰੂ ਹੋਣ ਤੋਂ ਪਹਿਲਾਂ ਅਦਾਲਤ ਵੱਲੋਂ ਮਾਮਲੇ ਨੂੰ ਡਿੱਸਮਿੱਸ ਕਰਨ ਲਈ ਇਸ ਸਬੰਧੀ ਜਿਰ੍ਹਾ ਸੁਣੀ ਜਾਣੀ ਬਾਕੀ ਹੈ। ਜਿ਼ਕਰਯੋਗ ਹੈ ਕਿ ਇਸ ਮਾਮਲੇ ਵਿੱਚ ਟਿੱਪਣੀ ਕਰਨ ਤੋਂ ਵਾਰੀ ਵਾਰੀ ਇਨਕਾਰ ਕਰ ਚੁੱਕੇ ਫੈਡੇਲੀ ਨੂੰ ਇਨ੍ਹਾਂ ਦੋਸ਼ਾਂ ਕਾਰਨ ਸੱਚਮੁੱਚ ਨੁਕਸਾਨ ਪਹੁੰਚਿਆਂ ਹੈ ਇਹ ਮੁੱਦਾ ਅਜੇ ਵਿਚਾਰਿਆ ਜਾਣਾ ਬਾਕੀ ਹੈ।