ਫਿਲਮ ‘ਯੇ ਸਾਲੀ ਆਸ਼ਿਕੀ’ ਨਾਲ ਐਕਟਿੰਗ ਵਿੱਚ ਕਦਮ ਰੱਖ ਰਹੇ ਹਨ ਅਮਰੀਸ਼ ਪੁਰੀ ਦੇ ਪੋਤਰੇ ਵਰਧਨ। ਉਨ੍ਹਾਂ ਮੁਤਾਬਕ ਉਹ ਅਮਰੀਸ਼ ਪੁਰੀ, ਮਦਨ ਪੁਰੀ ਦੇ ਅਭਿਨੈ ਨੂੰ ਦੇਖ ਕੇ ਵੱਡੇ ਹੋਏ ਹਨ। ਉਸ ਤੋਂ ਉਨ੍ਹਾਂ ਨੂੰ ਐਕਟਿੰਗ ਸਿੱਖਣ ਵਿੱਚ ਮਦਦ ਮਿਲੀ ਹੈ। ਪੰਜ ਸਾਲ ਦੀ ਉਮਰ ਤੋਂ ਉਹ ਥੀਏਟਰ ਕਰ ਰਹੇ ਹਨ। ਪੰਡਿਤ ਸਤਿਆਦੇਵ ਦੁਬੇ ਨਾਲ ਉਨ੍ਹਾਂ ਛੋਟੀ ਉਮਰ ਵਿੱਚ ਕੰਮ ਕਰਨਾ ਸ਼ੁਰੂ ਕਰ ਦਿੱਤਾ ਸੀ। 16 ਸਾਲ ਦੀ ਉਮਰ ਤੱਕ ਪੜ੍ਹਾਈ ਤੇ ਥੀਏਟਰ ਜਾਰੀ ਰਿਹਾ। ਉਸ ਦੇ ਬਾਅਦ ਉਨ੍ਹਾਂ ਨੇ ਬਿਜ਼ਨਸ ਮੈਨੇਜਮੈਂਟ ਦੀ ਪੜ੍ਹਾਈ ਕੀਤੀ। ਫਿਰ ਯਸ਼ਰਾਜ ਨਾਲ ਬਤੌਰ ਅਸਿਸਟੈਂਟ ਡਾਇਰੈਕਟਰ ਕੰਮ ਕਰਨਾ ਸ਼ੁਰੂ ਕੀਤਾ। ਉਨ੍ਹਾਂ ਨੇ ਅਭਿਨੈ ਦੀ ਕਿਸੇ ਸੰਸਥਾ ਤੋਂ ਟਰੇਨਿੰਗ ਨਹੀਂ ਲਈ।
ਦਾਦਾ ਅਮਰੀਸ਼ ਪੁਰੀ ਤੋਂ ਮਿਲੀ ਸਿਖਿਆ ਉਤੇ ਵਰਧਨ ਕਹਿੰਦੇ ਹਨ, ਉਹ ਕਹਿੰਦੇ ਸਨ ਕਿ ਆਪਣੇ ਕਿਰਦਾਰ ਨੂੰ ਓਨੀ ਹੀ ਸ਼ਿੱਦਤ ਅਤੇ ਇਮਾਨਦਾਰੀ ਨਾਲ ਜੀਓ, ਜਿਵੇਂ ਤੁਸੀਂ ਥੀਏਟਰ ਵਿੱਚ ਕਰਦੇ ਸੀ। ਤਦ ਤੁਹਾਡੇ ਨਾਕਾਮ ਹੋਣ ਦੇ ਚਾਂਸਿਸ ਘੱਟ ਹੋਣਗੇ। ਇਹ ਗੱਲ ਮੇਰੇ ਜ਼ਿਹਨ ਵਿੱਚ ਹੈ। ਫਿਲਮ 22 ਨਵੰਬਰ ਨੂੰ ਰਿਲੀਜ਼ ਹੋਵੇਗੀ।