ਓਰਲੀਆਨਜ਼, ਓਨਟਾਰੀਓ, 10 ਨਵੰਬਰ (ਪੋਸਟ ਬਿਊਰੋ) : ਓਨਟਾਰੀਓ ਦੀ ਲਿਬਰਲ ਪਾਰਟੀ ਵੱਲੋਂ ਓਰਲੀਆਨਜ਼ ਹਲਕੇ ਵਿੱਚ ਹੋਣ ਜਾ ਰਹੀਆਂ ਜਿ਼ਮਨੀ ਚੋਣਾਂ ਲਈ ਸਟੀਫਨ ਬਲਾਇਸ ਨੂੰ ਨਾਮਜਦ ਕੀਤਾ ਗਿਆ ਹੈ।
ਬਲਾਇਸ, ਜੋ ਕਿ ਇਸ ਤੋਂ ਪਹਿਲਾਂ ਕੈਥੋਲਿਕ ਸਕੂਲ ਬੋਰਡ ਦੇ ਟਰੱਸਟੀ ਤੇ ਮਿਊਂਸਪਲ ਕਾਊਂਸਲਰ ਰਹਿ ਚੁੱਕੇ ਹਨ, ਨੂੰ ਸ਼ਨਿੱਚਰਵਾਰ ਨੂੰ ਪਾਰਟੀ ਵੋਟ ਦੌਰਾਨ ਨਾਮੀਨੇਟ ਕੀਤਾ ਗਿਆ। ਉਨ੍ਹਾਂ ਨੂੰ ਮੈਰੀ ਫਰਾਂਸ ਲੈਲੌਂਡੇ ਦੀ ਥਾਂ ਲੈਣ ਲਈ ਨਾਮਜਦ ਕੀਤਾ ਗਿਆ ਹੈ। ਲੈਲੌਂਡੇ ਨੇ ਚਾਰ ਸਾਲ ਤੱਕ ਓਰਲੀਆਨਜ਼ ਦੀ ਨੁਮਾਂਇੰਦਗੀ ਕੀਤੀ ਤੇ ਫਿਰ ਉਹ ਫੈਡਰਲ ਪਾਲੀਟਿਕਸ ਵਿੱਚ ਚਲੀ ਗਈ ਤੇ ਹੁਣ ਹਾਊਸ ਆਫ ਕਾਮਨਜ਼ ਵਿੱਚ ਇਸ ਹਲਕੇ ਦੀ ਨੁਮਾਇੰਦਗੀ ਕਰ ਰਹੀ ਹੈ।
ਓਰਲੀਆਨਜ਼ ਉਨ੍ਹਾਂ ਦੋ ਹਲਕਿਆਂ ਵਿੱਚੋਂ ਇੱਕ ਹੈ ਜਿੱਥੇ ਆਉਣ ਵਾਲੇ ਕੁੱਝ ਮਹੀਨਿਆਂ ਵਿੱਚ ਜਿ਼ਮਨੀ ਚੋਣਾਂ ਕਰਵਾਈਆਂ ਜਾਣੀਆਂ ਹਨ। ਇਸ ਦੇ ਨਾਲ ਲੱਗਦੀ ਓਟਵਾ-ਵੇਨੀਅਰ ਸੀਟ ਵੀ ਖਾਲੀ ਪਈ ਹੈ। ਲਿਬਰਲ ਨਥਾਲੀ ਡੈੱਸ ਰੋਜੀਅਰਜ਼ ਇਸ ਹਲਕੇ ਦੀ ਨੁਮਾਇੰਦਗੀ ਕਰਦੀ ਸੀ ਪਰ ਟੋਰਾਂਟੋ ਦੇ ਮੈਸੀ ਕਾਲਜ ਵਿੱਚ ਅਹੁਦਾ ਸਾਂਭਣ ਤੋਂ ਬਾਅਦ ਉਨ੍ਹਾਂ ਬੀਤੀਆਂ ਗਰਮੀਆਂ ਵਿੱਚ ਅਸਤੀਫਾ ਦੇ ਦਿੱਤਾ। ਇਸ ਦੌਰਾਨ ਬਲਾਇਸ ਨੇ ਇੱਕ ਪ੍ਰੈੱਸ ਰਲੀਜ਼ ਵਿੱਚ ਆਖਿਆ ਕਿ ਉਹ ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਸਰਕਾਰ ਵੱਲੋਂ ਕੀਤੀਆਂ ਗਈਆਂ ਕਟੌਤੀਆਂ ਦੇ ਖਿਲਾਫ ਖੜ੍ਹੇ ਹੋਣਗੇ।