ਵਾਸ਼ਿੰਗਟਨ, 10 ਨਵੰਬਰ (ਪੋਸਟ ਬਿਊਰੋ)- ਅੰਤਰਰਾਸ਼ਟਰੀ ਧਾਰਮਿਕ ਸੁਤੰਤਰਤਾ ਮਾਮਲਿਆਂ ਦੇ ਅਮਰੀਕਾ ਦੇ ਵਿਸ਼ੇਸ਼ ਦੂਤ ਨੇ ਕਿਹਾ ਕਿ ਅਮਰੀਕਾ ਚਾਹੰੁਦਾ ਹੈ ਕਿ ਦਲਾਈ ਲਾਮਾ ਦਾ ਵਾਰਸ ਚੁਣਨ ਦਾ ਕੇਸ ਯੂ ਐਨ ਵਿੱਚ ਉਠਾਇਆ ਜਾਏ ਤਾਂ ਕਿ ਤਿੱਬਤੀਆਂ ਦੇ ਰੂਹਾਨੀ ਨੇਤਾ ਦਾ ਵਾਰਸ ਚੁਣਨ ਦੀ ਚੀਨ ਦੀ ਕੋਸ਼ਿਸ਼ ਨੂੰ ਰੋਕਿਆ ਜਾ ਸਕੇ।
ਅਮਰੀਕੀ ਵਿਸ਼ੇਸ਼ ਦੂਤ ਸੈਮ ਬਰਾਊਨਬੈਕ ਨੇ ਕਿਹਾ ਕਿ ਉਨ੍ਹਾਂ ਨੇ 84 ਸਾਲਾ ਦਲਾਈ ਲਾਮਾ ਤੋਂ ਧਰਮਸ਼ਾਲਾ ਵਿੱਚ ਪਿਛਲੇ ਹਫਤੇ ਮੁਲਾਕਾਤ ਕਰ ਕੇ ਵਾਰਸ ਦੇ ਮਾਮਲੇ 'ਤੇ ਲੰਬੀ ਚਰਚਾ ਕੀਤੀ ਸੀ। ਬਰਾਊਨਬੈਕ ਨੇ ਦੱਸਿਆ ਕਿ ਉਨ੍ਹਾਂ ਨੇ ਦਲਾਈ ਲਾਮਾ ਨੂੰ ਕਿਹਾ ਕਿ ਅਮਰੀਕਾ ਇਸ ਗੱਲ ਲਈ ਵਿਸ਼ਵ ਪੱਧਰ 'ਤੇ ਸਮਰਥਨ ਹਾਸਲ ਕਰਨ ਦੀ ਕੋਸ਼ਿਸ਼ ਕਰੇਗਾ ਕਿ ਅਗਲੇ ਅਧਿਆਤਮਿਕ ਨੇਤਾ ਦੀ ਚੋਣ ਚੀਨ ਸਰਕਾਰ ਨਹੀਂ, ਬਲਕਿ ਬੁੱਧ ਧਰਮ ਦੇ ਪੈਰੋਕਾਰ ਤਿੱਬਤੀ ਕਰਨ। ਉਨ੍ਹਾਂ ਨੇ ਕਿਹਾ ਕਿ ਮੈਂ ਉਮੀਦ ਕਰਦਾ ਹਾਂ ਕਿ ਯੂ ਐਨ ਇਸ ਮਾਮਲੇ ਨੂੰ ਉਠਾਏਗਾ। ਬਰਾਊਨਬੈਕ ਨੇ ਸਵੀਕਾਰ ਕੀਤਾ ਕਿ ਸੁਰੱਖਿਆ ਪ੍ਰੀਸ਼ਦ ਵਿੱਚ ਵੀਟੋ ਸ਼ਕਤੀ ਰੱਖਣ ਵਾਲਾ ਚੀਨ ਇਸ ਸੰਬੰਧੀ ਹਰ ਕਦਮ ਨੂੰ ਰੋਕਣ ਦੀ ਕੋਸ਼ਿਸ਼ ਕਰੇਗਾ, ਪਰੰਤੁੂ ਬਾਕੀ ਦੇਸ਼ ਸੰਯੁਕਤ ਰਾਸ਼ਟਰ ਵਿੱਚ ਆਪਣੀ ਆਵਾਜ਼ ਤਾਂ ਉਠਾ ਸਕਦੇ ਹਨ।