ਤਹਿਰਾਨ, 9 ਨਵੰਬਰ (ਪੋਸਟ ਬਿਊਰੋ)- ਈਰਾਨੀ ਸੁਰੱਖਿਆ ਬਲਾਂ ਨੇ ਕੱਲ੍ਹ ਖਾੜੀ ਸਮੁੰਦਰ ਤਟ 'ਤੇ ਸਥਿਤ ਬੰਦਰ-ਏ-ਮਹਿਸ਼ਰ ਦੇ ਨੇੜੇ ਇੱਕ ਵਿਦੇਸ਼ੀ ਡਰੋਣ ਨੂੰ ਮਾਰ ਸੁੱਟਿਆ। ਨਿਊਜ਼ ਏਜੰਸੀ ਇਰਨਾ ਨੇ ਈਰਾਨੀ ਅਧਿਕਾਰੀਆਂ ਦੇ ਹਵਾਲੇ ਨਾਲ ਇਹ ਜਾਣਕਾਰੀ ਦਿੱਤੀ ਹੈ, ਜਿਸ ਦੇ ਕਿਸੇ ਹੋਰ ਦੇਸ਼ ਨੇ ਪੁਸ਼ਟੀ ਨਹੀਂ ਕੀਤੀ।
ਈਰਾਨ ਦੇ ਦੱਖਣੀ ਖੁਜੇਸਤਾਨ ਸੂਬੇ ਦੇ ਗਵਰਨਰ ਘੋਲਮਰੇਜਾ ਸ਼ਰੀਤੀ ਨੇ ਦੱਸਿਆ, ਮਾਰ ਸੁੱਟਿਆ ਗਿਆ ਡਰੋਨ ਯਕੀਨੀ ਤੌਰ ਉੱਤੇ ਵਿਦੇਸ਼ੀ ਹੈ। ਉਸ ਦਾ ਮਲਬਾ ਬਰਾਮਦ ਕਰ ਲਿਆ ਹੈ ਤੇ ਉਸ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਡਰੋਨ ਨੂੰ ਈਰਾਨ ਵਿੱਚ ਬਣਾਈ ਗਈ ਜ਼ਮੀਨ ਤੋਂ ਹਵਾ 'ਚ ਮਾਰ ਕਰਨ ਵਾਲੀ ‘ਮਰਸਾਦ' ਮਿਜ਼ਾਈਲ ਨਾਲ ਨਿਸ਼ਾਨਾ ਬਣਾਇਆ ਗਿਆ। ਅਜੇ ਤੱਕ ਇਹ ਜਾਣਕਾਰੀ ਨਹੀਂ ਮਿਲ ਸਕੀ ਕਿ ਇਹ ਮਿਲਟਰੀ ਡਰੋਨ ਸੀ ਜਾਂ ਸਿਵਿਲ ਡਰੋਨ ਤੇ ਕਿਸ ਦੇਸ਼ ਦਾ ਸੀ। ਇਸਤੋਂ ਪਹਿਲਾਂ ਈਰਾਨ ਨੇ ਜੁੂਨ 'ਚ ਇੱਕ ਅਮਰੀਕੀ ਸਰਵਿਲਾਂਸ ਡਰੋਨ ਨੂੰ ਡੇਗ ਲਿਆ ਸੀ। ਉਸ ਦਾ ਕਹਿਣਾ ਸੀ ਕਿ ਉਹ ਈਰਾਨੀ ਜਲ ਖੇਤਰ ਦੇ ਉਪਰ ਉਡਾਣ ਭਰ ਰਿਹਾ ਸੀ। ਅਮਰੀਕਾ ਦਾ ਕਹਿਣਾ ਸੀ ਕਿ ਉਸ ਦਾ ਡਰੋਨ ਕੌਮਾਂਤਰੀ ਹਵਾਈ ਖੇਤਰ ਵਿੱਚ ਸੀ। ਇਸ ਤੋਂ ਬਾਅਦ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਫੌਜ ਨੂੰ ਹਮਲਾ ਕਰਨ ਲਈ ਅਧਿਕਾਰ ਦੇ ਦਿੱਤੀ ਸੀ, ਪਰ ਆਖਰੀ ਸਮੇਂ 'ਚ ਉਨ੍ਹਾਂ ਨੇ ਹੁਕਮ ਵਾਪਸ ਲੈ ਲਿਆ ਸੀ।
ਇਸ ਤੋਂ ਇਲਾਵਾ 14 ਸਤੰਬਰ ਨੂੰ ਸਾਊਦੀ ਤੇਲ ਕੰਪਨੀ ‘ਅਰੈਮਕੋ' ਤੇ ਹੋਏ ਹਮਲੇ ਲਈ ਵੀ ਅਮਰੀਕਾ ਈਰਾਨ ਨੂੰ ਜ਼ਿੰਮੇਵਾਰ ਮੰਨਦਾ ਹੈ। ਹਾਲੇ ਮੌਜੂਦਾ ਘਟਨਾ 'ਤੇ ਅਮਰੀਕਾ ਨੇ ਕੋਈ ਪ੍ਰਤੀਕਿਰਿਆ ਨਹੀਂ ਦਿੱਤੀ। ਇਜ਼ਰਾਇਲੀ ਫੌਜ ਦੇ ਬੁਲਾਰੇ ਨੇ ਕਿਹਾ ਕਿ ਅਸੀਂ ਵਿਦੇਸ਼ੀ ਮੀਡੀਆ ਦੀਆਂ ਖਬਰਾਂ 'ਤੇ ਪ੍ਰਤੀਕਿਰਿਆ ਨਹੀਂ ਦੇਂਦੇ। ਜ਼ਿਕਰਯੋਗ ਹੈ ਕਿ ਈਰਾਨ ਤੇ ਅਮਰੀਕਾ ਦੇ ਸਬੰਧ ਪਿਛਲੇ ਸਾਲ ਓਦੋਂ ਖਰਾਬ ਹੋ ਗਏ ਸਨ ਜਦੋਂ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ, ਈਰਾਨ ਤੇ ਵਿਸ਼ਵ ਸ਼ਕਤੀਆਂ ਵਿਚਕਾਰ 2015 'ਚ ਹੋਏ ਸਮਝੌਤੇ ਤੋਂ ਹਟ ਗਏ ਸਨ।