ਪੰਜਾਬੀ ਪੋਸਟ ਸੰਪਾਦਕੀ
ਬ੍ਰਿਟਿਸ਼ ਕੋਲੰਬੀਆ ਦੇ ਮਨੁੱਖੀ ਅਧਿਕਾਰ ਟ੍ਰਿਬਿਊਨਲ ਨੇ ਕੱਲ, ਇੱਕ ਟਰਾਂਸਜੈਂਡਰ ਔਰਤ ਜੈਸਿਕਾ ਯਾਨਿਵ, ਜੋ ਮਰਦਾਵੇਂ ਗੁਪਤ ਅੰਗ ਹੁੰਦੇ ਹੋਏ ਖੁਦ ਨੂੰ ਔਰਤ ਐਲਾਨ ਕਰਦੀ ਸੀ, ਨੂੰ ਖੂਬ ਝਾੜਾਂ ਹੀ ਨਹੀਂ ਪਾਈਆਂ ਸਗੋਂ ਉਸਦੇ ਕੇਸ ਨੂੰ ਖਾਰਜ ਕਰਦੇ ਹੋਏ ਬਚਾਅ ਪੱਖ ਦੀਆਂ 15 ਬਿਊਟੀ ਸਲੂਨ ਚਲਾਉਣ ਵਾਲੀਆਂ ਔਰਤਾਂ ਵਿੱਚੋਂ ਤਿੰਨ ਨੂੰ 6000 ਡਾਲਰ ਹਰਜਾਨਾ ਅਦਾ ਕਰਨ ਦਾ ਹੁਕਮ ਵੀ ਕੀਤਾ ਹੈ। ਤਿੰਨ ਕੁ ਮਹੀਨੇ ਪਹਿਲਾਂ ਇੱਕ ਐਡੀਟੋਰੀਅਲ ਵਿੱਚ ਪੰਜਾਬੀ ਪੋਸਟ ਨੇ ਇਸ ਮੁੱਦੇ ਬਾਰੇ ਚਰਚਾ ਕੀਤੀ ਸੀ। ਮਰਦਾਵੇਂ ਅੰਗਾਂ ਵਾਲੀ ਖੁਦ ਨੂੰ ਟਰਾਂਸਜੈਂਡਰ ਵਾਲੀ ਜੈਸਿਕਾ ਦਾ ਅਸਲ ਨਾਮ ਜੋਨਾਥਨ ਹੈ ਜੋ ਫੇਸਬੁੱਕ ਤੋਂ ਉਹਨਾਂ ਬਿਊਟੀ ਸਲੂਨਾਂ ਨੂੰ ਲੱਭ ਕੇ ਫੋਨ ਕਰਦਾ ਸੀ ਜਿਹੜੇ ਸਾਊਥ ਏਸ਼ੀਅਨ ਜਾਂ ਹੋਰ ਐਥਨਿਕ ਪਰਵਾਸੀ ਔਰਤਾਂ ਵੱਲੋਂ ਆਪਣੇ ਰਿਹਾਇਸ਼ੀ ਮਕਾਨਾਂ ਵਿੱਚੋਂ ਚਲਾਏ ਜਾਂਦੇ ਹਨ। ਇਹਨਾਂ ਵਿੱਚ ਕਈ ਸਿੱਖ ਭਾਈਚਾਰੇ ਨਾਲ ਸਬੰਧਿਤ ਔਰਤਾਂ ਸਨ। ਜੈਸਿਕਾ ਉਹਨਾਂ ਨੂੰ ਗੁਪਤ ਅੰਗਾਂ ਦੀ ਸਫ਼ਾਈ ਕਰਨ ਲਈ ਪੁੱਛਦੀ ਅਤੇ ਮਨ੍ਹਾ ਕਰਨ ਦੀ ਸੂਰਤ ਵਿੱਚ ਆਪਣੇ ਮਨੁੱਖੀ ਅਧਿਕਾਰਾਂ ਦੀ ਉਲੰਘਣਾ ਹੋਣ ਦੇ ਕੇਸ ਕਰਨ ਦੀ ਧਮਕੀ ਦੇਂਦੀ। ਬੀ ਸੀ ਮਨੁੱਖੀ ਅਧਿਕਾਰ ਟ੍ਰਿਬਿਊਨਲ ਕੋਲ ਕੀਤੇ ਕੇਸ ਵਿੱਚ ਉਸਨੇ 5 ਲੱਖ ਡਾਲਰ ਦੇ ਹਰਜਾਨੇ ਦੀ ਮੰਗ ਕੀਤੀ ਸੀ ਜਿਸਨੂੰ ਜੱਜ ਨੇ ਸੋਸ਼ਣ ਕਰਨ ਦਾ ‘ਯਤਨ’ ਕਰਾਰ ਦਿੱਤਾ ਹੈ।
ਪੰਜਾਬੀ ਪੋਸਟ ਵੱਲੋਂ ਪ੍ਰਾਪਤ ਕੀਤੀ ਗਈ ਮਨੁੱਖੀ ਅਧਿਕਾਰ ਟ੍ਰਿਬਿਊਨਲ ਕੇਸ ਦੀ ਕਾਪੀ ਤੋਂ ਪਤਾ ਲੱਗਦਾ ਹੈ ਕਿ ਜੈਸਿਕਾ ਯਾਨਿਵ ਤੋਂ ਪੀੜਤ ਔਰਤਾਂ ਵਿੱਚ ਤਿੰਨ ਪੰਜਾਬੀ/ਸਿੱਖ ਔਰਤਾਂ ਸੰਦੀਪ ਬੈਨੀਪਾਲ, ਸੁੱਖੀ ਗਿੱਲ ਅਤੇ ਪੈਮ ਦੁਲੇ ਵੀ ਸ਼ਾਮਲ ਸਨ। ਇਹਨਾਂ ਵਿਚਾਰੀਆਂ ਨੇ ਕੈਲਗਰੀ ਵਿਖੇ ਸਥਿਤ Justice Centre for Constitutional Freedom ਦੀ ਮਦਦ ਨਾਲ ਕੇਸ ਲੜਿਆ। ਇਹਨਾਂ ਔਰਤਾਂ ਦੀ ਬਹਾਦਰੀ ਦੀ ਦਾਦ ਦੇਣੀ ਬਣਦੀ ਹੈ ਜਿਹਨਾਂ ਨੇ ਹਿੰਮਤ ਨਾਲ ਕੇਸ ਲੜ ਕੇ ਭੱਵਿਖ ਵਿੱਚ ਸਮਾਲ ਬਿਜਨਸਾਂ ਨੂੰ ਸੋਸ਼ਣ ਤੋਂ ਬਚਣ ਦਾ ਰਾਹ ਵਿਖਾਇਆ। ਇਹ ਗੱਲ ਮਹੱਤਵਪੂਰਣ ਹੈ ਕਿ ਇਸ ਕੇਸ ਨੂੰ ਲੜਨ ਵਾਸਤੇ Justice Centre for Constitutional Freedom ਦੇ ਵਕੀਲਾਂ ਨੂੰ ਕੈਲਗਰੀ ਤੋਂ ਵੈਨਕੂਵਰ ਜਾਣਾ ਪਿਆ। ਜਿਵੇਂ ਕਿ ਅਕਸਰ ਹੁੰਦਾ ਹੈ, ਮੁੱਖ ਧਾਰਾ ਦਾ ਮੀਡੀਆ ਇਸ ਕੇਸ ਦੀ ਚਰਚਾ ਕਰਨ ਤੋਂ ਡਰਦਾ ਜਾਂ ਹਿਚਕਚਾਉਦਾ ਰਿਹਾ ਹੈ। ਮਿਸਾਲ ਵਜੋਂ ਜੈਸਿਕਾ ਦੇ ਕੇਸ ਹਾਰ ਜਾਣ ਨੂੰ ਤਕਰੀਬਨ ਸਾਰੇ ਮੀਡੀਆ ਨੇ ਕਵਰ ਕੀਤਾ ਹੈ ਪਰ ਪਹਿਲਾਂ ਇਸ ਕੇਸ ਬਾਰੇ ਬਹੁਤੀ ਚਰਚਾ ਨਹੀਂ ਸੀ ਕੀਤੀ ਗਈ। ਮਿਸਾਲ ਵਜੋਂ ਸੀ ਬੀ ਸੀ ਨੇ ਇਸ ਕੇਸ ਬਾਰੇ ਸਿਰਫ਼ 3 ਸਟੋਰੀਆਂ ਕੀਤੀਆਂ ਹਨ ਜਦੋਂ ਕਿ ਪੋਸਟ ਮਿਲੇਨੀਅਮ ਨੇ 15 ਤੋਂ ਵੱਧ।
ਬੀ ਸੀ ਮਨੁੱਖੀ ਅਧਿਕਾਰ ਕਮਿਸ਼ਨ ਵਧਾਈ ਦਾ ਪਾਤਰ ਹੈ ਜਿਸਨੇ ਇਸ ਸੰਵੇਦਨਸ਼ੀਲ ਮੁੱਦੇ ਉੱਤੇ ਸਹੀ ਫੈਸਲਾ ਦੇ ਕੇ ਇੱਕ ਗੁਣਤਾਮਕ ਰਿਵਾਇਤ ਪੈਦਾ ਕੀਤੀ ਹੈ। ਹੁਣ ਤੋਂ ਬਾਅਦ ਜੈਸਿਕਾ ਵਰਗੇ ਕਦਰਾਂ ਕੀਮਤਾਂ ਤੋਂ ਖੁੰਝੇ ਲੋਕ ਸੰਵਿਧਾਨ ਦੁਆਰਾ ਦਿੱਤੇ ਗਏ ਮਨੁੱਖੀ ਅਧਿਕਾਰਾਂ ਨੂੰ ਗਲਤ ਵਰਤਣ ਦਾ ਹੀਆ ਸੋਚ ਸਮਝ ਕੇ ਕਰਨਗੇ। ਚੇਤੇ ਰਹੇ ਕਿ ਜੈਸਿਕਾ ਵੱਲੋਂ ਦਿੱਤੀਆਂ ਗਈਆਂ ਧਮਕੀਆਂ ਤੋਂ ਡਰਦੀਆਂ ਕੁੱਝ ਪਰਵਾਸੀ ਔਰਤਾਂ ਨੇ ਤਾਂ ਆਪਣੇ ਬਿਜਨਸ ਹੀ ਬੰਦ ਕਰ ਦਿੱਤੇ ਹਨ। ਮਨੁੱਖੀ ਅਧਿਕਾਰ ਕਮਿਸ਼ਨ ਨੇ ਸਪੱਸ਼ਟ ਕੀਤਾ ਹੈ ਕਿ ਕਿਸੇ ਮਰਦ ਵੱਲੋਂ ਆਪਣੇ ਗੁਪਤ ਅੰਗਾਂ ਦੀ ਸਫਾਈ ਦੀ ਕਿਸੇ ਔਰਤ ਤੋਂ ਮੰਗ ਕਰਨੀ ਬੇਵਜਹ ਗੱਲ ਹੈ ਖਾਸ ਕਰਕੇ ਜਦੋਂ ਉਹਨਾਂ ਦੇ ਧਾਰਮਿਕ ਵਿਸ਼ਵਾਸ਼ ਦਾ ਨੁਕਸਾਨ ਹੁੰਦਾ ਹੋਵੇ ਅਤੇ ਜਿਸ ਕੰਮ ਦੀ ਉਹਨਾਂ ਨੇ ਸਿਖਲਾਈ ਨਾ ਲਈ ਹੋਵੇ।
ਸੁੱਖੀ ਗਿੱਲ ਅਤੇ ਹੋਰ ਪੀੜਤ ਔਰਤਾਂ ਇਸ ਗੱਲ ਲਈ ਵੀ ਵਧਾਈ ਦੀਆਂ ਪਾਤਰ ਹਨ ਕਿ ਉਹਨਾਂ ਨੇ ਜੈਸਿਕਾ ਯਾਨਿਵ ਦਾ ਪੂਰਾ ਨਾਮ ਪਬਲਿਸ਼ ਕਰਨ ਲਈ ਚਾਰਾਜੋਈ ਕੀਤੀ। ਇਸਤੋਂ ਪਹਿਲਾਂ ਪਬਲੀਕੇਸ਼ਨ ਬੈਨ ਹੋਣ ਕਾਰਣ ਜੈਸਿਕਾ ਨੂੰ ਸਿਰਫ਼ JY ਹੀ ਲਿਖਿਆ ਜਾਂਦਾ ਸੀ। ਟ੍ਰਿਬਿਊਨਲ ਨੇ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਜੇ ਕੋਈ ਮਰਦ ਖੁਦ ਐਲਾਨ ਕਰ ਦੇਂਦਾ ਹੈ ਕਿ ਉਹ ਔਰਤ ਬਣ ਗਿਆ ਹੈ ਤਾਂ ਬਿਨਾ ਡਾਕਟਰੀ ਸਬੂਤਾਂ ਤੋਂ ਕਿਸੇ ਔਰਤ ਨੂੰ ਉਸਦੇ ਗੁਪਤ ਅੰਗਾਂ ਨੂੰ ਛੂਹਣ ਲਈ ਮਜਬੂਰ ਨਹੀਂ ਹੋਣਾ ਚਾਹੀਦਾ। ਇੱਕ ਔਰਤ ਨੂੰ ਜੈਸਿਕਾ ਬਨਾਮ ਜੋਨਾਥਨ ਨੇ ਧਮਕੀ ਦਿੱਤੀ ਸੀ ਕਿ ਬੇਸ਼ੱਕ ਤੂੰ ਪਰਵਾਸੀ ਅਤੇ ਕੈਨੇਡਾ ਵਿੱਚ ਨਵੀਂ ਹੈ ਪਰ ਮੇਰੇ ਗੁਪਤ ਅੰਗਾਂ ਦੀ ਸਫ਼ਾਈ ਤੋਂ ਮਨਾਹੀ ਬਦੌਲਤ ਕੈਨੇਡਾ ਦਾ ਕਾਨੂੰਨ ਤੇਰੇ ਖਿਲਾਫ਼ ਜਾਵੇਗਾ। ਜੈਸਿਕਾ ਦੀ ਹਾਰ ਨੇ ਸਾਬਤ ਕਰ ਦਿੱਤਾ ਕਿ ਕਾਨੂੰਨ ਕਿਸੇ ਵਿਅਕਤੀ ਵਿਸ਼ੇਸ਼ ਦੇ ਨਹੀਂ ਸਗੋਂ ਕਾਨੂੰਨ ਨੂੰ ਗਲਤ ਵਰਤਣ ਵਾਲੇ ਦੇ ਖਿਆਫ ਜਾਂਦਾ ਹੈ।