ਪੰਜਾਬੀ ਪੋਸਟ ਵਿਸ਼ੇਸ਼

ਅੱਜ ਪੈਣ ਜਾ ਰਹੀਆਂ ਵੋਟਾਂ ਵਿੱਚ ਬਰੈਂਪਟਨ ਨੌਰਥ ਰਾਈਡਿੰਗ ਤੋਂ ਲਿਬਰਲ ਉਮੀਦਵਾਰ ਅਤੇ ਵਰਤਮਾਨ ਐਮ ਪੀ ਰੂਬੀ ਸਹੋਤਾ ਦਾ ਦਾਅਵਾ ਹੈ ਕਿ ਉਹ ਕਮਿਉਨਿਟੀ ਦੇ ਮਸਲਿਆਂ ਨੂੰ ਚੰਗੀ ਤਰਾਂ ਸਮਝਦੀ ਹੀ ਨਹੀਂ ਸਗੋਂ ਉਹਨਾਂ ਦੀ ਸਹੀ ਪਲੇਟਫਾਰਮ ਉੱਤੇ ਸੁੱਚਜੇ ਢੰਗ ਨਾਲ ਪੈਰਵਾਈ ਕਰਨ ਦੀ ਵੀ ਹਿੰਮਤ ਰੱਖਦੀ ਹੈ। ਇਸ ਵਾਰ ਉਸਦਾ ਮੁੱਖ ਮੁਕਾਬਲਾ ਤੋਂ ਕੰਜ਼ਰਵੇਟਿਵ ਪਾਰਟੀ ਦੇ ਉਮੀਦਵਾਰ ਅਰਪਣ ਖੰਨਾ ਨਾਲ ਹੈ ਜਦੋਂ ਕਿ 2015 ਵਿੱਚ ਰੂਬੀ ਨੇ ਕੰਜ਼ਰਵੇਟਿਵ ਪਾਰਟੀ ਦੇ ਤਤਕਾਲੀ ਐਮ ਪੀ ਪਰਮ ਗਿੱਲ ਨੂੰ ਮਿਲੀਆਂ 15,888 ਦੇ ਮੁਕਾਬਲੇ 23,297 ਵੋਟਾਂ ਪ੍ਰਾਪਤ ਕਰਕੇ ਜਿੱਤ ਹਾਸਲ ਕੀਤੀ ਸੀ। ਰੂਬੀ ਦਾ ਮੰਨਣਾ ਹੈ ਕਿ ਕਮਿਉਨਿਟੀ ਵਿੱਚੋਂ ਮਿਲੇ ਹੁੰਗਾਰੇ ਦੇ ਸਨਮੁਖ ਉਹ ਇਸ ਵਾਰ 2015 ਨਾਲੋਂ ਵੀ ਵੱਡੀ ਜਿੱਤ ਹਾਸਲ ਕਰੇਗੀ ਹਾਲਾਂਕਿ ਇਸਦਾ ਅੰਤਮ ਫੈਸਲਾ ਅੱਜ ਵੋਟਰ ਕਰਨਗੇ।

ਕਿੱਤੇ ਵਜੋਂ ਵਕੀਲ ਰੂਬੀ ਸਹੋਤਾ ਨੂੰ ਸਿਆਸਤ ਇੱਕ ਕਿਸਮ ਨਾਲ ਵਿਰਾਸਤ ਵਿੱਚੋਂ ਮਿਲੀ ਹੋਣ ਕਾਰਣ ਉਸ ਕੋਲ ਲੀਡਰਸਿ਼ੱਪ ਦੇ ਕਈ ਸੁਭਾਵਿਕ ਗੁਣ ਹਨ। ਉਸਦੇ ਪਿਤਾ ਹਰਬੰਸ ਸਿੰਘ ਜੰਡਾਲੀ ਲੰਬੇ ਸਮੇਂ ਤੋਂ ਕੈਨੇਡਾ ਦੀ ਸਿੱਖ ਸਿਆਸਤ ਅਤੇ ਸਿੱਖ ਸੰਸਥਾਵਾਂ ਨਾਲ ਨੇੜੇ ਤੋਂ ਜੁੜੇ ਰਹੇ ਹਨ। ਰੂਬੀ ਦੀ ਲੀਡਰਸਿ਼ੱਪ ਦਾ ਇੱਕ ਨਮੂਨਾ ਉਸ ਵੇਲੇ ਕਮਿਉਨਿਟੀ ਨੂੰ ਬਾਖੂਬੀ ਵੇਖਣ ਨੂੰ ਮਿਲਿਆ ਜਦੋਂ ਕੈਨੇਡਾ ਦੇ ਫੈਡਰਲ ਪਬਲਿਕ ਸੇਫਟੀ ਮਹਿਕਮੇ ਨੇ ਆਪਣੀ ਅਤਿਵਾਦ ਬਾਰੇ ਸਾਲਾਨਾ ਰਿਪੋਰਟ ਵਿੱਚ ਸਿੱਖ ਭਾਈਚਾਰੇ ਬਾਰੇ ਇਤਰਾਜ਼ਯੋਗ ਟਿੱਪਣੀਆਂ ਲਿਖ ਦਿੱਤੀਆਂ ਸਨ। ਰੂਬੀ ਨੇ ਇੱਕ ਪਾਸੇ ਸਿੱਖ ਸਰੋਕਾਰਾਂ ਨੂੰ ਚੰਗੇ ਤਰੀਕੇ ਲਿਬਰਲ ਕਾਕਸ ਵਿੱਚ ਉਠਾਇਆ ਤਾਂ ਦੂਜੇ ਪਾਸੇ ਉਸਨੇ ਗਰੇਟਰ ਟੋਰਾਂਟੋ ਏਰੀਆ ਵਿੱਚ ਕਮਿਉਨਿਟੀ ਅੱਗੇ ਹਰ ਪੱਖ ਨੂੰ ਤਰਕ ਨਾਲ ਪੇਸ਼ ਕੀਤਾ। ਸਿੱਖ ਭਾਈਚਾਰੇ ਵੱਲੋਂ ਲਿਬਰਲ ਸਰਕਾਰ ਨੂੰ ਉਠਾਏ ਗਏ ਸੁਆਲਾਂ ਦੇ ਨਾਜ਼ੁਕ ਦੌਰਾਨ ਰੂਬੀ ਨੇ ਦੋਵਾਂ ਧਿਰਾਂ ਦੀ ਤਰਫ਼ ਤੋਂ ਹਾਂ ਪੱਖੀ ਰੋਲ ਅਦਾ ਕੀਤਾ ਸੀ।

 ਇੱਕ ਐਮ ਪੀ ਵਜੋਂ ਪਿਛਲੇ ਚਾਰ ਸਾਲਾਂ ਦੌਰਾਨ ਰੂਬੀ ਸਹੋਤਾ ਪਾਰਲੀਮੈਂਟ ਵਿੱਚ ਜੈਨੋਸਾਈਡ ਰੋਕਥਾਮ ਬਾਰੇ ਬਣੇ ਗਰੁੱਪ ਦੀ ਵਾਈਸ ਚੇਅਰਪਰਸਨ, ਆਲ ਪਾਰਟੀ ਸਨੱਅਤੀ ਉੱਦਮ ਦੀ ਕੋ-ਚੇਅਰ ਅਤੇ ਕੈਨੇਡਾ-ਇੰਡੀਆ ਫਰੈਂਡਸਿ਼ੱਪ ਗਰੁੱਪ ਦੀ ਵਾਈਸ ਪ੍ਰੈਜ਼ੀਡੈਂਟ ਹੋਣ ਵਜੋਂ ਰੋਲ ਸਫ਼ਲਤਾ ਨਾਲ ਅਦਾ ਕੀਤੇ ਹਨ। ਉਸਨੇ ਫੈਡਰਲ ਲਿਬਰਲ ਦੀ ਉਂਟੇਰੀਓ ਕਾਕਸ ਦੀ ਚੇਅਰ ਵਜੋਂ ਵੀ ਰੋਲ ਅਦਾ ਕੀਤਾ ਹੈ। ਰੂਬੀ ਨੂੰ ਉਮੀਦ ਹੈ ਕਿ ਉਸ ਦੀ ਪਿਛਲੇ ਚਾਰ ਸਾਲ ਦੀ ਕਾਰਗੁਜ਼ਾਰੀ ਅਤੇ ਲਿਬਰਲ ਪਾਰਟੀ ਦੇ ਪਲੇਟਫਾਰਮ ਦੀ ਮਜ਼ਬੂਤੀ ਨੂੰ ਵੇਖਦੇ ਹੋਏ ਵੋਟਰ ਉਸਨੂੰ ਸੇਵਾ ਦਾ ਮੌਕਾ ਇੱਕ ਵਾਰ ਦੁਬਾਰਾ ਅਵਸਰ ਜਰੂਰ ਦੇਣਗੇ।