* ਪਿਛਲੇ ਮਹੀਨੇ ਦੀ ਘਟਨਾ ਦਾ ਭੇਦ ਖੁੱਲ੍ਹਣ ਤੋਂ ਹਰ ਕੋਈ ਸੁੰਨ
ਨਵੀਂ ਦਿੱਲੀ, 17 ਅਕਤੂਬਰ, (ਪੋਸਟ ਬਿਊਰੋ)- ਪਿਛਲੇ ਮਹੀਨੇ ਪਾਕਿਸਤਾਨੀ ਹਵਾਈ ਫ਼ੌਜ ਨੇ ਕੁਝ ਇਸ ਤਰ੍ਹਾਂ ਦਾ ਕਰ ਛੱਡਿਆ, ਜਿਸ ਨਾਲ ਭਾਰਤ ਤੇ ਪਾਕਿਸਤਾਨ ਵਿਚਾਲੇ ਜਾਰੀ ਤਣਾਅ ਹੋਰ ਵੀ ਵੱਧ ਸਕਦਾ ਸੀ।
ਭਰੋਸੇ ਯੋਗ ਵਸੀਲਿਆਂ ਨੇ ਭੇਦ ਖੋਲ੍ਹਿਆ ਹੈ ਕਿ ਪਿਛਲੇ ਮਹੀਨੇ ਪਾਕਿਤਸਾਨੀ ਹਵਾਈ ਫੌਜ ਦੇ ਐੱਫ-16 ਲੜਾਕੂ ਜਹਾਜ਼ਾਂ ਨੇ ਆਪਣੇ ਹਵਾਈ ਖੇਤਰ ਤੋਂ ਲੰਘ ਕੇਕਾਬੁਲ ਜਾਣ ਵਾਲੇ ਭਾਰਤ ਦੀ ਸਪਾਈਸ ਜੈੱਟ ਕੰਪਨੀ ਦੇ ਯਾਤਰੀ ਜਹਾਜ਼ ਨੂੰ ਲਗਪਗ ਇਕ ਘੰਟਾ ਘੇਰੀ ਰੱਖਿਆ। ਇਹੀ ਨਹੀਂ, ਉਨ੍ਹਾਂ ਨੇ ਉਸ ਭਾਰਤੀ ਜਹਾਜ਼ ਦੇ ਪਾਇਲਟ ਨੂੰ ਇਸ ਦੀ ਉਚਾਈ ਘੱਟ ਕਰਨ ਅਤੇ ਉਡਾਨ ਦੇ ਸਾਰੇ ਵੇਰਵੇ ਦੱਸਣ ਦੇ ਨਾਲ ਉਨ੍ਹਾਂ ਨੂੰ ਰਿਪੋਰਟ ਕਰਨ ਲਈ ਕਿਹਾ। ਇਸ ਦੌਰਾਨ ਥੋੜ੍ਹੀ ਜਿਹੀ ਗ਼ਲਤੀ ਨਾਲ ਵੀ ਕੁਝ ਦਾ ਕੁਝ ਮਾੜਾ ਵਾਪਰ ਸਕਦਾ ਸੀ।
ਇੱਕ ਸਮਾਚਾਰ ਏਜੰਸੀ ਅਨੁਸਾਰ 23 ਸਤੰਬਰ ਦੀ ਇਸ ਘਟਨਾ ਵਿੱਚ ਸ਼ਾਮਲ ਸਪਾਈਸ ਜੈੱਟ ਫਲਾਈਟ ਐੱਸ ਜੀ-21 ਉਸ ਦਿਨ ਦਿੱਲੀ ਤੋਂ ਕਾਬੁਲ ਨੂੰ ਚੱਲੀ ਸੀ, ਜਿਸ ਵਿੱਚ 120 ਦੇ ਕਰੀਬ ਯਾਤਰੀ ਸਨ। ਇਸ ਤੋਂ ਮਹੱਤਵਪੂਰਨ ਗੱਲ ਇਹ ਹੈ ਕਿ ਇਹ ਘਟਨਾ ਉਸ ਵੇਲੇ ਦੀ ਹੈ,ਜਦੋਂ ਪਾਕਿਸਤਾਨ ਦਾ ਹਵਾਈ ਖੇਤਰ ਭਾਰਤ ਲਈ ਹਾਲੇ ਬੰਦ ਨਹੀਂ ਸੀ ਕੀਤਾ ਗਿਆ। ਏਜੰਸੀ ਸੂਤਰਾਂ ਨੇ ਦੱਸਿਆ ਕਿ ਸਪਾਈਸ ਜੈੱਟ ਦੇ ਪਾਇਲਟ ਨੇ ਪਾਕਿਸਤਾਨੀ ਐੱਫ-16 ਜੈੱਟ ਪਾਇਲਟਾਂ ਨੂੰ ਜਾਣਕਾਰੀ ਦੇ ਕੇ ਕਿਹਾ, ‘ਇਹ ਸਪਾਈਸ ਜੈੱਟ, ਭਾਰਤੀ ਕਮਰਸ਼ੀਅਲ ਜਹਾਜ਼ ਹੈ, ਜਿਹੜਾ ਯਾਤਰੀਆਂ ਨੂੰ ਲਿਜਾ ਰਿਹਾ ਹੈ ਤੇ ਸ਼ਡਿਊਲ ਅਨੁਸਾਰ ਕਾਬੁਲ ਜਾ ਰਿਹਾ ਹੈ।` ਜਦੋਂ ਐੱਫ-16 ਜਹਾਜ਼ਾਂ ਨੇ ਸਪਾਈਸ ਜੈੱਟ ਦਾ ਜਹਾਜ਼ ਘੇਰਿਆ ਸੀ ਤਾਂ ਪਾਕਿਸਤਾਨੀ ਜੈੱਟ ਅਤੇ ਉਨ੍ਹਾਂ ਦੇ ਪਾਇਲਟ ਭਾਰਤੀ ਜਹਾਜ਼ ਦੇ ਯਾਤਰੀਆਂ ਨੂੰ ਦਿੱਸ ਰਹੇ ਸਨ।