ਮੋਗਾ, 17 ਅਕਤੂਬਰ (ਪੋਸਟ ਬਿਊਰੋ)- ਨਸ਼ਾ ਤਸਕਰੀ ਦੇ ਕੇਸ ਵਿੱਚ ਤਿੰਨ ਸਾਲ ਤੋਂ ਗਵਾਹੀ ਤੋਂ ਬਚ ਰਹੇ ਇੱਕ ਏ ਐੱਸ ਆਈ ਅਤੇ ਦੋ ਹੈੱਡ ਕਾਂਸਟੇਬਲਾਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਇਨ੍ਹਾਂ ਤਿੰਨਾਂ ਨੂੰ 16 ਵਾਰ ਸੰਮਨ ਭੇਜਿਆ ਗਿਆ ਅਤੇ ਕੇਸ ਵੀ ਦਰਜ ਕੀਤਾ ਸੀ, ਪਰ ਉਹ ਗਵਾਹੀ ਦੇਣ ਨਹੀਂ ਆਏ। ਇਸ ਉੱਤੇ ਹਾਈ ਕੋਰਟ ਨੇ ਐੱਸ ਐੱਸ ਪੀ ਮੋਗਾ ਨੂੰ ਹੁਕਮ ਅਦੂਲੀ ਦਾ ਨੋਟਿਸ ਭੇਜਿਆ ਤਾਂ ਪੁਲਸ ਨੂੰ ਕਾਰਵਾਈ ਕਰਨੀ ਪਈ ਹੈ। ਤਿੰਨਾਂ ਨੂੰ ਕੱਲ੍ਹ ਦੁਪਹਿਰ ਵਧੀਕ ਜ਼ਿਲ੍ਹਾ ਤੇ ਸੈਸ਼ਨ ਜੱਜ ਸੋਨੀਆ ਕਿੰਨਰਾਂ ਦੀ ਕੋਰਟ ਵਿੱਚ ਪੇਸ਼ ਕੀਤਾ ਜਾਣਾ ਸੀ। ਨਸ਼ਾ ਤਸਕਰੀ ਦੇ ਇਸੇ ਕੇਸ ਵਿੱਚ ਕੋਰਟ ਵਿੱਚ ਤਰੀਕ ਸੀ। ਉਨ੍ਹਾਂ ਦੇ ਛੁੱਟੀ ਉਤੇ ਹੋਣ ਕਾਰਨ ਪੇਸ਼ੀ ਨਹੀਂ ਹੋ ਸਕੀ।
ਪਤਾ ਲੱਗਾ ਹੈ ਕਿ ਇਨ੍ਹਾਂ ਦੋਸ਼ੀਆਂ ਦੇ ਸਾਥੀ ਮੁਲਾਜ਼ਮਾਂ ਨੇ ਉਨ੍ਹਾਂ ਨੂੰ ਅਦਾਲਤ ਤੋਂ ਭਜਾਉਣ ਦੀ ਕੋਸ਼ਿਸ਼ ਕੀਤੀ ਸੀ, ਪਰ ਡੀ ਐੱਸ ਪੀ ਸਿਟੀ ਪਰਮਜੀਤ ਸਿੰਘ ਅਤੇ ਚਾਰ ਡੀ ਐੱਸ ਪੀ, ਥਾਣਾ ਇੰਚਾਰਜ ਸਿਟੀ ਲਛਮਣ ਸਿੰਘ ਅਤੇ ਪੁਲਸ ਪਾਰਟੀ ਸਮੇਤ ਕੋਰਟ ਪਹੁੰਚੇ ਅਤੇ ਤਿੰਨਾਂ ਨੂੰ ਗ੍ਰਿਫਤਾਰ ਕਰ ਲਿਆ। ਉਨ੍ਹਾਂ ਨੂੰ ਕੋਰਟ ਵਿੱਚ ਪੇਸ਼ ਕਰ ਕੇ ਜੇਲ੍ਹ ਭੇਜ ਦਿੱਤਾ ਗਿਆ ਹੈ। ਵਰਨਣ ਯੋਗ ਹੈ ਕਿ ਕੋਟ ਈਸੇ ਖਾਂ ਪੁਲਸ ਨੇ ਦੋ ਅਪ੍ਰੈਲ 2016 ਨੂੰ ਕਾਕਾ ਸਿੰਘ ਵਾਸੀ ਮੁਹੱਲਾ ਅੰਗਦਪੁਰਾ ਨੂੰ ਗ੍ਰਿਫਤਾਰ ਕਰ ਕੇ 260 ਗਰਾਮ ਨਸ਼ੀਲਾ ਪਾਊਡਰ ਬਰਾਮਦ ਕਰਨ ਦਾ ਦਾਅਵਾ ਕੀਤਾ ਸੀ। ਕਾਕਾ ਸਿੰਘ ਨੂੰ ਬਾਅਦ ਵਿੱਚ ਕੋਰਟ ਤੋਂ ਜ਼ਮਾਨਤ ਮਿਲ ਗਈ। ਇਹ ਕੇਸ ਹਾਈ ਕੋਰਟ ਪਹੁੰਚ ਗਿਆ ਤਾਂ ਸੁਣਵਾਈ ਵਿੱਚ ਪਤਾ ਲੱਗਾ ਕਿ ਐੱਨ ਡੀ ਪੀ ਐੱਸ ਦੇ ਸੰਗੀਨ ਕੇਸ ਦੇ ਗਵਾਹ ਹੈਡ ਕਾਂਸਟੇਬਲ ਸਰਵਣ ਸਿੰਘ, ਏ ਐੱਸ ਆਈ ਸੁਖਦੇਵ ਸਿੰਘ ਅਤੇ ਹੈੱਡ ਕਾਂਸਟੇਬਲ ਕਰਮਜੀਤ ਸਿੰਘ 16 ਵਾਰ ਸੰਮਨ ਜਾਰੀ ਹੋਣ ਦੇ ਬਾਅਦ ਵੀ ਗਵਾਹੀ ਲਈ ਨਹੀਂ ਆਏ। ਹਾਈ ਕੋਰਟ ਨੇ 20 ਸਤੰਬਰ ਨੂੰ ਤਿੰਨਾਂ ਦੀ ਗ੍ਰਿਫਤਾਰੀ ਵਾਰੰਟ ਦੇ ਹੁਕਮ ਦਿੱਤੇ ਸਨ ਅਤੇ ਸੱਤ ਦਿਨ ਜੇਲ ਵਿੱਚ ਰੱਖਣ ਨੂੰ ਕਿਹਾ ਸੀ, ਤਾਂ ਕਿ ਗਵਾਹੀ ਹੋ ਸਕੇ। ਫਿਰ ਵੀ ਗ੍ਰਿਫਤਾਰੀ ਨਾ ਹੋਣ 'ਤੇ ਹਾਈ ਕੋਰਟ ਨੇ ਐਸ ਐਸ ਪੀ ਦੇ ਨਾਂਅ ਹੁਕਮ ਜਾਰੀ ਕਰ ਦਿੱਤਾ ਸੀ।