ਖਨੌਰੀ, 17 ਅਕਤੂਬਰ (ਪੋਸਟ ਬਿਊਰੋ)- ਏ ਟੀ ਐੱਮ ਕਾਰਡ ਕਲੋਨ ਕਰ ਕੇ (ਬਦਲ ਕੇ) ਠੱਗੀ ਮਾਰਨ ਵਾਲੇ ਇੱਕ ਅੰਤਰ ਰਾਜੀ ਗਿਰੋਹ ਦੇ ਚਾਰ ਮੈਂਬਰਾਂ ਨੂੰ ਖਨੌਰੀ ਪੁਲਸ ਵੱਲੋਂ ਕਾਬੂ ਕੀਤਾ ਗਿਆ ਹੈ।
ਥਾਣਾ ਖਨੌਰੀ ਦੇ ਮੁਖੀ ਇੰਸਪੈਕਟਰ ਕਰਤਾਰ ਸਿੰਘ ਨੇ ਦੱਸਿਆ ਕਿ ਤਿਉਹਾਰਾਂ ਦੌਰਾਨ ਸ਼ੱਕੀ ਪੁਰਸ਼ਾਂ ਦੀ ਚੈਕਿੰਗ ਬਾਰੇ ਪੁਲਸ ਪਾਰਟੀ ਅਨਾਜ ਮੰਡੀ ਵਿਖੇ ਗਸ਼ਤ ਕਰ ਰਹੀ ਸੀ ਕਿ ਉਸ ਨੂੰ ਸੂਹ ਮਿਲੀ ਕਿ ਆਕਾਸ਼ ਉਰਫ ਅੰਕੁਸ਼ ਪੁੱਤਰ ਬਲਵੀਰ ਸਿੰਘ, ਮਨਜੀਤ ਰਾਮ ਅਤੇ ਵਿਨੋਦ ਕੁਮਾਰ ਪੁੱਤਰਾਨ ਰਣਧੀਰ ਸਿੰਘ ਵਾਸੀਅਨ ਰਾਜਥਲ ਜ਼ਿਲਾ ਹਿਸਾਰ ਅਤੇ ਅਸ਼ੀਸ਼ ਪੁੱਤਰ ਸਤਪਾਲ ਵਾਸੀ ਹਾਂਸੀ, ਹਿਸਾਰ (ਹਰਿਆਣਾ) ਏ ਟੀ ਐੱਮਜ਼ ਵਿੱਚ ਭੋਲੇ ਭਾਲੇ ਬਜ਼ੁਰਗਾਂ ਤੇ ਔਰਤਾਂ ਨੂੰ ਗੁੰਮਰਾਹ ਕਰ ਕੇ ਉਨ੍ਹਾਂ ਦੇ ਏ ਟੀ ਐੱਮ ਨੂੰ ਧੋਖੇ ਨਾਲ ਬਦਲ ਕੇ ਜਾਂ ਉਨ੍ਹਾਂ ਦੀ ਪੈਸੇ ਕੱਢਣ ਵਿੱਚ ਮਦਦ ਦਾ ਦਿਖਾਵਾ ਕਰ ਕੇ ਬੇਵਕੂਫ ਬਣਾਉਂਦੇ ਹਨ। ਫਿਰ ਉਹ ਉਨ੍ਹਾਂ ਦੇ ਏ ਟੀ ਐੱਮ ਕਾਰਡ ਹਾਸਲ ਕਰ ਕੇ ਹੱਥ ਦੀ ਸਫਾਈ ਨਾਲ ਆਪਣੇ ਹੱਥ ਵਿੱਚ ਛੁਪਾਏ ਸਕਿਮਿੰਗ ਡਿਵਾਈਸ ਨਾਲ ਉਨ੍ਹਾਂ ਦੇ ਕਾਰਡ ਨੂੰ ਸਵਾਈਪ ਕਰ ਕੇ ਉਸ ਸਵਾਈਪ ਕੀਤੇ ਏ ਟੀ ਐੱਮ ਦਾ ਕਲੋਨ ਬਣਾਉਂਦੇ ਅਤੇ ਵੱਖ ਵੱਖ ਏ ਟੀ ਐੱਮ ਵਿੱਚੋਂ ਪੈਸੇ ਕਢਵਾ ਕੇ ਉਨ੍ਹਾਂ ਨਾਲ ਠੱਗੀ ਮਾਰਦੇ ਹਨ ਅਤੇ ਇਹ ਗਰੁੱਪ ਖਨੌਰੀ ਵਿਖੇ ਕਿਸੇ ਘਟਨਾ ਦੀ ਤਾਕ ਵਿੱਚ ਘੁੰਮ ਰਿਹਾ ਹੈ। ਇਸ ਉੱਤੇ ਕਾਰਵਾਈ ਕਰਦਿਆਂ ਪੁਲਸ ਨੇ ਇਨ੍ਹਾਂ ਨੂੰ ਅਨਾਜ ਮੰਡੀ ਖਨੌਰੀ ਤੋਂ ਫੜਿਆ ਅਤੇ ਇਨ੍ਹਾਂ ਦੇ ਖਿਲਾਫ ਧੋਖੇ ਨਾਲ ਲੋਕਾਂ ਦੇ ਦੇ ਏ ਟੀ ਐੱਮ ਦੀ ਨਕਲ ਬਣਾ ਕਰ ਕੇ ਠੱਗੀ ਮਾਰਨ ਦਾ ਮੁਕੱਦਮਾ ਦਰਜ ਕੀਤਾ ਗਿਆ ਹੈ। ਥਾਣਾ ਮੁਖੀ ਨੇ ਦੱਸਿਆ ਕਿ ਮੁੱਢਲੀ ਜਾਂਚ ਵਿੱਚ ਦੋਸ਼ੀਆਂ ਨੇ ਪੰਜਾਬ ਅਤੇ ਹਰਿਆਣਾ ਦੋਵਾਂ ਹੀ ਰਾਜਾਂ ਵਿੱਚ 20 ਤੋਂ 25 ਵਾਰਦਾਤਾਂ ਕੀਤੀਆਂ ਮੰਨੀਆਂ ਹਨ ਅਤੇ ਅਜੇ ਹੋਰ ਜਾਂਚ ਜਾਰੀ ਹੈ।