ਪੰਜਾਬੀ ਪੋਸਟ ਸੰਪਾਦਕੀ
ਜਿਸ ਢੰਗ ਨਾਲ ਮਨੁੱਖ ਆਪਣੇ ਜਿਸਮ ਨੂੰ ਲੈ ਕੇ ਤੁਰਦਾ ਹੈ, ਚਿਹਰੇ ਦੇ ਹਾਵਭਾਵ ਵਰਤਦਾ ਹੈ, ਉਸਤੋਂ ਉਹਨਾਂ ਗੱਲਾਂ ਦਾ ਪਤਾ ਲਾਇਆ ਜਾ ਸਕਦਾ ਹੈ ਜਿਹੜੀਆਂ ਮਨੁੱਖ ਹਜ਼ਾਰਾਂ ਸ਼ਬਦ ਬੋਲ ਕੇ ਵੀ ਜ਼ਾਹਰ ਨਹੀਂ ਕਰ ਸਕਦਾ। ਹਰ ਮਨੁੱਖ ਦੇ ਜਿਸਮ ਦੀ ਆਪਣੀ ਭਾਸ਼ਾ ਅਤੇ ਆਪਣਾ ਰਉਂ ਹੁੰਦਾ ਹੈ। ਜਿੱਤੇ ਹੋਏ ਮਨੁੱਖ ਦੇ ਜਿਸਮ ਦੀ ਭਾਸ਼ਾ (body language) ਅਤੇ ਹਾਰੀ ਮਾਨਸਿਕਤਾ ਵਾਲੇ ਮਨੁੱਖ ਦੇ ਸਰੀਰ ਤੋਂ ਮਿਲਦੇ ਸੰਕੇਤਾਂ ਵਿੱਚ ਜ਼ਮੀਨ ਅਸਮਾਨ ਦਾ ਫਰਕ ਹੁੰਦਾ ਹੈ। ਜੇ ਇਸ ਗੱਲ ਨੂੰ ਚੋਣ ਪ੍ਰਚਾਰ ਦੇ ਮਾਹੌਲ ਵਿੱਚ ਸਿਆਸੀ ਲੀਡਰਾਂ ਵੱਲੋਂ ਬੋਲੀ ਜਾਂਦੀ ਜਿਸਮਾਂ ਦੀ ਭਾਸ਼ਾ ਨਾਲ ਮਿਲਾ ਕੇ ਵੇਖਿਆ ਜਾਵੇ ਤਾਂ ਇਹ ਸਮਝਣ ਵਿੱਚ ਕੋਈ ਬਹੁਤੀ ਦੇਰ ਨਹੀਂ ਲੱਗਦੀ ਕਿ ਕਿਹੜਾ ਲੀਡਰ ਖੁਦ ਨੂੰ 21 ਅਕਤੂਬਰ ਵਾਲੇ ਦਿਨ ਕਿੱਥੇ ਖੜਾ ਵੇਖ ਰਿਹਾ ਹੈ।
2015 ਵਿੱਚ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਤੋਰ-ਚਾਲ ਇੱਕ ਮਸਤਾਨੇ ਗੱਭਰੂ ਵਾਲੀ ਹੁੰਦੀ ਸੀ, ਉਹ ਔਰਤਾਂ ਨਾਲ ਮਿੱਤਰਤਾ ਭਰਿਆ ਹਾਸਾ ਠੱਠਾ ਕਰਨ ਵਿੱਚ ਮਾਣ ਮਹਿਸੂਸ ਕਰਦਾ ਸੀ, ਬੱਚਿਆਂ ਨਾਲ ਬੱਚਾ ਅਤੇ ਬਜ਼ੁਰਗਾਂ ਨੂੰ ਸਤਕਾਰ ਦੇਣ ਵੇਲੇ ਉਹ ਅਜਬ ਦਾ ਸਲੀਕੇ ਨਾਲ ਪਾਲਿਆ ਪੋਸਿਆ ਨੌਜਵਾਨ ਵਿਖਾਈ ਦੇਂਦਾ ਸੀ। ਮੂਲਵਾਸੀਆਂ ਨਾਲ ਵਾਅਦੇ ਕਰਨ ਵੇਲੇ ਅੱਖਾਂ ਵਿੱਚ ਗੱਲ 2 ਉੱਤੇ ਹੰਝੂ ਵਹਾ ਦੇਣੇ ਉਸ ਲਈ ਸੁਭਾਵਿਕ ਗੱਲ ਸੀ। ਪ੍ਰਧਾਨ ਮੰਤਰੀ ਦੀ ਕੁਰਸੀ ਉੱਤੇ ਬੈਠਣ ਤੋਂ ਬਾਅਦ ਉਹ ਆਪਣੇ ਜਿਸਮ ਦੀ ਭਾਸ਼ਾ ਦਾ ਹੋਰ ਵੀ ਵਧੇਰੇ ਜੇਤੂ ਨੁਮਾ ਅੰਦਾਜ਼ ਵਿੱਚ ਇਜ਼ਹਾਰ ਕਰਦਾ ਰਿਹਾ ਹੈ। ਨਵ-ਵਿਆਹੇ ਜੋੜਿਆਂ ਦੇ ਨਾਲ ਫੋਟੋ ਖਿਚਵਾਉਣੀਆਂ, ਟੋਰਾਂਟੋ ਸਮੇਤ ਵੱਖ ਵੱਖ ਸ਼ਹਿਰਾਂ ਵਿੱਚ ਸਰੀਰ ਤੋਂ ਕਮੀਜ਼ ਉਤਾਰ ਕੇ ਸਵੇਰ ਦੀ ਸੈਰ ਕਰਨੀ ਉਸ ਵਾਸਤੇ ਆਮ ਗੱਲ ਸੀ । ਅਤੇ ਫੇਰ ਅਚਾਨਕ ਐਸ ਐਨ ਸੀ ਲਾਵਾਲਿਨ ਕਿੱਸਾ ਅਤੇ ਜੋਡੀ ਵਿਲਸਨ ਦਾ ਅਸਤੀਫਾ ਵਾਪਰ ਗਿਆ ਜਿਸਤੋਂ ਬਾਅਦ ਸਾਰਾ ਚਾਅ ਮੱਲ੍ਹਾਰ ਜਿਵੇਂ ਖੰਭ ਲਾ ਕੇ ਉੱਡ ਗਿਆ ਹੋਵੇ। ਅੱਜ ਕੱਲ ਚੋਣ ਪ੍ਰਚਾਰ ਵੇਲੇ ਟਰੂਡੋ ਹੋਰਾਂ ਦੇ ਸਰੀਰ ਦੀ ਬੋਲਚਾਲ ਬਹੁਤ ਹੀ ਠੰਰਮੇ ਵਾਲੀ ਅਤੇ ਕਈ ਵਾਰ ਥੋੜੀ ਅਜੀਬ ਜਿਹੀ ਵੀ ਹੁੰਦੀ ਹੈ।
ਪੰਜਾਬੀ ਪੋਸਟ ਦੇ ਇੱਕ ਪਾਠਕ ਨੇ ਸਹੀ ਹੀ ਆਖਿਆ ਕਿ ਚੋਣ ਸਰਵੇਖਣਾਂ ਦੇ ਸਿੱਟੇ ਕੀ ਵੇਖਣੇ ਹਨ, ਤੁਸੀਂ ਉਹਨਾਂ ਦੇ ਸਰੀਰ ਦੀ ਜ਼ੁਬਾਨ ਵੇਖ ਲਵੋ। ਜਿੱਥੇ ਟਰੂਡੋ ਹੋਰੀਂ ਬਹੁਤ ਹੀ ਸੁਸਤਾਈ ਚਾਲ ਵਿੱਚ ਹਨ, ਉੱਥੇ ਜਗਮੀਤ ਸਿੰਘ ਅੱਜ ਕੱਲ ਗੱਲ 2 ਉੱਤੇ ਭੰਗੜੇ ਪਾ ਰਿਹਾ ਹੈ। ਹਾਲੇ ਕੱਲ ਹੀ ਉਸਦੀ ਟੋਰਾਂਟੋ ਵਿੱਚ ਸੰਤਰੀ ਰੰਗੀ ਦਸਤਾਰ ਪਹਿਨ ਕੇ ਐਨ ਡੀ ਪੀ ਦੇ ਸੰਤਰੀ ਰੰਗ ਵਿੱਚ ਰੰਗੇ ਸਮਰੱਥਕਾਂ ਦੇ ਹਜੂਮ ਵਿੱਚ ਭੰਗੜਾ ਪਾਉਣ ਦੀ ਵੀਡੀਓ ਵਾਇਰਲ ਹੋਈ ਹੈ। ਇੱਕ ਵਕਤ ਸੀ ਜਦੋਂ ਐਨ ਡੀ ਪੀ ਦੇ ਅੰਦਰੂਨੀ ਵਿਦਰੋਹ, ਪਾਰਲੀਮੈਂਟ ਵਿੱਚ ਸੀਟ ਨਾ ਹੋਣ ਅਤੇ ਖਾੜਕੂਵਾਦ ਨਾਲ ਜੁੜੇ ਸੁਆਲਾਂ ਦਾ ਸਾਹਮਣਾ ਕਰ ਰਹੇ ਜਗਮੀਤ ਸਿੰਘ ਨੂੰ ਵਖ਼ਤ ਪਾ ਰੱਖਿਆ ਸੀ। ਅੱਜ ਕੱਲ ਉਹ ਜਗਮੀਤ ਸਿੰਘ ਵਿੱਚ ਜੇਤੂਆਂ ਵਾਲੀ ਤੋਰ ਤੁਰ ਰਿਹਾ ਹੈ ਜਿਸਦਾ ਲਾਭ ਉਸਨੂੰ ਅਤੇ ਐਨ ਡੀ ਪੀ ਦੋਵਾਂ ਨੂੰ ਹੋਣਾ ਲਾਜ਼ਮੀ ਹੈ।
ਬੇਸ਼ੱਕ ਭੰਗੜਾ ਪਾਉਣਾ ਕੰਜ਼ਰਵੇਟਿਵ ਲੀਡਰ ਐਂਡਰੀਊ ਸ਼ੀਅਰ ਦੇ ਹੱਥ ਵੱਸ ਦਾ ਰੋਗ ਨਹੀਂ ਹੈ ਪਰ ਪਿਛਲੇ ਦਿਨਾਂ ਵਿੱਚ (ਖਾਸ ਕਰਕੇ ਡੀਬੇਟ ਤੋਂ ਬਾਅਦ) ਉਸਦੇ ਵੀ ਸਰੀਰ ਦੀ ਭਾਸ਼ਾ ਪਹਿਲਾਂ ਨਾਲੋਂ ਬਹੁਤ ਬਦਲ ਚੁੱਕੀ ਹੈ। ਅੱਜ ਕੱਲ ਉਹ ਬਹੁਤ ਹੱਸ 2 ਕੇ ਗੱਲਾਂ ਕਰਦਾ ਹੈ ਹਾਲਾਂਕਿ ਇਹ ਮਸ਼ਹੂਰ ਰਿਹਾ ਹੈ ਕਿ ਹਾਸਾ ਹੱਸਣਾ ਐਂਡਰੀਊ ਸ਼ੀਅਰ ਲਈ ਸੱਭ ਤੋਂ ਮੁਸ਼ਕਲ ਕੰਮ ਹੈ। ਉਹ ਹੱਸੇ ਵੀ ਕਿਉਂ ਨਾ ਕਿਉਂਕਿ ਵੱਖ 2 ਸਰਵੇਖਣਾਂ ਦੇ ਆਧਾਰ ਉੱਤੇ ਆ ਰਹੀਆਂ ਇਹ ਖਬ਼ਰਾਂ ਕਿ ਕੰਜ਼ਰਵੇਟਿਵ ਪਾਰਟੀ ਨੇ ਲਿਬਰਲ ਮੁਕਾਬਲੇ ਬੜਤ ਹਾਸਲ ਕਰ ਲਈ ਹੈ, ਐਂਡਰੀਊ ਸ਼ੀਅਰ ਵਾਸਤੇ ਦੁੱਧ ਘਿਉ ਦੀਆਂ ਨਾਲਾਂ ਬਰਾਬਰ ਹਨ।
2015 ਦੀਆਂ ਚੋਣਾਂ ਵਿੱਚ ਜਸਟਿਨ ਟਰੂਡੋ ਨੂੰ ਜਿਤਾਉਣ ਵਿੱਚ ਔਰਤਾਂ ਦਾ ਵੱਡਾ ਹੱਥ ਸੀ ਕਿਉਂਕਿ ਇਹ ਹਸਮੁਖ ਅਤੇ ਮਿਲਾਪੜਾ ਸੀ ਜਦੋਂ ਕਿ ਸਟੀਫਨ ਹਾਰਪਰ ਕੋਲ ਇਹ ਗੁਰ ਨਹੀਂ ਸਨ। ਕਿਹਾ ਜਾਂਦਾ ਹੈ ਕਿ ਜਿਸਮ ਦੀ ਭਾਸ਼ਾ ਪੜ ਕੇ ਕਿਸੇ ਵਿਅਕਤੀ ਦੀ ਮਨੋਦਿਸ਼ਾ ਦਾ ਜਿੰਨਾ ਅੰਦਾਜ਼ਾ ਔਰਤ ਲਾ ਸਕਦੀ ਹੈ, ਇਹ ਰੱਬੀ ਗੁਣ ਰੱਬ ਨੇ ਮਰਦ ਵਿੱਚ ਕਿਤੇ ਘੱਟ ਮਾਤਰਾ ਵਿੱਚ ਪਾਇਆ ਜਾਂਦਾ ਹੈ। ਸੋਚਿਆ ਜਾ ਸਕਦਾ ਹੈ ਕਿ ਭੰਗੜਾ ਪਾਉਂਦੇ ਜਗਮੀਤ ਸਿੰਘ ਅਤੇ ਹੱਸਦੇ ਐਂਡਰੀਊ ਸ਼ੀਅਰ ਦੇ ਮੁਕਾਬਲੇ ਸਹਿਮੇ ਸਹਿਮੇ ਜਸਟਿਨ ਟਰੂਡੋ ਨੂੰ ਵੋਟਾਂ ਹਾਸਲ ਕਰਨੀਆਂ ਕਿੰਨਾ ਔਖਾ ਹੋ ਸਕਦਾ ਹੈ। ਇਸ ਤੱਥ ਨੂੰ ਸ਼ਾਇਦ CBC ਨੇ ਵੀ ਭਾਂਪ ਲਿਆ ਹੈ ਜਿਸ ਦੀ ਇੱਕ ਖ਼ਬਰ ਦਾ ਕੱਲ ਸਿਰਲੇਖ ਸੀ,‘Trudeau concedes Tories could win, ਟਰੂਡੋ ਨੇ ਕਬੂਲਿਆ ਕਿ ਟੋਰੀ ਜਿੱਤ ਸਕਦੇ ਹਨ। ਜੇ ਲੀਡਰਾਂ ਦੇ ਜਿਸਮਾਂ ਦੀ ਭਾਸ਼ਾ ਕੋਈ ਸੰਕੇਤ ਦੇ ਰਹੀ ਹੈ ਤਾਂ CBC ਦੀ ਉਪਰੋਕਤ ਖ਼ਬਰ 21 ਅਕਤੂਬਰ ਨੂੰ ਸ਼ਾਇਦ ਸੱਚ ਹੀ ਸਾਬਤ ਹੋ ਜਾਵੇ।