ਰੋਮ, 16 ਅਕਤੂਬਰ (ਪੋਸਟ ਬਿਊਰੋ)- ਅੱਜਕੱਲ੍ਹ ਜਦੋਂ ਦੁਨੀਆ ਦੇ ਬਹੁਤੇ ਲੋਕ ਗੂਗਲ ਨੂੰ ਸਰਵ ਸ੍ਰੇਸ਼ਟ ਮੰਨ ਕੇ ਹਰ ਕੰਮ ਇਸ ਦੀ ਮਦਦ ਨਾਲ ਨੇਪਰੇ ਚਾੜ੍ਹਨ ਦੀ ਕੋਸ਼ਿਸ਼ ਕਰਦੇ ਹਨ, ਜਿਸ ਸੰਬੰਧੀ ਉਨ੍ਹਾਂ ਨੂੰ ਕੋਈ ਢੁੱਕਵੀਂ ਜਾਣਕਾਰੀ ਨਹੀਂ ਹੁੰਦੀ, ਪਰ ਕੀ ਅਜਿਹਾ ਹੋ ਸਕਦਾ ਹੈ ਕਿ ਗੂਗਲ ਦੀ ਗਲਤ ਜਾਣਕਾਰੀ ਕਾਰਨ ਲੋਕਾਂ ਨੂੰ ਮੁਸੀਬਤ ਝੱਲਣੀ ਪਵੇ। ਇਹ ਗੱਲ ਇਟਲੀ ਦੇ ਸੂਬੇ ਸਰਦੀਨੀਆ ਵਿਖੇ ਸੱਚ ਸਾਬਤ ਹੋਈ ਹੈ, ਜਿੱਥੇ ਗੂਗਲ ਮੈਪ ਦੀ ਗਲਤ ਜਾਣਕਾਰੀ ਸੈਲਾਨੀਆਂ ਲਈ ਮੁਸੀਬਤ ਦਾ ਸਬੱਬ ਬਣਨ ਲੱਗ ਪਈ ਹੈ।
ਇਟਲੀ ਦੇ ਰਾਜ ਸਰਦੀਨੀਆ ਵਿਚਲੇ ਜ਼ਿਲਾ ਓਲੀਆਸਟਰਾ ਦੇ ਸ਼ਹਿਰ ਬੋਨਈ ਦੇ ਮੇਅਰ ਸਲਵਾਤੋਰੇ ਕੋਰੀਅਸ ਨੇ ਦੱਸਿਆ ਕਿ ਸਰਦੀਨੀਆ ਖੇਤਰ ਵਿੱਚ ਆਉਂਦੇ ਸੈਲਾਨੀ ਗੂਗਲ ਮੈਪ ਦੀ ਵਰਤੋਂ ਨਾ ਕਰਨ, ਕਿਉਂਕਿ ਇਸ ਦੀ ਗਲਤ ਜਾਣਕਾਰੀ ਕਾਰਨ ਇਸ ਇਲਾਕੇ ਵਿੱਚ ਅਨੇਕਾਂ ਸੈਲਾਨੀ ਭਟਕ ਗਏ ਹਨ, ਜਿਨ੍ਹਾਂ ਨੂੰ ਬਾਅਦ ਵਿੱਚ ਕਾਫੀ ਜੱਦੋਜਹਿਦ ਕਰ ਕੇ ਲੱਭਿਆ ਗਿਆ। ਅਸਲ ਵਿੱਚ ਸਰਦੀਨੀਆ ਦਾ ਸ਼ਹਿਰ ਬੋਨਈ ਉਤਰ ਪੂਰਬੀ ਇਲਾਕੇ ਦੇ ਉਜਾੜ ਵਿੱਚ ਹੈ, ਜਿਸ ਦੇ ਸਮੁੰਦਰੀ ਕਿਨਾਰੇ ਚਿੱਟੇ ਰੇਤ ਕਾਰਨ ਮਸ਼ਹੂਰ ਹਨ, ਜਿਨ੍ਹਾਂ ਨੂੰ ਦੇਖਣ ਲਈ ਇਟਲੀ ਤੋਂ ਬਾਹਰੋਂ ਸੈਲਾਨੀ ਵੱਡੇ ਪੱਧਰ 'ਤੇ ਆਉਂਦੇ ਹਨ। ਜਦੋਂ ਸੈਲਾਨੀ ਇਟਲੀ ਦੇ ਬਾਹਰੋਂ ਆਉਂਦੇ ਹਨ ਤਾਂ ਗੂਗਲ ਮੈਪ ਦੀ ਮਦਦ ਨਾਲ ਬੋਨਈ ਸ਼ਹਿਰ ਪਹੁੰਚਣ ਦੀ ਕੋਸ਼ਿਸ਼ ਕਰਦੇ ਹਨ, ਪਰ ਗੂਗਲ ਮੈਪ ਸੈਲਾਨੀਆਂ ਨੂੰ ਗਲਤ ਜਾਣਕਾਰੀ ਦੇਂਦਾ ਹੈ, ਜਿਸ ਕਾਰਨ ਉਹ ਭਟਕ ਜਾਂਦੇ ਹਨ।
ਪਿਛਲੇ ਸਾਲ 144 ਸੈਲਾਨੀਆਂ ਨੂੰ ਐਮਰਜੈਂਸੀ ਸੇਵਾਵਾਂ ਦੁਆਰਾ ਇਸ ਖੇਤਰ ਵਿੱਚ ਗੁੰਮ ਹੋ ਜਾਣ ਤੋਂ ਬਾਅਦ ਬਚਾਇਆ ਗਿਆ ਸੀ। ਸ਼ਹਿਰ ਬੋਨਈ ਦੇ ਮੇਅਰ ਸਲਵਾਤੋਰੇ ਕੋਰੀਅਸ ਨੇ ਸੈਲਾਨੀਆਂ ਦੇ ਭਲੇ ਲਈ ਇਸ ਇਲਾਕੇ 'ਚ ਗੂਗਲ ਮੈਪ ਦੀ ਵਰਤੋਂ 'ਤੇ ਪਾਬੰਦੀ ਲਾ ਦਿੱਤੀ ਹੈ ਤਾਂ ਜੋ ਸੈਲਾਨੀਆਂ ਨੂੰ ਬੋਨਈ ਸ਼ਹਿਰ ਆਉਂਦੇ ਰਸਤੇ ਭਟਕਣ ਨਾਲ ਆਉਂਦੀਆਂ ਪ੍ਰੇਸ਼ਾਨੀਆਂ ਤੋਂ ਬਚਾਇਆ ਜਾ ਸਕੇ। ਮੇਅਰ ਨੇ ਇਸ ਪਾਬੰਦੀ ਬਾਰੇ ਸਥਾਨਕ ਮੀਡੀਆ ਵਿੱਚ ਇਸ਼ਤਿਹਾਰ ਰਾਹੀਂ ਸੈਲਾਨੀਆਂ ਨੂੰ ਜਾਗਰੂਕ ਕਰਨ ਦੀ ਕੋਸ਼ਿਸ਼ ਕੀਤੀ ਅਤੇ ਸੋਸ਼ਲ ਮੀਡੀਆ 'ਤੇ ਸਿਟੀ ਕੌਂਸਲ ਬੋਨਈ ਦੀ ਵੈੱਬਸਾਈਟ 'ਤੇ ਵੀ ਇਹ ਵਿਸ਼ੇਸ਼ ਜਾਣਕਾਰੀ ਜਾਰੀ ਕੀਤੀ ਹੈ। ਮੇਅਰ ਨੇ ਕਿਹਾ ਕਿ ਗੂਗਲ ਮੈਪ ਦੀ ਗਲਤ ਜਾਣਕਾਰੀ ਨਾਲ ਸੈਲਾਨੀ ਅਜਿਹੇ ਪਹਾੜੀ ਤੰਗ ਰਸਤਿਆਂ 'ਚ ਫਸ ਜਾਂਦੇ ਹਨ, ਜਿੱਥੋਂ ਬਿਨਾਂ ਸਹਾਇਤਾ ਉਨ੍ਹਾਂ ਦਾ ਸਹੀ ਰਾਹ 'ਤੇ ਆਉਣਾ ਅਸੰਭਵ ਹੁੰਦਾ ਹੈ। ਮੇਅਰ ਕੋਰੀਅਸ ਦੀ ਇਸ ਕਾਰਵਾਈ ਨਾਲ ਬਾਹਰੋਂ ਆਉਣ ਵਾਲੇ ਸੈਲਾਨੀ ਉਨ੍ਹਾਂ ਦਾ ਧੰਨਵਾਦ ਕਰ ਰਹੇ ਹਨ।