ਮਾਨਸਾ, 14 ਅਕਤੂਬਰ (ਪੋਸਟ ਬਿਊਰੋ)- ਇਸ ਜਿ਼ਲੇ ਦੀ ਪੁਲਿਸ ਨੇ ਮੋਬਾਈਲ ਫੋਨ ਦੀਆਂ ਨਕਲੀ ਬੈਟਰੀਆਂ ਉੱਤੇ ਨਾਮੀ ਕੰਪਨੀਆਂ ਦੇ ਮਾਰਕੇ ਨਾਲ ਅਸਲੀ ਦੱਸ ਕੇ ਮਾਰਕੀਟ ਵਿਚ ਸਪਲਾਈ ਕਰਨ ਵਾਲੇ ਗਿਰੋਹ ਦਾ ਪਰਦਾ ਫਾਸ਼ ਕੀਤਾ ਹੈ। ਫੜੀਆਂ ਗਈਆਂ ਬੈਟਰੀਆਂ ਦੀ ਬਾਜ਼ਾਰੀ ਕੀਮਤ 1 ਕਰੋੜ 16 ਲੱਖ 65 ਹਜ਼ਾਰ 750 ਰੁਪਏ ਬਣਦੀ ਹੈ।
ਐੱਸ ਐੱਸ ਪੀ ਡਾ. ਨਰਿੰਦਰ ਭਾਰਗਵ ਨੇ ਦੱਸਿਆ ਕਿ ਪੁਲਿਸ ਨੂੰ ਸੂਹ ਮਿਲੀ ਸੀ ਕਿ ਵਿਨੋਦ ਕੁਮਾਰ ਉਰਫ ਵਿਸ਼ੂ, ਰਵੀ ਕਾਂਤ ਤੇ ਰਾਹੁਲ ਕੁਮਾਰ ਏਥੇ ਚਾਈਨਾ-ਮੇਡ ਮਾਲ ਲਿਆ ਕੇ ਸੈਮਸੰਗ, ਨੋਕੀਆ, ਆਈਫੋਨ ਆਦਿ ਕੰਪਨੀਆਂ ਦੇ ਰੈਪਰ ਲਾ ਕੇ ਪੰਜਾਬ ਅਤੇ ਇਸ ਤੋਂ ਬਾਹਰ ਦੇ ਬਾਜ਼ਾਰ ਵਿੱਚ ਨਕਲੀ ਮੋਬਾਈਲਾਂ ਬੈਟਰੀਆਂ ਅਸਲੀ ਦੱਸ ਕੇ ਵੇਚਦੇ ਤੇ ਲੋਕਾਂ ਨਾਲ ਧੋਖਾ ਕਰਕੇ ਮੋਟੀ ਕਮਾਈ ਕਰਦੇ ਹਨ। ਇਸ ਉੱਤੇ ਉਕਤ ਦੋਸ਼ੀਆਂ ਵਿਰੁੱਧ ਥਾਣਾ ਸਿਟੀ-2 ਮਾਨਸਾ ਵਿਖੇ ਕੇਸ ਦਰਜ ਕੀਤਾ ਸੀ ਅਤੇ ਡੀ ਐਸ ਪੀ ਹਰਜਿੰਦਰ ਸਿੰਘ ਦੀ ਨਿਗਰਾਨੀ ਹੇਠ ਮੋਹਨ ਲਾਲ ਮੁਖੀ ਥਾਣਾ ਸਿਟੀ-2 ਅਤੇ ਐਸ ਆਈ ਅੰਗਰੇਜ਼ ਸਿੰਘ ਇੰਚਾਰਜ ਸੀ ਆਈ ਏ ਸਟਾਫ਼ ਨੇ ਸਾਂਝੀ ਕਾਰਵਾਈ ਵਿੱਚ ਛਾਪਾ ਮਾਰ ਕੇ ਵਿਨੋਦ ਕੁਮਾਰ ਉਰਫ ਵਿਸ਼ੂ ਨੂੰ ਫੜ ਲਿਆ, ਜਿਸ ਦੀ ਦੁਕਾਨ ਵਿੱਚੋਂ ਵੱਖ-ਵੱਖ ਨਾਮੀ ਕੰਪਨੀਆਂ ਦੇ ਮਾਰਕੇ ਵਾਲੀਆਂ 46,663 ਨਕਲੀ ਬੈਟਰੀਆਂ ਬਰਾਮਦ ਹੋਈਆਂ। ਇਸ ਤੋਂ ਇਲਾਵਾ ਕੁਝ ਤਿਆਰ ਕਰਨ ਵਾਲੀਆਂ ਬਿਨਾ ਰੈਪਰ ਵਾਲੀਆਂ ਅਤੇ 14 ਵੱਡੇ ਰੋਲ (ਰੈਪਰ), 750 ਨਕਲੀ ਲੀਡਜ਼ (ਤਾਰਾਂ), 400 ਨਕਲੀ ਚਾਰਜਰ (ਅਡਾਪਟਰ) ਆਦਿ ਵੀ ਮਿਲ ਗਿਆ। ਗ੍ਰਿਫ਼ਤਾਰ ਕੀਤੇ ਵਿਨੋਦ ਕੁਮਾਰ ਉਰਫ ਵਿਸ਼ੂ ਵਿਰੁੱਧ ਪਹਿਲਾਂ ਵੀ ਡੁਪਲੀਕੇਟ ਬੈਟਰੀਆਂ ਬਣਾ ਕੇ ਵੇਚਣ ਸਬੰਧੀ ਦਾ ਮਾਰਕ ਐਕਟ 1999 ਦਾ ਕੇਸ ਦਰਜ ਹੈ, ਜਿਹੜਾ ਅਦਾਲਤ ਵਿਚ ਚੱਲ ਰਿਹਾ ਹੈ ਤੇ ਉਹ ਜ਼ਮਾਨਤ ਉੱਤੇ ਆਇਆ ਹੋਇਆ ਹੈ। ਉਸ ਨੇ ਮੁੱਢਲੀ ਪੁੱਛਗਿੱਛ ਦੌਰਾਨ ਦੱਸਿਆ ਕਿ ਉਹ ਇਹ ਡੁਪਲੀਕੇਟ ਬੈਟਰੀਆਂ ਬਣਾਉਣ ਦਾ ਮਟੀਰੀਅਲ ਚੀਨ ਦੀ ਕਾਰਗੋ ਐਮ ਐਚ ਟੀ ਸੀ ਕੰਪਨੀ ਤੋਂ ਦੁਕਾਨ ਰਾਹੀਂ ਅਤੇ ਦਿੱਲੀ ਦੀ ਗੁਫਾਰ ਮਾਰਕੀਟ ਰਾਹੀਂ ਮੰਗਵਾਉਂਦੇ ਅਤੇ ਖ਼ੁਦ ਵੀ ਜਾ ਕੇ ਲਿਆਉਂਦੇ ਹਨ। ਇਸ ਕੰਮ ਨੂੰ ਅੱਗੇ ਵਧਾਉਣ ਲਈ ਵਿਨੋਦ ਕੁਮਾਰ ਉਰਫ ਵਿਸ਼ੂ ਆਪ ਖ਼ੁਦ ਕਈ ਵਾਰ ਚੀਨ ਜਾ ਆਇਆ ਹੈ। ਉਸ ਨੇ ਦੱਸਿਆ ਕਿ ਉਹ ਇਨ੍ਹਾਂ ਨਕਲੀ ਬੈਟਰੀਆਂ ਨੂੰ ਅਸਲੀ ਦੱਸ ਕੇ ਪੰਜਾਬ ਦੇ ਸ਼ਹਿਰਾਂ ਮਾਨਸਾ, ਮੌੜ ਮੰਡੀ, ਤਲਵੰਡੀ ਸਾਬੋ, ਗੋਨਿਆਣਾ ਮੰਡੀ, ਜੈਤੋ, ਬਠਿੰਡਾ ਤੋ ਇਲਾਵਾ ਦਿੱਲੀ ਅਤੇ ਰਾਜਸਥਾਨ ਦੇ ਗੰਗਾਨਗਰ ਆਦਿ ਬਾਜ਼ਾਰਾਂ ਨੂੰ ਸਪਲਾਈ ਕਰਕੇ ਕਮਾਈ ਕਰਦੇ ਸਨ। ਉਨ੍ਹਾਂ ਦੱਸਿਆ ਕਿ ਗ੍ਰਿਫ਼ਤਾਰ ਕੀਤੇ ਦੋਸ਼ੀ ਨੂੰ ਅਦਾਲਤ ਪੇਸ਼ ਕਰਕੇ ਪੁਲਿਸ ਰਿਮਾਂਡ ਲੈ ਕੇ ਪੁੱਛਗਿੱਛ ਵਿੱਚ ਪਤਾ ਲਾਇਆ ਜਾਵੇਗਾ ਕਿ ਹੋਰ ਕਿਹੜੇ ਲੋਕ ਸ਼ਾਮਲ ਹਨ।