ਪੰਜਾਬੀ ਪੋਸਟ ਸੰਪਾਦਕੀ

ਅਲਬਰਟਰਾ ਦਾ ਪ੍ਰੀਮੀਅਰ ਜੇਸਨ ਕੈਨੀ ਜਦੋਂ ਬੀਤੇ ਹਫ਼ਤੇ ਕੰਜ਼ਰਵੇਟਿਵ ਪਾਰਟੀ ਦੇ ਉਮੀਦਵਾਰਾਂ ਦੀ ਹਮਾਇਤ ਵਿੱਚ ਗਰੇਟਰ ਟੋਰਾਂਟੋ ਏਰੀਆ ਵਿੱਚ ਆਇਆ ਤਾਂ ਅਖਬਾਰਾਂ ਵਿੱਚ ਆਮ ਚਰਚਾ ਬਣੀ ਕਿ ਉਹ ਐਂਡਰੀਊ ਸ਼ੀਅਰ ਦਾ ਹੱਥ ਮਜ਼ਬੂਤ ਕਰਨ ਵਾਸਤੇ ਇੱਥੇ ਪੁੱਜਿਆ ਹੈ। ਬਹੁਤ ਘੱਟ ਲੋਕ ਜਾਣਦੇ ਹੋਣਗੇ ਕਿ ਜੇਸਨ ਕੈਨੀ ਵੱਲੋਂ ਬਰੈਂਪਟਨ ਨੌਰਥ ਤੋਂ ਕੰਜ਼ਰਵੇਟਿਵ ਉਮੀਦਵਾਰ ਅਰਪਣ ਖੰਨਾ ਦੇ ਹੱਕ ਵਿੱਚ ਜੂਨ 2019 ਵਿੱਚ ਹੀ ਵੋਟਰਾਂ ਨੂੰ ਲਾਮਬੰਦ ਕਰਨ ਲਈ ਬਰੈਂਪਟਨ ਆ ਕੇ ਆਪਣੇ ਸਮਰੱਥਨ ਦਾ ਐਲਾਨ ਕੀਤਾ ਸੀ। ਜੇਸਨ ਕੈਨੀ ਦਾ ਅਰਪਣ ਖੰਨਾ ਦੇ ਹੱਕ ਵਿੱਚ ਆਵਾਜ਼ ਚੁੱਕਣਾ ਕੋਈ ਸਬੱਬ ਨਹੀਂ ਸਗੋਂ ਅਰਪਣ ਦੀ ਪਾਰਟੀ ਵਾਸਤੇ ਕੀਤੀ ਸਾਲਾਂ ਬੱਧੀ ਮਿਹਨਤ ਦਾ ਕਰਜ਼ ਉਤਾਰਨ ਦਾ ਇੱਕ ਹਿੱਸਾ ਕਿਹਾ ਜਾ ਸਕਦਾ ਹੈ।

 ਅਰਪਣ ਖੰਨਾ ਉਹ ਨੌਜਵਾਨ ਹੈ ਜਿਸਨੂੰ ਸਿਆਸਤ ਦੀ ਗੁੜਤੀ ਪਰਿਵਾਰ ਵਿੱਚੋਂ ਮਿਲੀ ਹੈ ਅਤੇ ਕੰਜ਼ਰਵੇਟਿਵ ਪਾਰਟੀ ਪ੍ਰਤੀ ਉਸਦੀ ਵਚਨਬੱਧਤਾ ਉਸ ਸਮੇਂ ਤੋਂ ਰਹੀ ਹੈ ਜਦੋਂ ਉਹ ਹਾਲੇ ਯੂਨੀਵਰਸਿਟੀ ਵਿੱਚ ਹੀ ਪੜਦਾ ਸੀ। ਪੰਜਾਬ ਦੇ ਮਸ਼ਹੂਰ ਕਸਬੇ ਰਾਏਕੋਟ ਦੇ ਸਨਮਾਨਤ ਪਰਿਵਾਰ ਨਾਲ ਸਬੰਧਿਤ ਅਰਪਣ ਦੀ ਪੰਜਾਬੀ ਭਾਈਚਾਰੇ ਵਿੱਚ ਕਾਫ਼ੀ ਜਿ਼ਆਦਾ ਮਕਬੂਲੀਅਤ ਹੈ। ਉਹ ਇੱਕ ਮਿਲਣਸਾਰ ਅਤੇ ਮਿਹਨਤੀ ਨੌਜਵਾਨ ਹੈ ਜਿਸਨੂੰ ਵਕਾਲਤ ਤੱਕ ਦੀ ਪੜਾਈ ਕਰਨ ਤੋਂ ਇਲਾਵਾ ਫੈਡਰਲ ਅਤੇ ਪ੍ਰੋਵਿੰਸ਼ੀਅਲ ਪੱਧਰ ਉੱਤੇ ਕਈ ਅਹੁਦੇ ਸੰਭਲਾਣ ਦਾ ਅਨੁਭਵ ਹੈ। ਕੰਜ਼ਰਵੇਟਿਵ ਪਾਰਟੀ ਦੇ ਜੱਥੇਬੰਦਕ ਢਾਂਚੇ ਵਿੱਚ ਅਪਰਣ ਨੇ ਸਾਬਕਾ ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਅਤੇ ਸਾਬਕਾ ਇੰਮੀਗਰੇਸ਼ਨ ਮੰਤਰੀ ਜੇਸਨ ਕੈਨੀ ਤੋਂ ਇਲਾਵਾ ਹੋਰ ਕਈ ਸੀਨੀਅਰ ਲੀਡਰਾਂ ਨਾਲ ਮਿਲ ਕੇ ਵੱਖ 2 ਅਹੁਦਿਆਂ ਉੱਤੇ ਕੰਮ ਕੀਤਾ ਹੈ। ਇਸ ਵਿੱਚ ਮਿਨਿਸਟਰ ਆਫ ਮਲਟੀਕਲਚਰਿਜ਼ਮ ਅਤੇ ਮਿਨਿਸਟਰ ਆਫ ਨੈਸ਼ਨਲ ਡੀਫੈਂਸ ਦੇ ਸੀਨੀਅਰ ਰੀਜਨਲ ਸਲਾਹਕਾਰ ਵਜੋਂ ਕੰਮ ਕਰਨਾ ਸ਼ਾਮਲ ਹੈ।

 ਅਪਰਣ ਖੰਨਾ ਦਾ ਆਖਣਾ ਹੈ ਕਿ ਉਹ ਬਰੈਂਪਟਨ ਨੌਰਥ ਦੀ ਰਾਈਡਿੰਗ ਦੀ ਰਗ 2 ਤੋਂ ਵਾਕਫ਼ ਹੈ ਕਿਉਂਕਿ ਉਸਦਾ ਜਨਮ ਵੀ ਇਸ ਰਾਈਡਿੰਗ ਵਿੱਚ ਹੋਇਆ ਜਿੱਥੇ ਆਪਣੇ ਪਰਿਵਾਰ ਨਾਲ ਉਹ ਹੁਣ ਤੱਕ ਰਹਿ ਰਿਹਾ ਹੈ। ਉਸ ਕੋਲ ਵਾਲੰਟੀਅਰਾਂ ਦੀ ਇੱਕ ਖੂਬਸੂਰਤ ਟੀਮ ਹੈ ਜੋ ਉਸਦੇ ਸੁਨੇਹੇ ਨੂੰ ਘਰ 2 ਪਹੁੰਚਾਉਣ ਲਈ ਦਿਨ ਰਾਤ ਇੱਕ ਕਰ ਰਹੀ ਹੈ। ਇੱਕ ਚੰਗਾ ਬੁਲਾਰਾ ਹੋਣ ਦੇ ਨਾਲ ਨਾਲ ਬਰੈਂਪਟਨ ਦੀਆਂ ਹੋਰ ਰਾਈਡਿੰਗ ਤੋਂ ਖੜੇ ਕੰਜ਼ਰਵੇਟਿਵ ਉਮੀਦਵਾਰਾਂ ਵਿੱਚੋਂ ਅਰਪਣ ਵਾਹਦ ਇੱਕ ਅਜਿਹਾ ਆਗੂ ਹੈ ਜਿਸਦੀ ਕਮਿਉਨਿਟੀ ਵਿੱਚ ਚੰਗੀ ਸਾਖ਼ ਵੀ ਹੈ ਅਤੇ ਜਿਸ ਕੋਲ ਕਮਿਉਨਿਟੀ ਨੂੰ ਦਰਪੇਸ਼ ਮਸਲਿਆਂ ਬਾਰੇ ਗਹਿਰੀ ਜਾਣਕਾਰੀ ਹੋਣ ਦੇ ਨਾਲ ਨਾਲ ਉਹਨਾਂ ਦੇ ਹੱਲ ਲਈ ਉਤਸ਼ਾਹ ਵੀ ਹੈ। ਵਕੀਲ ਹੋਣ ਨਾਤੇ ਉਸ ਕੋਲ ਤਰਕ ਵੀ ਹੈ ਅਤੇ ਗੱਲ ਕਰਨ ਦਾ ਸੁੱਚਜਾ ਢੰਗ ਵੀ।

ਅਰਪਣ ਖੰਨਾ ਮੁਤਾਬਕ ਉਹ ਸਿਆਸਤ ਵਿੱਚ ਕਿਸੇ ਮਕਸਦ ਨਾਲ ਨਹੀਂ ਆਇਆ ਸਗੋਂ ਸਿਆਸਤ ਤਾਂ ਛੋਟੀ ਉਮਰ ਤੋਂ ਹੀ ਉਸਦੀ ਜਿ਼ੰਦਗੀ ਦਾ ਅਨਿੱਖੜਵਾਂ ਅੰਗ ਰਹੀ ਹੈ। ਇਸਦਾ ਅਰਥ ਹੈ ਕਿ ਉਹ ਮੌਸਮੀ ਬਿਰਤੀ ਵਾਲਾ ਸਿਆਸਤਦਾਨ ਨਹੀਂ ਸਗੋਂ ਕਮਿਉਨਿਟੀ ਲਈ ਕੁੱਝ ਸਾਰਥਕ ਕਰਨ ਦੀ ਖਵਾਹਿਸ਼ ਰੱਖਣ ਵਾਲਾ ਵਿਅਕਤੀ ਹੈ। ਉਸਨੂੰ ਆਸ ਹੈ ਕਿ ਬਰੈਂਪਟਨ ਨੌਰਥ ਦੇ ਵੋਟਰ ਉਸਨੂੰ ਜਿਤਾ ਕੇ ਓਟਾਵਾ ਭੇਜਣਗੇ ਜਿੱਥੇ ਉਹ ਆਪਣੇ ਲੰਬੇ ਸਿਆਸੀ ਅਨੁਭਵ ਤੋਂ ਲਾਭ ਲੈਂਦੇ ਹੋਏ ਬਰੈਂਪਟਨ ਨੌਰਥ ਰਾਈਡਿੰਗ ਵਾਸੀਆਂ ਦੇ ਹਿੱਤ ਵਿੱਚ ਅਤੇ ਸਮੂਹ ਕੈਨੇਡੀਅਨ ਦੀ ਬਿਹਤਰੀ ਲਈ ਐਂਡਰੀਊ ਸ਼ੀਅਰ ਟੀਮ ਵਜੋਂ ਸ਼ਾਨਦਾਰ ਕੰਮ ਕਰੇਗਾ।