ਫੈਡਰਲ ਰਾਈਡਿੰਗ ਈਟੋਬੀਕੋ ਨੌਰਥ ਤੋਂ ਕੰਜ਼ਰਵੇਟਿਵ ਉਮੀਦਵਾਰ ਸਰਬਜੀਤ ਕੌਰ ਨੇ ਲੰਬੇ ਚਿਰ ਤੋਂ ਲਿਬਰਲ ਕਬਜ਼ੇ ਵਾਲੇ ਇਸ ਹਲਕੇ ਨੂੰ ਆਪਣੇ ਹੱਥੀਂ ਲੈਣ ਲਈ ਸਖ਼ਤ ਮਿਹਨਤ ਆਰੰਭੀ ਹੋਈ ਹੈ। 1994 ਵਿੱਚ ਐਮ ਐਸ ਸੀ ਡਿਗਰੀ ਹਾਸਲ ਕਰਕੇ ਕੈਨੇਡਾ ਪੁੱਜੀ ਸਰਬਜੀਤ ਕੌਰ ਨੇ ਕੈਨੇਡਾ ਆ ਕੇ 'ਬੀ ਐਸ ਸੀ, ਬੀ ਐਡ ਡਿਗਰੀ' ਹਾਸਲ ਕੀਤੀ ਅਤੇ ਬੀਤੇ 18 ਸਾਲ ਤੋਂ ਮਾਲਟਨ ਵਿਖੇ ਮੌਰਨਿੰਗ ਸਟਾਰ ਸਕੂਲ ਵਿੱਚ ਅਧਿਆਪਕ ਵਜੋਂ ਕੰਮ ਕਰ ਰਹੀ ਹੈ। ਉਸਦਾ ਮੁੱਖ ਮੁਕਾਬਲਾ ਲੰਬੇ ਸਮੇਂ ਤੋਂ ਐਮ ਪੀ ਚਲੀ ਆ ਰਹੀ ਕ੍ਰਿਸਟੀ ਡੰਕਨ ਨਾਲ ਹੈ ਜੋ ਟਰੂਡੋ ਸਰਕਾਰ ਵਿੱਚ ਮੰਤਰੀ ਹੈ।
ਪੜੀ ਲਿਖੀ ਹੋਣ ਦੇ ਨਾਲ ਨਾਲ ਇੰਮੀਗਰਾਂਟ ਔਰਤ ਹੋਣ ਬਦੌਲਤ ਜਿੱਥੇ ਕੰਜ਼ਰਵੇਟਿਵ ਪਾਰਟੀ ਲਈ ਸਰਬਜੀਤ ਕੌਰ ਇੱਕ ਕਿਸਮ ਨਾਲ ਸਟਾਰ ਉਮੀਦਵਾਰ ਹੈ ਉੱਥੇ ਉਸ ਸਮੇਤ ਲਿਬਰਲ ਦੀ ਕ੍ਰਿਸਟੀ ਡੰਕਨ ਅਤੇ ਪੀਪਲਜ਼ ਪਾਰਟੀ ਆਫ਼ ਕੈਨੇਡਾ ਦੀ ਰੇਨਾਟਾ ਫੋਰਡ ਵੀ ਔਰਤ ਉਮੀਦਵਾਰ ਹਨ। ਵਰਨਣਯੋਗ ਹੈ ਕਿ ਰੇਨਾਟਾ ਫੋਰਡ ਉਂਟੇਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਦੇ ਵੱਡੇ ਭਰਾ ਅਤੇ ਟੋਰਾਂਟੋ ਦੇ ਸਾਬਕਾ ਮੇਅਰ (ਮਹਿਰੂਮ) ਰੌਬ ਫੋਰਡ ਦੀ ਪਤਨੀ ਹੈ ਪਰ ਉਸਦਾ ਆਪਣੇ ਦਿਉਰ ਡੱਗ ਫੋਰਡ ਨਾਲ ਨਿੱਜੀ ਅਤੇ ਸਿਆਸੀ ਪੱਧਰ ਦੋਵਾਂ ਉੱਤੇ ਇੱਟ ਖੜਿੱਕਾ ਚੱਲਦਾ ਹੈ। ਇਸਦੇ ਉਲਟ ਸਰਬਜੀਤ ਕੌਰ ਦਾ ਡੱਗ ਫੋਰਡ ਸਰਕਾਰ ਵਿੱਚ ਕਾਫ਼ੀ ਬੋਲਬਾਲਾ ਹੈ ਅਤੇ ਡੱਗ ਫੋਰਡ ਦੀ ਕੰਪੇਨ ਵਿੱਚ ਜੁੜੇ ਰਹਿਣ ਕਾਰਣ ਉਸਦੀ ਫੋਰਡ ਪਰਿਵਾਰ ਨਾਲ ਨੇੜਤਾ ਵੀ ਹੈ। ਈਟੋਬੀਕੋ ਨੌਰਥ ਡੱਗ ਫੋਰਡ ਦੀ ਆਪਣੀ ਰਾਈਡਿੰਗ ਹੈ ਜਿਸਦਾ ਸਰਬਜੀਤ ਕੌਰ ਨੂੰ ਲਾਭ ਮਿਲੇਗਾ।
ਜੀ ਟੀ ਏ ਦੀਆਂ ਹੋਰ ਰਾਈਡਿੰਗਾਂ ਵਾਗੂੰ ਈਟੋਬੀਕੋ ਨੌਰਥ ਵੀ ਵਿਭਿੰਨਤਾ ਭਰਪੂਰ ਹੈ ਅਤੇ ਸਰਬਜੀਤ ਕੌਰ ਆਪਣੇ ਵਾਲੰਟੀਅਰਾਂ ਨਾਲ ਹਰ ਵਰਗ ਨਾਲ ਸੰਪਰਕ ਬਣਾਉਣ ਲਈ ਵੱਡੇ ਪੱਧਰ ਉੱਤੇ ਮਿਹਨਤ ਕਰ ਰਹੀ ਹੈ। ਉਸਨੂੰ ਵੱਖ 2 ਧਾਰਮਿਕ ਸਥਾਨਾਂ, ਕਮਿਉਨਿਟੀ ਜੱਥੇਬੰਦੀਆਂ ਅਤੇ ਸੀਨੀਅਰ ਗਰੁੱਪਾਂ ਵੱਲੋਂ ਭਾਰੀ ਹੁੰਗਾਰਾ ਮਿਲ ਰਿਹਾ ਹੈ। ਵਿਭਿੰਨ ਐਥਨਿਕ ਗਰੁੱਪਾਂ ਤੱਕ ਪਹੁੰਚ ਕਰਨ ਵਿੱਚ ਉਹ ਸ਼ਰਤੀਆ ਹੀ ਆਪਣੇ ਵਿਰੋਧੀਆਂ ਤੋਂ ਅੱਗੇ ਰਹੇਗੀ ਕਿਉਂਕਿ ਉਸ ਕੋਲ ਅੰਗਰੇਜ਼ੀ ਭਾਸ਼ਾ ਦੇ ਨਾਲ ਨਾਲ ਪੰਜਾਬੀ, ਹਿੰਦੀ ਅਤੇ ਉਰਦੂ ਭਾਸ਼ਾਵਾਂ ਦਾ ਵੀ ਪਰਪੱਕ ਗਿਆਨ ਹੈ। ਸਰਬਜੀਤ ਕੌਰ ਦੇ ਪਤੀ ਇੰਦਰਜੀਤ ਸਿੰਘ ਜਗਰਾਊਂ ਲੰਬੇ ਸਮੇਂ ਤੋਂ ਸਿੱਖ ਸਿਆਸਤ ਅਤੇ ਸਿੱਖ ਮੁੱਦਿਆਂ ਨਾਲ ਜੁੜੇ ਰਹੇ ਹਨ। ਉਂਟੇਰੀਓ ਵਿੱਚ ਮੋਟਰ ਸਾਈਕਲ ਚਲਾਉਣ ਵੇਲੇ ਦਸਤਾਰ ਪਹਿਨਣ ਦੇ ਅਧਿਕਾਰ ਨੂੰ ਲੈ ਕੇ ਕੀਤੀ ਗਈ ਜਦੋਜਹਿਦ ਵਿੱਚ ਉਸਦਾ ਵੱਡਾ ਰੋਲ ਰਿਹਾ ਹੈ।