ਪਿੱਛੇ ਜਿਹੇ ਸੈਫ ਅਲੀ ਖਾਨ ਦੀ ਅਗਲੀ ਫਿਲਮ ‘ਲਾਲ ਕਪਤਾਨ’ ਦੀ ਪਹਿਲੀ ਝਲਕ ਰਿਲੀਜ਼ ਕੀਤੀ ਗਈ ਅਤੇ ਪਹਿਲੇ ਟ੍ਰੇਲਰ ਦਾ ਵੀਡੀਓ ਵੀ ਜਾਰੀ ਕੀਤਾ ਗਿਆ, ਪਰ ਇਸ ਦੇ ਨਾਲ ਸੈਫ ਦੀ ਸੋਸ਼ਲ ਮੀਡੀਆ 'ਤੇ ਚੌਤਰਫਾ ਖਿਚਾਈ ਹੋਣ ਲੱਗ ਪਈ। ਦਰਅਸਲ ਟ੍ਰੇਲਰ ਵਿੱਚ ਸੈਫ ਗੁੱਸੇਖੋਰ ਨਾਗਾ ਸਾਧੂ ਦੇ ਕਿਰਦਾਰ 'ਚ ਦਿੱਸਦਾ ਹੈ। ਦੱਸਿਆ ਗਿਆ ਹੈ ਕਿ ਇਹ ਫਿਲਮ ਇੱਕ ਨਾਗਾ ਸਾਧੂ ਦੇ ਬਦਲਾ ਲੈਣ ਦੀ ਕਹਾਣੀ ਹੈ। ਫਿਲਮ ਵਿੱਚ ਸੋਨਾਕਸ਼ੀ ਸਿਨਹਾ ਤੇ ਜ਼ੋਇਆ ਹੁਸੈਨ ਵੀ ਨਜ਼ਰ ਆਉਣਗੀਆਂ। ਫਿਲਮ ਦਾ ਟੀਜ਼ਰ ਵੀ ਜਲਦੀ ਰਿਲੀਜ਼ ਕੀਤਾ ਜਾਵੇਗਾ।
ਟ੍ਰੇਲਰ ਵਿੱਚ ਸੋਨਾਕਸ਼ੀ ਸਿਨਹਾ ਦੀ ਆਵਾਜ਼ ਸੁਣੀ ਜਾ ਸਕਦੀ ਹੈ। ਇਸ ਦੇ ਆਉਣ ਤੋਂ ਤੁਰੰਤ ਬਾਅਦ ਹੀ ਸੋਸ਼ਲ ਮੀਡੀਆ 'ਤੇ ਹਲਚਲ ਤੇਜ਼ ਹੋ ਗਈ ਅਤੇ ਯੂ ਟਿਊਬ ਤੋਂ ਲੈ ਕੇ ਟਵਿੱਟਰ ਤੱਕ ‘ਲਾਲ ਕਪਤਾਨ' ਬਾਰੇ ਹੀ ਗੱਲਾਂ ਹੋਣ ਲੱਗੀਆਂ। ਕੁਝ ਲੋਕ ਸੈਫ ਦੀ ਲੁਕ ਦੀ ਤੁਲਨਾ ਹਿੱਟ ਹਾਲੀਵੁੱਡ ਫਿਲਮ ‘ਪਾਈਰੇਟਸ ਆਫ ਦਿ ਕੈਰੀਬੀਅਨ’ ਦੇ ਨਾਇਕ ਜੈਕ ਸਪੈਰੋ ਨਾਲ ਕਰ ਰਹੇ ਹਨ, ਤਾਂ ਕਈ ਉਸ ਦੀ ਫਿਲਮ ਬਾਰੇ ਕੁਝ ਨਾ ਕੁਝ ਬੋਲਣ ਲੱਗੇ। ਉਂਝ ਸੈਫ ਦੇ ਕਈ ਫੈਨਸ ਨੂੰ ਉਸ ਦਾ ਇਹ ਖਤਰਨਾਕ ਰੂਪ ਕਾਫੀ ਪਸੰਦ ਵੀ ਆਇਆ ਹੈ।
ਇਸ ਸਾਲ ਆਪਣੀ ਸੁਪਰਹਿੱਟ ਵੈੱਬ ਸੀਰੀਜ਼ ‘ਸੈਕ੍ਰੇਡ ਗੇਮਸ’ ਦੇ ਸੈਕਿੰਡ ਸੀਜਨ ਵਿੱਚ ਨਜ਼ਰ ਆਏ ਸੈਫ ਦੇ ਹੱਥ ਵਿੱਚ ‘ਲਾਲ ਕਪਤਾਨ’ ਤੋਂ ਇਲਾਵਾ ਕਈ ਹੋਰ ਚੰਗੀਆਂ ਫਿਲਮਾਂ ਹਨ। ਇਨ੍ਹਾਂ ਵਿੱਚ ‘ਦਿਲ ਬੇਚਾਰਾ', ‘ਜਵਾਨੀ ਜਾਨੇਮਨ’ ਅਤੇ ‘ਤਾਨਾਜੀ : ਦਿ ਅਨਸੰਗ ਵਾਰੀਅਰ’ ਪ੍ਰਮੁੱਖ ਰੂਪ ਵਿੱਚ ਸ਼ਾਮਲ ਹਨ। ਇਨ੍ਹਾਂ ਸਾਰੀਆਂ ਫਿਲਮਾਂ ਵਿੱਚ ਉਸ ਦੇ ਵੱਖ-ਵੱਖ ਰੂਪ ਨਜ਼ਰ ਆਉਣਗੇ।