ਓਟਵਾ, 10 ਅਕਤੂਬਰ (ਪੋਸਟ ਬਿਊਰੋ) : ਫੈਡਰਲ ਚੋਣ ਕੈਂਪੇਨ ਦੀ ਆਖਰੀ ਬਹਿਸ ਅੱਜ ਰਾਤ ਹੋਣੀ ਤੈਅ ਹੈ ਤੇ ਇਸ ਦੇ ਨਾਲ ਹੀ ਐਨਡੀਪੀ ਵੱਲੋਂ ਜਸਟਿਨ ਟਰੂਡੋ ਨੂੰ ਇਲੈਕਟੋਰਲ ਸਿਸਟਮ ਬਦਲਣ ਸਬੰਧੀ ਉਨ੍ਹਾਂ ਦੇ ਟੁੱਟੇ ਹੋਏ ਵਾਅਦੇ ਯਾਦ ਕਰਵਾਏ ਜਾਣ ਦਾ ਫੈਸਲਾ ਕੀਤਾ ਗਿਆ ਹੈ।
ਓਟਵਾ ਸੈਂਟਰ ਤੋਂ ਉਮੀਦਵਾਰ ਐਮਿਲੀ ਤਮਨ, ਜੋ ਕਿ ਲਿਬਰਲ ਮੰਤਰੀ ਕੈਥਰੀਨ ਮੈਕੇਨਾ ਖਿਲਾਫ ਚੋਣ ਮੈਦਾਨ ਵਿੱਚ ਹੈ, ਵੱਲੋਂ ਅੱਜ ਪਾਰਲੀਆਮੈਂਟ ਦੇ ਲਾਅਨ ਵਿੱਚ ਕਰਵਾਏ ਜਾਣ ਵਾਲੇ ਇੱਕ ਈਵੈਂਟ ਵਿੱਚ ਪ੍ਰਪੋਸ਼ਨਲ ਨੁਮਾਇੰਦਗੀ ਸਬੰਧੀ ਜਾਣਕਾਰੀ ਦੇਣ ਦਾ ਵਾਅਦਾ ਕੀਤਾ ਗਿਆ ਹੈ ਤੇ ਇਸ ਦੇ ਨਾਲ ਹੀ ਵੋਟਿੰਗ ਲਈ ਉਮਰ ਘਟਾ ਕੇ 16 ਸਾਲ ਕਰਨ ਦੀ ਪੈਰਵੀ ਵੀ ਕੀਤੀ ਜਾਵੇਗੀ।
2015 ਵਿੱਚ ਲਿਬਰਲਾਂ ਵੱਲੋਂ ਇਹ ਵਾਅਦਾ ਕੀਤਾ ਗਿਆ ਸੀ ਕਿ ਇਹ ਰਵਾਇਤੀ ਫਰਸਟ ਪਾਸਟ ਦਾ ਪੋਸਟ ਇਲੈਕਟੋਰਲ ਸਿਸਟਮ ਤਹਿਤ ਆਖਰੀ ਚੋਣਾਂ ਹੋਣਗੀਆਂ। ਪਰ ਇਸ ਮੁੱਦੇ ਦੀ ਜਾਂਚ ਲਈ ਕਾਇਮ ਕੀਤੀ ਗਈ ਕਮੇਟੀ ਦੀਆਂ ਸਿਫਾਰਸ਼ਾਂ ਨਾਲ ਖਿਲਵਾੜ ਤੋਂ ਇਲਾਵਾ ਇਹ ਹੋਰ ਕੁੱਝ ਨਹੀਂ ਸੀ। ਇਸ ਦੌਰਾਨ ਟਰੂਡੋ ਅੱਜ ਸਵੇਰੇ ਓਟਵਾ ਦੇ ਪੇਂਡੂ ਇਲਾਕੇ ਦਾ ਦੌਰਾ ਕਰਨਗੇ ਤੇ ਉੱਥੇ ਕੰਜ਼ਰਵੇਟਿਵ ਉਮੀਦਵਾਰ ਪਿਏਰੇ ਪੋਇਲੀਵਰ ਨੂੰ ਹਰਾਉਣ ਲਈ ਲਿਬਰਲ ਉਮੀਦਵਾਰ ਦੀ ਹੌਸਲਾ ਅਫਜ਼ਾਈ ਕਰਨਗੇ।
ਪਰ ਅੱਜ ਦੇ ਦਿਨ ਦੀ ਸੱਭ ਤੋਂ ਵੱਡੀ ਖਬਰ ਬਹਿਸ ਰਹਿਣ ਵਾਲੀ ਹੈ, ਜੋ ਕਿ ਗੈਟਿਨਿਊ, ਕਿਊਬਿਕ ਵਿੱਚ ਰਾਤੀਂ 8:00 ਵਜੇ ਸ਼ੁਰੂ ਹੋਵੇਗੀ। ਫਰੈਂਚ ਭਾਸ਼ਾ ਦੀ ਇਸ ਬਹਿਸ ਵਿੱਚ ਸਾਰੀਆਂ ਪਾਰਟੀਆਂ ਦੇ ਆਗੂਆਂ ਕੋਲ ਆਪਣਾ ਪੱਖ ਕੈਨੇਡੀਅਨਾਂ ਸਾਹਮਣੇ ਰੱਖਣ ਦਾ ਆਖਰੀ ਮੌਕਾ ਹੋਵੇਗਾ।