ਇਟਾਵਾ, 10 ਅਕਤੂਬਰ (ਪੋਸਟ ਬਿਊਰੋ)- ਭਾਰਤੀ ਜਨਤਾ ਪਾਰਟੀ ਦੇ ਸਾਬਕਾ ਪਾਰਲੀਮੈਂਟ ਮੈਂਬਰ ਰਾਮ ਵਿਲਾਸ ਵੇਦਾਂਤੀ ਨੇ ਵਿਵਾਦਤ ਬਿਆਨ ਦਿੱਤਾ ਹੈ। ਉੱਤਰ ਪ੍ਰਦੇਸ਼ ਦੇ ਇਟਾਵਾ ਵਿਚ ਇਸ ਮੰਗਲਵਾਰ ਦੁਸਹਿਰੇ ਮੌਕੇ ਸ੍ਰੀਰਾਮ ਯਾਤਰਾ ਵਿਚ ਸ਼ਾਮਲ ਹੋਣ ਆਏ ਵੇਦਾਂਤੀ ਨੇ ਜਨਤਾ ਨੂੰ ਸੰਬੋਧਨ ਕਰਦੇ ਹੋਏ ਸਾਫ ਕਿਹਾ ਕਿ ਇਕ ਧਰਮ ਦੇ ਲੋਕਾਂ ਦੀ ਅਬਾਦੀ ਲਗਾਤਾਰ ਵਧੀ ਜਾ ਰਹੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਕੱਟੜ ਇਸਲਾਮਿਕ ਲੋਕ ਬਹੁਤੇ ਬੱਚੇ ਪੈਦਾ ਕਰਦੇ ਹਨ ਤਾਂ ਉਹ ਅਤਿਵਾਦੀ ਹੀ ਬਣਨਗੇ। ਰਾਮ ਵਿਲਾਸ ਵੇਦਾਂਤੀ ਦੇ ਮੁਤਾਬਕ ਇਸੇ ਕਾਰਨ ਹੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਐਲਾਨ ਕੀਤਾ ਹੈ ਕਿ ਜਨ ਸੰਖਿਆ ਕੰਟਰੋਲ ਕਾਨੂੰਨ ਪਾਸ ਕੀਤਾ ਜਾਵੇਗਾ।
ਸਾਬਕਾ ਪਾਰਲੀਮੈਂਟ ਮੈਂਬਰ ਅਤੇ ਭਾਜਪਾ ਆਗੂ ਵੇਦਾਂਤੀ ਦਾ ਇਕ ਵੀਡੀਓ ਸਾਹਮਣੇ ਆਇਆ ਹੈ, ਜਿਸ ਵਿਚ ਉਹ ਕਹਿ ਰਹੇ ਹਨ, ‘ਦੇਸ਼ ਵਿਚ ਜਨ ਸੰਖਿਆ ਭਿਆਨਕ ਰੂਪ ਨਾਲ ਵਧੀ ਜਾਂਦੀ ਹੈ। ਇਕ ਖਾਸ ਵਰਗ ਦੀ ਆਬਾਦੀ ਤੇਜ਼ੀ ਨਾਲ ਵਧ ਰਹੀ ਹੈ ਅਤੇ ਅਜਿਹੇ ਵੀ ਲੋਕ ਹਨ, ਜੋ ਇਕ ਨਹੀਂ, ਚਾਰ ਵਿਆਹ ਕਰਦੇ ਤੇ ਚਾਰ ਵਿਆਹ ਤੋਂ ਪਿੱਛੋਂ ਤਲਾਕ ਦੇ ਦਿੰਦੇ ਹਨ। ਅਯੋਧਿਆ ਨੇੜਲੇ ਇਲਾਕੇ ਦੇ ਇਕ 80 ਸਾਲਾ ਮੁਸਲਮਾਨ ਨੇ 40 ਵਿਆਹ ਕਰ ਕੇ 107 ਲੜਕੇ ਪੈਦਾ ਕੀਤੇ। ਇਕ ਵਿਅਕਤੀ 107 ਬੱਚੇ ਪੈਦਾ ਕਰੇਗਾ ਤਾਂ ਕੀ ਹੋਵੇਗਾ। ਅਤਿਵਾਦੀ ਹੀ ਬਣਨਗੇ ਨਾ`।
ਵੇਦਾਂਤੀ ਨੇ ਅਪਣੇ ਭਾਸ਼ਣ ਦੌਰਾਨ ਸਮਾਜਵਾਦੀ ਪਾਰਟੀ ਅਤੇ ਬਸਪਾ ਉੱਤੇ ਨਿਸ਼ਾਨਾ ਲਾਉਂਦੇ ਹੋਏ ਦੋਵਾਂ ਧਿਰਾਂ ਉੱਤੇ ਅਤਿਵਾਦੀਆਂ ਦਾ ਸਮਰਥਨ ਕਰਨ ਦਾ ਦੋਸ਼ ਲਾਇਆ। ਉਨ੍ਹਾਂ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਤੇ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦੀ ਤੁਲਨਾ ਭਗਵਾਨ ਰਾਮ ਤੇ ਲਸ਼ਮਣ ਨਾਲ ਕੀਤੀ ਅਤੇ ਰਾਮ ਮੰਦਰ ਮੁੱਦੇ ਉੱਤੇ ਸੁਝਾਅ ਦਿੱਤਾ ਕਿ ਹਿੰਦੂ ਸੁਪਰੀਮ ਕੋਰਟ ਵਿਚ ਵਿਸ਼ਵਾਸ ਰੱਖਦੇ ਹਨ। ਕੋਰਟ ਦੀ ਤੁਲਨਾ ਹੰਸ ਨਾਲ ਕਰਦੇ ਹੋਏ ਉਨ੍ਹਾਂ ਕਿਹਾ ਕਿ ਜਿਵੇਂ ਹੰਸ ਚੁਣ ਕੇ ਫੈਸਲਾ ਲੈਂਦਾ ਹੈ, ਉਸੇ ਤਰ੍ਹਾਂ ਸੁਪਰੀਮ ਕੋਰਟ ਦੁੱਧ ਦਾ ਦੁੱਧ, ਪਾਣੀ ਦਾ ਪਾਣੀ ਕਰ ਕੇ ਫੈਸਲਾ ਕਰਨ ਵਾਲੀ ਹੈ।