ਕੁਣਾਲ ਖੇਮੂ ਨੇ ਸਿਰਫ ਪੰਜ ਸਾਲ ਦੀ ਉਮਰ ਵਿੱਚ ਦੂਰਦਰਸ਼ਨ ਦੇ ਸੀਰੀਅਲ ‘ਗੁਲ ਗੁਲਸ਼ਨ ਗੁਲਫਾਮ’ ਲਈ ਬਤੌਰ ਬਾਲ ਕਲਾਕਾਰ ਪਹਿਲੀ ਵਾਰ ਕੈਮਰੇ ਦਾ ਸਾਹਮਣਾ ਕੀਤਾ। ਇਸ ਪਿੱਛੋਂ ‘ਸਰ’, ‘ਰਾਜਾ ਹਿੰਦੋਸਤਾਨੀ’ ‘ਜ਼ਖਮ’, ‘ਹਮ ਹੈਂ ਰਾਹੀ ਪਿਆਰ ਕੇ’, ‘ਭਾਈ’ ਅਤੇ ‘ਦੁਸ਼ਮਣ’ ਵਰਗੀਆਂ ਫਿਲਮਾਂ 'ਚ ਉਹ ਬਤੌਰ ਬਾਲ ਕਲਾਕਾਰ ਨਜ਼ਰ ਆਏ। ਉਹ ਅਤੇ ਸੋਹਾ ਅਲੀ ਖਾਨ 25 ਜਨਵਰੀ 2015 ਨੂੰ ਵਿਆਹ ਬੰਧਨ ਵਿੱਚ ਬੱਝ ਗਏ ਸਨ, ਜੋ ਨਵਾਬ ਫੈਮਿਲੀ ਤੋਂ ਹੈ। ਇਸ ਸਾਲ ਫਿਲਮ ‘ਕਲੰਕ’ ਵਿੱਚ ਇੱਕ ਅਹਿਮ ਰੋਲ ਨਿਭਾਉਣ ਵਾਲੇ ਕੁਨਾਲ ਖੇਮੂ ਪਿਛਲੇ ਦਿਨੀਂ ਇੱਕ ਵੈੱਬ ਸੀਰੀਜ਼ ‘ਅਭੈ’ 'ਚ ਵੀ ਨਜ਼ਰ ਆਏ ਸਨ। ਪਿੱਛੇ ਜਿਹੇ ਉਸ ਨੇ ਆਪਣੀ ਅਗਲੀ ਫਿਲਮ ‘ਮਲੰਗ’ ਦੀ ਸ਼ੂਟਿੰਗ ਪੂਰੀ ਕੀਤੀ ਹੈ। ਪੇਸ਼ ਹਨ ਉਸ ਨਾਲ ਹੋਈ ਗੱਲਬਾਤ ਦੇ ਕੁਝ ਅੰਸ਼ :
*ਤੁਸੀਂ ਫਿਲਮ ‘ਮਲੰਗ’ ਦੀ ਸ਼ੂਟਿੰਗ ਪਿੱਛੇ ਜਿਹੇ ਪੂਰੀ ਕੀਤੀ ਹੈ। ਇਸ ਬਾਰੇ ਕੁਝ ਦੱਸੋ?
- ਇਹ ਇੱਕ ਮਲਟੀਸਟਾਰਰ ਫਿਲਮ ਹੈ। ਇਸ ਵਿੱਚ ਮੇਰੇ ਨਾਲ ਆਦਿੱਤਯ ਰਾਏ ਕਪੂਰ, ਦਿਸ਼ਾ ਪਟਾਨੀ ਅਤੇ ਅਨਿਲ ਕਪੂਰ ਨਜ਼ਰ ਆਉਣਗੇ। ਇਹ ਫਿਲਮ ਕਾਫੀ ਦਿਲਚਸਪ ਹੈ। ਇਸ ਨੂੰ ਕਈ ਸਾਰੇ ਸ਼ੇਡਸ ਦਿੱਤੇ ਗਏ ਸਨ। ਇਸ ਵਿੱਚ ਮੈਂ ਫਿਰ ਪੁਲਸ ਵਾਲੇ ਦਾ ਕਿਰਦਾਰ ਕਰ ਰਿਹਾ ਹਾਂ। ਇਹ ਇੱਕ ਦਿਲਚਸਪ ਭੂਮਿਕਾ ਹੈ ਅਤੇ ਮੈਂ ਇਸ ਲਈ ਉਤਸ਼ਾਹਤ ਹਾਂ।
* ਇਸ ਫਿਲਮ 'ਚ ਅਨਿਲ ਕਪੂਰ ਵਰਗੇ ਸੀਨੀਅਰ ਐਕਰ ਦੇ ਨਾਲ ਕੰਮ ਕਰਨ ਦਾ ਤਜਰਬਾ ਕਿਹੋ ਜਿਹਾ ਰਿਹਾ?
- ਮੈਂ ਅਨਿਲ ਜੀ ਨਾਲ ਕੰਮ ਕਰਨ ਨੂੰ ਲੈ ਕੇ ਬਹੁਤ ਉਤਸ਼ਾਹਤ ਹਾਂ ਕਿਉਂਕਿ ਮੈਂ ਹਮੇਸ਼ਾ ਤੋਂ ਹੀ ਉਨ੍ਹਾਂ ਦੀਆਂ ਫਿਲਮਾਂ ਦਾ ਬਹੁਤ ਵੱਡਾ ਪ੍ਰਸ਼ੰਸਕ ਰਿਹਾ ਹਾਂ। ਫਿਲਮ ਦੇ ਹੋਰ ਕਲਾਕਾਰ ਵੀ ਚੰਗੇ ਹਨ। ‘ਕਲੰਕ’ ਵਿੱਚ ਆਦਿੱਤਯ ਨਾਲ ਕੰਮ ਕੀਤਾ ਅਤੇ ਉਸ ਨਾਲ ਦੁਬਾਰਾ ਕੰਮ ਕਰਨ ਦਾ ਮੌਕਾ ਮਿਲਣਾ ਵਾਕਈ ਚੰਗਾ ਹੈ।
* ਫਿਲਮ ਨਗਰੀ ਵਿੱਚ ਇੰਨਾ ਲੰਬਾ ਸਮਾਂ ਗੁਜ਼ਾਰਨ ਤੋਂ ਬਾਅਦ ਵੀ ਇੱਕ ਵੱਡੀ ਹਿੱਟ ਫਿਲਮ ਦੀ ਤੁਹਾਡੀ ਤਲਾਸ਼ ਜਾਰੀ ਹੈ। ਤੁਹਾਨੂੰ ਕੀ ਲੱਗਦਾ ਹੈ ਕਿ ਅੱਜ ਤੱਕ ਦੇ ਕਰੀਅਰ 'ਚ ਤੁਹਾਡੇ ਤੋਂ ਕਿੱਥੇ ਗਲਤੀ ਹੋਈ ਹੈ?
- ਦੇਖੋ ਮੈਂ ਪਹਿਲਾਂ ਵੀ ਇੱਕ ਐਕਟਰ ਸੀ ਅਤੇ ਅੱਜ ਵੀ ਇੱਕ ਐਕਟਰ ਹਾਂ। ਮੈਂ ਜੋ ਵੀ ਫੈਸਲੇ ਲਏ, ਉਨ੍ਹਾਂ ਨੂੰ ਬਦਲ ਤਾਂ ਨਹੀਂ ਸਕਦਾ, ਪਰ ਮੈਂ ਅੱਗੇ ਵਧਣ ਵਿੱਚ ਵਿਸ਼ਵਾਸ ਰੱਖਦਾ ਹਾਂ। ਬੱਸ ਆਸ ਕਰਦਾ ਹਾਂ ਕਿ ਜੋ ਵੀ ਫੈਸਲਾ ਲਵਾਂ ਉਹ ਮੇਰੇ ਕਰੀਅਰ ਲਈ ਸਹੀ ਹੋਵੇ। ਉਂਝ ਕੰਮ ਕਰਨ ਲਈ ਸਿਰਫ ਫਿਲਮਾਂ ਹੀ ਨਹੀਂ, ਵੈੱਬ ਸੀਰੀਜ਼ ਦੇ ਬਹੁਤ ਬਦਲ ਹਨ ਤੇ ਜਿੱਥੋਂ ਤੱਕ ਐਕਟਿੰਗ ਦਾ ਸਵਾਲ ਹੈ ਉਹ ਜਾਰੀ ਰਹਿਣੀ ਚਾਹੀਦੀ ਹੈ।
* ਤੁਸੀਂ ਇਸ ਸਾਲ ਵੈੱਬ ਸੀਰੀਜ਼ 'ਚ ਵੀ ਡੈਬਿਊ ਕੀਤਾ ਹੈ। ਆਪਣੀ ਪਹਿਲੀ ਵੈੱਬ ਸੀਰੀਜ਼ ਲਈ ‘ਅਭੈ' ਨੂੰ ਹੀ ਕਿਉਂ ਚੁਣਿਆ?
- ਕਈ ਵਾਰੀ ਵੈੱਬ ਸੀਰੀਜ਼ ਦੇਖ ਚੁੱਕਾ ਹਾਂ, ਪਰ ਮੈਨੂੰ ਲੱਗਦਾ ਹੈ ਕਿ ਹਿੰਦੀ 'ਚ ਅਜਿਹੀ ਅੱਜ ਤੱਕ ਕੋਈ ਖੋਜੀ ਸੀਰੀਜ਼ ਨਹੀਂ ਬਣੀ ਸੀ। ਇਹ ਇੱਕ ਵੱਖਰੀ ਤਰ੍ਹਾਂ ਦੀ ਕਹਾਣੀ ਹੈ।
* ਫਿਲਮ ‘ਗੋ ਗੋਆ ਗੋਨ’ ਦਾ ਸੀਕਵਲ ਬਣਨ ਦੀ ਚਰਚਾ ਵੀ ਕਾਫੀ ਸਮੇਂ ਤੋਂ ਹੁੰਦੀ ਰਹੀ ਹੈ ਜਿਸ ਵਿੱਚ ਤੁਸੀਂ ਆਪਣੇ ਸਾਲੇ ਸਾਹਿਬ ਸੈਫ ਅਲੀ ਖਾਨ ਨਾਲ ਕੰਮ ਕੀਤਾ ਸੀ?
- ਇਹ ਫਿਲਮ ਹਮੇਸ਼ਾ ਤੋਂ ਮੇਰੇ ਦਿਲ ਦੇ ਨੇੜੇ ਰਹੀ ਹੈ ਅਤੇ ਇਸ ਦਾ ਸੀਕਵਲ ਉਨ੍ਹਾਂ ਫਿਲਮਾਂ 'ਚੋਂ ਇੱਕ ਹੈ, ਜੋ ਮੈਂ ਕਦੋਂ ਤੋਂ ਕਰਨਾ ਚਾਹੰੁਦਾ ਹਾਂ। ਇਸ ਫਿਲਮ 'ਤੇ ਕੰਮ ਚੱਲ ਰਿਹਾ ਹੈ, ਪਰ ਫਿਲਹਾਲ ਤਾਂ ਮੈਨੂੰ ਵੀ ਨਹੀਂ ਪਤਾ ਕਿ ਇਹ ਕਦੋਂ ਤੱਕ ਸ਼ੁਰੂ ਹੋਵੇਗੀ। ਹਾਂ, ਇੰਨਾ ਜ਼ਰੂਰ ਹੈ ਕਿ ਪਹਿਲੀ ਫਿਲਮ ਦੀ ਹੀ ਤਰ੍ਹਾਂ ਇਹ ਵੀ ਬਹੁਤ ਮਜ਼ੇਦਾਰ ਹੋਵੇਗੀ।