ਸਬਰੀਮਾਲਾ, 17 ਅਕਤੂਬਰ, (ਪੋਸਟ ਬਿਊਰੋ)- ਕੇਰਲ ਵਾਲੇ ਪ੍ਰਸਿੱਧ ਸਬਰੀਮਾਲਾ ਮੰਦਰ ਵਿੱਚ ਹਰ ਇੱਕ ਉਮਰ ਦੀਆਂ ਔਰਤਾਂ ਨੂੰ ਜਾਣ ਦੀ ਇਜਾਜ਼ਤ ਦੇਣ ਦੇ ਸੁਪਰੀਮ ਕੋਰਟ ਦੇ ਹੁਕਮ ਵਿਰੁੱਧ ਹੋ ਰਹੇ ਪ੍ਰਦਰਸ਼ਨਾਂ ਦੌਰਾਨ ਭਗਵਾਨ ਆਯੱਪਾ ਦੇ ਮੰਦਰ ਦੇ ਕਪਾਟ ਅੱਜ ਬੁੱਧਵਾਰ ਪੰਜ ਦਿਨਾਂ ਦੀ ਮਹੀਨਾਵਾਰ ਪੂਜਾ ਲਈ ਖੋਲ੍ਹ ਦਿਤੇ ਗਏ। ਸੁਪਰੀਮ ਕੋਰਟ ਦੇ ਫ਼ੈਸਲੇ ਉੱਤੇ ਰਿਵੀਊ ਅਪੀਲ ਦਾਇਰ ਨਾ ਕਰਨ ਦੇ ਕੇਰਲ ਸਰਕਾਰ ਦੇ ਫ਼ੈਸਲੇ ਨਾਲ ਕਾਰਕੁਨਾਂ ਦਾ ਗੁੱਸਾ ਵੱਧ ਗਿਆ ਅਤੇ ਇਸ ਕਾਰਨ ਇਸ ਮੰਦਰ ਦੇ ਆਸ-ਪਾਸ ਤਣਾਅ ਦਾ ਮਾਹੌਲ ਬਣਿਆ ਹੋਇਆ ਹੈ।
ਮੰਤਰਾਂ ਦੇ ਜਾਪ ਦੌਰਾਨ ਮੁੱਖ ਪੁਜਾਰੀ ਉਨੀਕ੍ਰਿਸ਼ਣਨ ਨੰਬੂਦਰੀ ਅਤੇ ਤੰਤਰੀ ਕੇ. ਰਾਜੀਵਰੂ ਨੇ ਸ਼ਾਮ ਪੰਜ ਵਜੇ ਅੱਜ ਇਸ ਮੰਦਰ ਦੇ ਗਰਭ ਗ੍ਰਹਿ ਦੇ ਕਪਾਟ ਖੋਲ੍ਹੇ ਅਤੇ ਦੀਵੇ ਜਗਾਏ। ਰੀਤ-ਰਿਵਾਜਾਂ ਮੁਤਾਬਕ ਅੱਜ ਸ਼ਾਮ ਪੂਜਾ ਨਹੀਂ ਕੀਤੀ ਗਈ ਤੇ ਮੰਦਰ ਰਾਤ ਸਾਢੇ ਦਸ ਵਜੇ ਬੰਦ ਕਰ ਦਿਤਾ ਗਿਆ। ਸੁਪਰੀਮ ਕੋਰਟ ਵਲੋਂ 10 ਤੋਂ 50 ਸਾਲ ਦੀਆਂ ਸਭ ਕੁੜੀਆਂ ਤੇ ਔਰਤਾਂ ਦੇ ਮੰਦਰ ਜਾਣ ਉੱਤੇ ਰੋਕ ਖਤਮ ਕੀਤੇ ਜਾਣ ਪਿੱਛੋਂ ਪਹਿਲੀ ਵਾਰੀ ਮੰਦਰ ਦੇ ਕਪਾਟ ਖੋਲ੍ਹੇ ਗਏ ਹਨ। ਇਸ ਪੂਜਾ ਦੇ ਵਕਤ ਕੇਰਲ ਦੇ ਦੇਵਾਸਵਮ ਮੰਤਰੀ ਕੇ. ਸੁਰੇਂਦਰਨ ਅਤੇ ਸ਼ਰਾਵਣਕੋਰ ਦੇਵਾਸਮ ਬੋਰਡ ਦੇ ਪ੍ਰਧਾਨ ਪਦਮ ਕੁਮਾਰ ਸਮੇਤ ਕਈ ਲੋਕ ਮੌਜੂਦ ਸਨ ਅਤੇ ਸੁਰੱਖਿਆ ਦੇ ਵੀ ਭਾਰੀ ਪ੍ਰਬੰਧ ਸਨ।
ਇਸ ਤੋਂ ਪਹਿਲਾਂ ਅੱਜ ਦਿਨ ਦੇ ਵਕਤ ਵੱਡੀ ਗਿਣਤੀ ਵਿੱਚ ਪੁਲਿਸ ਲਾਉਣ ਦੇ ਬਾਵਜੂਦ ਹਿੰਦੂ ਕੱਟੜਪੰਥੀਆਂ ਦੇ ਤਿੱਖੇ ਵਿਰੋਧ ਪ੍ਰਦਰਸ਼ਨ ਦੇ ਕਾਰਨ ਔਰਤਾਂ ਮੰਦਰ ਨਹੀਂ ਪੁੱਜ ਸਕੀਆਂ। ਆਂਧਰਾ ਪ੍ਰਦੇਸ਼ ਦੀ ਇਕ ਔਰਤ ਨੇ ਮੰਦਰ ਜਾਣ ਲਈ ਸਬਰੀਮਾਲਾ ਪਹਾੜੀ ਉੱਤੇ ਚੜ੍ਹਨ ਦੀ ਕੋਸ਼ਿਸ਼ ਕੀਤੀ ਤਾਂ ਅੰਦੋਲਨ ਕਰਦੇ ਮਰਦ ਭਗਤਾਂ ਦੇ ਕਾਰਨ ਉਸ ਨੂੰ ਵਾਪਸ ਜਾਣਾ ਪਿਆ। ਕੇਰਲ ਦੇ ਅਲਾਪੁਜਾ ਦੀ ਇੱਕ ਕੁੜੀ ਲਿਬੀ ਨੂੰ ਵੀ ਪਥਨਮਥਿੱਟਾ ਬਸ ਟਰਮੀਨਲ ਉੱਤੇ ਮੰਦਰ ਵੱਲ ਵਧਣ ਤੋਂ ਰੋਕਿਆ ਗਿਆ। ਪੁਲਿਸ ਨੇ ਕੁਝ ਪ੍ਰਦਰਸ਼ਨਕਾਰੀਆਂ ਨੂੰ ਹਿਰਾਸਤ `ਚ ਵੀ ਲਿਆ ਦੱਸਿਆ ਗਿਆ ਹੈ।
ਮੰਦਰ ਦੇ ਰਾਹ ਵਿੱਚ ਤਲਹਟੀ ਉੱਤੇ ਪੰਬਾ ਅਤੇ ਨਿਲੱਕਲ ਵਿਖੇ ਉਸ ਵੇਲੇ ਤਣਾਅ ਪੈਦਾ ਹੋ ਗਿਆ ਜਦੋਂ ਸੁਪਰੀਮ ਕੋਰਟ ਦੇ ਫ਼ੈਸਲੇ ਦਾ ਵਿਰੋਧ ਕਰਦੇ ਪ੍ਰਦਰਸ਼ਨਕਾਰੀ ਹਿੰਸਕ ਹੋ ਕੇ ਪੁਲਿਸ ਨਾਲ ਭਿੜ ਗਏ ਤੇ ਉਨ੍ਹਾਂ ਨੇ ਪੱਥਰਬਾਜ਼ੀ ਕਰ ਦਿਤੀ। ਇਸ ਪਿੱਛੋਂ ਪੁਲਿਸ ਨੂੰ ਲਾਠੀਚਾਰਜ ਕਰਨਾ ਪਿਆ। ਪੱਥਰਬਾਜ਼ੀ ਅਤੇ ਹੋਰ ਘਟਨਾਵਾਂ ਵਿੱਚ ਇਕ ਬਜ਼ੁਰਗ ਔਰਤ ਸਮੇਤ ਕਈ ਲੋਕ ਜ਼ਖ਼ਮੀ ਹੋਏ। ਕੱਟੜਪੰਥੀਆਂ ਦੇ ਗੁੱਸੇ ਦਾ ਸਿ਼ਕਾਰ ਕੁਝ ਮਹਿਲਾ ਪੱਤਰਕਾਰਾਂ ਵੀ ਹੋਈਆਂ। ਉਨ੍ਹਾਂ ਦੀਆਂ ਗੱਡੀਆਂ `ਤੇ ਹਮਲਾ ਕੀਤਾ ਗਿਆ। ਘੱਟੋ ਘੱਟ ਚਾਰ ਰਾਸ਼ਟਰੀ ਟੀ ਵੀ ਚੈਨਲ ਦੀਆਂ ਮਹਿਲਾ ਪੱਤਰਕਾਰਾਂ ਨੂੰ ਜ਼ਬਰਦਸਤੀ ਗੱਡੀ ਤੋਂ ਉਤਾਰ ਕੇ ਉਨ੍ਹਾਂ ਦੀਆਂ ਗੱਡੀਆਂ ਦੀ ਤੋੜ ਭੰਨ ਕੀਤੀ ਗਈ।