ਨਵੀਂ ਦਿੱਲੀ, 7 ਅਕਤੂਬਰ, (ਪੋਸਟ ਬਿਊਰੋ)- ਫਿਲਮ ਐਕਟਰੈੱਸ ਅਤੇ ਤ੍ਰਿਣਮੂਲ ਕਾਂਗਰਸ ਪਾਰਟੀ ਦੀ ਪਾਰਲੀਮੈਂਟ ਮੈਂਬਰ ਨੁਸਰਤ ਜਹਾਂ ਵੱਲੋਂ ਆਪਣੇ ਪਤੀ ਨਿਖਿਲ ਜੈਨ ਨਾਲ ਦੁਰਗਾ ਪੂਜਾ ਕਰਨ ਲਈ ਜਾਣ ਦੀਆਂ ਖਬਰਾਂ ਤੋਂ ਮੁਸਲਿਮ ਉਲੇਮਾ ਭੜਕ ਪਏ ਹਨ ਅਤੇ ਉਨ੍ਹਾਂ ਨੇ ਇਸ ਕਾਰਵਾਈ ਨੂੰ ‘ਹਰਾਮ’ ਕਿਹਾ ਹੈ।
ਵਰਨਣ ਯੋਗ ਹੈ ਕਿ ਅੱਜ ਕੱਲ੍ਹ ਪੱਛਮੀ ਬੰਗਾਲ ਵਿੱਚ ਦੁਰਗਾ ਪੂਜਾ ਦਾ ਤਿਉਹਾਰ ਚੱਲ ਰਿਹਾ ਹੈ। ਇਸ ਦੌਰਾਨ ਤ੍ਰਿਣਮੂਲ ਕਾਂਗਰਸ ਦੀ ਪਾਰਲੀਮੈਂਟ ਮੈਂਬਰ ਨੁਸਰਤ ਜਹਾਂ ਰੂਹੀ, ਜਿਸ ਨੇ ਇੱਕ ਹਿੰਦੂ ਨੌਜਵਾਨ ਨਿਖਿਲ ਜੈਨ ਨਾਲ ਸ਼ਾਦੀ ਕੀਤੀ ਹੋਈ ਹੈ, ਇੱਕ ਪੰਡਾਲ ਵਿੱਚ ਆਪਣੇ ਪਤੀ ਨਾਲ ਦੁਰਗਾ ਪੂਜਾ ਕਰਨ ਗਈ ਸੀ। ਉਸ ਦੀ ਇਸ ਪੂਜਾ ਅਰਚਨਾ ਦੀ ਖਬਰ ਤੇ ਇਸ ਤਿਉਹਾਰ ਵਿੱਚ ਉਸ ਦੀ ਸਰਗਰਮੀ ਦੀਆਂ ਹੋਰ ਰਿਪੋਰਟਾਂ ਤੋਂਭੜਕੇ ਇੱਕ ਪ੍ਰਮੁੱਖ ਮੁਸਲਿਮ ਉਲੇਮਾ ਨੇ ਕਿਹਾ, ‘ਇਸਲਾਮ ਵਿੱਚ ਯਕੀਨ ਰੱਖਣ ਵਾਲਾ ਵਿਅਕਤੀ ਕਿਸੇ ਹੋਰ ਧਰਮ ਦੀ ਪੂਜਾ ਨਹੀਂ ਕਰ ਸਕਦਾ ਅਤੇ ਜੇ ਨੁਸਰਤ ਦੂਸਰੇ ਧਰਮਾਂ ਦੀ ਪੂਜਾ ਕਰਦੀ ਹੈ ਤਾਂ ਇਸ ਤਰ੍ਹਾਂ ਉਹ ਇਸਲਾਮ ਨੂੰ ਨਹੀਂ ਮੰਨਦੀ, ਉਸ ਦੀ ਇਹ ਕਾਰਵਾਈ ਇੱਕ ਤਰ੍ਹਾਂ ਨਾਲ ਹਰਾਮ ਹੈ ਅਤੇ ਏਦਾਂ ਹੀ ਕਰਨਾ ਹੈ ਤਾਂ ਉਨ੍ਹਾਂ ਨੂੰ ਆਪਣਾ ਨਾਂ ਬਦਲ ਲੈਣਾ ਚਾਹੀਦਾ ਹੈ।’
ਇਸਲਾਮੀ ਸਿਧਾਂਤ ਦੇ ਅਦਾਰੇ ਦੇਵਬੰਦ ਦੇ ਇਸ ਉਲੇਮਾ ਨੇ ਕਿਹਾ, ਇਸਲਾਮ ਵਿੱਚ ਅੱਲ੍ਹਾ ਤੋਂ ਬਿਨਾ ਕਿਸੇ ਹੋਰ ਦੀ ਇਬਾਦਤ ਕਰਨੀ ਹਰਾਮ ਹੈ ਤਾਂ ਨੁਸਰਤ ਜਹਾਂ ਗੈਰ-ਇਸਲਾਮੀ ਕੰਮ ਕਿਉਂ ਕਰਦੀ ਹੈ। ਜੇ ਉਸਨੇ ਗੈਰ-ਇਸਲਾਮੀ ਕੰਮ ਕਰਨੇ ਹਨ ਤਾਂ ਆਪਣਾ ਨਾਂ ਵੀ ਬਦਲ ਲਵੇ।` ਦੇਵਬੰਦ ਦੇ ਉਲੇਮਾ ਨੇ ਕਿਹਾ, ‘ਨੁਸਰਤ ਜਹਾਂ ਨੇ ਏਦਾਂ ਪਹਿਲੀ ਵਾਰ ਨਹੀਂ ਕੀਤਾ, ਉਹ ਪਹਿਲਾਂ ਵੀ ਦੁਰਗਾ ਪੂਜਾ ਕਰ ਚੁੱਕੀ ਹੈ, ਪਰ ਇਸ ਵਾਰ ਨੁਸਰਤ ਨੇ ਨਵ-ਦੁਰਗਾ ਦੀ ਜਨਤਕ ਤੌਰ ਉੱਤੇ ਪੂਜਾ ਕੀਤੀ ਹੈ ਤੇ ਮੈਂ ਸਮਝਦਾ ਹਾਂ ਕਿ ਇਸ ਤਰ੍ਹਾਂ ਦਾ ਅਮਲ ਇਸਲਾਮ ਵਿੱਚ ਜਾਇਜ਼ ਨਹੀਂ। ਨੁਸਰਤ ਨੂੰ ਇਸ ਤੋਂ ਪਰਹੇਜ਼ ਕਰਨਾ ਚਾਹੀਦਾ ਸੀ। ਇਸ ਤਰ੍ਹਾਂ ਦੇ ਕੰਮ ਕਰਨ ਨਾਲ ਉਹ ਇਸਲਾਮ ਤੇ ਮੁਸਲਮਾਨਾਂ ਦੀ ਤੌਹੀਨ ਕਰਦੀ ਹੈ।`
ਉਂਜ ਇਸ ਤੋਂ ਪਹਿਲਾਂ ਵੀ ਨੁਸਰਤ ਜਹਾਂ ਵੱਲੋਂ ਪੂਜਾ ਸਮਾਗਮ ਵਿੱਚ ਜਾਣ, ਪਾਰਲੀਮੈਂਟ ਵਿੱਚ ਸਾੜੀ, ਸੰਧੂਰ ਤੇ ਮਾਡਰਨ ਕੱਪੜੇ ਪਾਉਣ ਕਾਰਨ ਉਲੇਮਾ ਉਸ ਉੱਤੇ ਨਿਸ਼ਾਨੇ ਸਾਧ ਚੁੱਕੇ ਹਨ।