ਜਲੰਧਰ, 7 ਅਕਤੂਬਰ (ਪੋਸਟ ਬਿਊਰੋ)- ਇਸ ਮਹਾਨਗਰ ਵਿੱਚ ਪ੍ਰੀਤ ਨਗਰ ਅਤੇ ਇਸ ਦੇ ਆਲੇ-ਦੁਆਲੇ ਕਾਲੋਨੀਆਂ ਲਈ ਬਰਸਾਤੀ ਸੀਵਰ ਪਾਉਣ ਦਾ ਪ੍ਰਾਜੈਕਟ ਲਟਕ ਜਾਣ ਉੱਤੇ ਨਾਰਥ ਹਲਕੇ ਦੇ ਕਾਂਗਰਸੀ ਵਿਧਾਇਕ ਬਾਵਾ ਹੈਨਰੀ, ਡਿਪਟੀ ਕਮਿਸ਼ਨਰ ਵਰਿੰਦਰ ਸ਼ਰਮਾ, ਨਗਰ ਨਿਗਮ ਕਮਿਸ਼ਨਰ ਦੀਪਰਵਾ ਲਾਕੜਾ ਅਤੇ ਡਾਇਰੈਕਟਰ ਸਨਅਤੀ ਵਿਭਾਗ ਤੇ ਸੈਕਟਰੀ ਨੂੰ ਕਾਨੂੰਨੀ ਨੋਟਿਸ ਭੇਜਿਆ ਗਿਆ। ਬਰਸਾਤੀ ਪਾਣੀ ਦੇ ਨਿਕਾਸ ਲਈ ਪ੍ਰੀਤ ਨਗਰ ਤੋਂ ਸੋਢਲ ਚੌਕ ਅਤੇ ਆਲੇ-ਦੁਆਲੇ ਦੀਆਂ ਅਨੇਕਾਂ ਕਾਲੋਨੀਆਂ ਨੂੰ ਰਾਹਤ ਦੇਣ ਲਈ ਬਰਸਾਤੀ ਪਾਣੀ ਦੀ ਨਿਕਾਸੀ ਲਈ ਸੀਵਰੇਜ ਪ੍ਰਾਜੈਕਟ ਜਿਸ ਥਾਂ 'ਤੇ ਬਣਨਾ ਹੈ, ਉਸ ਨਾਲ ਸਕੂਲ ਲੱਗਦਾ ਹੈ ਤੇ ਉਹ ਥਾਂ ਗਰੀਨ ਬੈਲਟ ਲਈ ਰਿਜ਼ਰਵ ਰੱਖੀ ਗਈ ਹੈ।
ਪਤਾ ਲੱਗਾ ਹੈ ਕਿ ਉਕਤ ਵਿਧਇਕ ਤੇ ਅਧਿਕਾਰੀਆਂ ਨੂੰ ਜਿਹੜਾ ਕਾਨੂੰਨੀ ਨੋਟਿਸ ਭੇਜਿਆ ਗਿਆ ਹੈ, ਉਸ ਵਿੱਚ ਇਤਰਾਜ਼ ਕੀਤਾ ਗਿਆ ਹੈ ਕਿ ਜਿਸ ਜ਼ਮੀਨ ਬਾਰੇ ਮਾਮਲਾ ਪਹਿਲਾਂ ਅਦਾਲਤ ਵਿੱਚ ਚਲ ਰਿਹਾ ਹੈ, ਉਸ ਜ਼ਮੀਨ 'ਤੇ ਦੂਜਾ ਪ੍ਰਾਜੈਕਟ ਕਿਵੇਂ ਬਣਾਇਆ ਜਾ ਸਕਦਾ ਹੈ। ਇਸ ਨੋਟਿਸ ਵਿੱਚ ਦੋਸ਼ ਲਾਇਆ ਗਿਆ ਹੈ ਕਿ ਗਰੀਨ ਬੈਲਟ ਦੀ ਜ਼ਮੀਨ 'ਤੇ ਵਾਟਰ ਟਰੀਮੈਂਟ ਪਲਾਂਟ ਦੀ ਆੜ 'ਚ ਪ੍ਰਭਾਵਸ਼ਾਲੀ ਲੋਕਾਂ ਵੱਲੋਂ ਕਬਜ਼ਾ ਕਰਨ ਦਾ ਯਤਨ ਕੀਤਾ ਜਾ ਰਿਹਾ ਹੈ। ਵਿਧਇਕ ਤੇ ਅਧਿਕਾਰੀਆਂ ਨੂੰ ਡੀ ਕੇ ਭੱਟੀ ਵੱਲੋਂ ਭੇਜੇ ਗਏ ਕਾਨੂੰਨੀ ਨੋਟਿਸ ਵਿੱਚ 15 ਦਿਨ ਅੰਦਰ ਜਵਾਬ ਮੰਗਿਆ ਅਤੇ ਕਿਹਾ ਗਿਆ ਹੈ ਕਿ ਜੇ ਇਸ ਪ੍ਰਾਜੈਕਟ ਨੂੰ ਨਾ ਰੋਕਿਆ ਗਿਆ ਤਾਂ ਮਾਮਲਾ ਅਦਾਲਤ 'ਚ ਜਾਵੇਗਾ ਅਤੇ ਇਸ ਦਾ ਸਾਰਾ ਖਰਚ ਵੀ ਵਿਧਾਇਕ ਅਤੇ ਉਕਤ ਅਧਿਕਾਰੀਆਂ 'ਤੇ ਪਾਇਆ ਗਿਆ ਹੈ।
ਵਰਨਣ ਯੋਗ ਹੈ ਕਿ ਇਸ ਬਰਸਾਤੀ ਸੀਵਰੇਜ਼ ਪਾਉਣ ਦੇ ਪ੍ਰਾਜੈਕਟ ਦਾ ਨੀਂਹ ਪੱਥਰ ਸਾਲ 2016 'ਚ ਉਸ ਸਮੇਂ ਦੇ ਵਿਧਾਇਕ ਕੇ ਡੀ ਭੰਡਾਰੀ ਨੇ ਰੱਖਿਆ ਸੀ ਅਤੇ ਓਦੋਂ ਇਹ ਪ੍ਰਾਜੈਕਟ ਅਮਰੁਤ ਯੋਜਨਾ ਹੇਠ 5.12 ਕਰੋੜ ਦਾ ਬਣਿਆ ਸੀ ਅਤੇ ਪ੍ਰੀਤ ਨਗਰ ਤੋਂ ਸੋਢਲ ਰੋਡ 'ਤੇ ਬਰਸਾਤੀ ਸੀਵਰ ਪੈਣਾ ਸੀ। ਇਸ ਬਾਰੇ ਨਗਰ ਨਿਗਮ ਦੇ ਐਸ ਈ ਸਤਿੰਦਰ ਮਹਾਜਨ ਦਾ ਕਹਿਣਾ ਹੈ ਕਿ ਨਿਯਮ ਅਨੁਸਾਰ ਉਕਤ ਪ੍ਰਾਜੈਕਟ ਦਾ ਟੈਂਡਰ ਤਿੰਨ ਵਾਰ ਮੰਗਣ ਦੀ ਪ੍ਰਕਿਰਿਆ ਹੈ। ਜੇ ਇਸ ਬਾਰੇ ਪਹਿਲੀ ਵਾਰ ਤਿੰਨ ਕੰਪਨੀਆਂ ਨਹੀਂ ਆਉਂਦੀਆਂ ਅਤੇ ਇੱਕੋ ਕੰਪਨੀ ਆਉਂਦੀ ਹੈ ਤਾਂ ਦੂਜੀ ਵਾਰ ਟੈਂਡਰ ਮੰਗਿਆ ਜਾਂਦਾ ਹੈ। ਜੇ ਦੂਜੀ ਵਾਰ ਵੀ ਤਿੰਨ ਕੰਪਨੀਆਂ ਟੈਂਡਰ ਨਹੀਂ ਪਾਉਂਦੀਆਂ ਤਾਂ ਤੀਜੀ ਵਾਰ ਟੈਂਡਰ ਮੰਗੇ ਜਾਂਦੇ ਹਨ। ਜੇ ਤਿੰਨ ਕੰਪਨੀਆਂ ਨਹੀਂ ਆਉਂਦੀਆਂ ਤਾਂ ਪਹਿਲੀ ਵਾਰ ਮੰਗੇ ਟੈਂਡਰਾਂ ਦੌਰਾਨ ਟੈਂਡਰ ਪਾਉਣ ਵਾਲੀ ਇੱਕੋ ਕੰਪਨੀ ਨੂੰ ਕੰਮ ਅਲਾਟ ਹੋ ਸਕਦਾ ਹੈ। ਐਂਸਈ ਨੇ ਕਿਹਾ ਕਿ ਇੱਕ ਮਹੀਨੇ 'ਚ ਟੈਂਡਰ ਦੀ ਪ੍ਰਕਿਰਿਆ ਪੂਰੀ ਹੋ ਜਾਵੇਗੀ।
ਸਾਲ 2016 ਵਿੱਚ ਜਦੋਂ ਕੇ ਡੀ ਭੰਡਾਰੀ ਨੇ ਉਸ ਪ੍ਰਾਜੈਕਟ ਦਾ ਨੀਂਹ ਪੱਥਰ ਰੱਖਿਆ ਸੀ ਤਾਂ 2017 'ਚ ਸਰਕਾਰ ਬਦਲ ਗਈ ਤੇ ਬਾਵਾ ਹੈਨਰੀ ਵਿਧਾਇਕ ਬਣੇ ਤਾਂ ਉਨ੍ਹਾਂ ਨੇ ਉਕਤ ਪ੍ਰਾਜੈਕਟ 'ਚ ਕੁਝ ਹੋਰ ਇਲਾਕੇ ਜੋੜੇ ਗਏ ਤੇ ਟੈਂਡਰ ਲਗਾਇਆ ਗਿਆ ਤਾਂ ਕਾਨੂੰਨੀ ਨੋਟਿਸ ਆ ਗਿਆ।